សិល្បៈជាតិ៖ នាពេលថ្មីៗនេះ តារាចម្រៀងជើងចាស់គឺលោក សុះ ម៉ាច បានចេញមកបង្ហោះសារនៅលើបណ្ដាញសង្គមហ្វេសប៊ុក ដោយលោកលើកឡើងពីការអំពាវនាវដល់រាជរដ្ឋាភិបាល មេត្តាយកចិត្តទុកដាក់ចំពោះប្រាក់បៀវត្សរ៍របស់លោកគ្រូអ្នកគ្រូផ្នែកសិល្បៈបុរាណ ខណៈមានការលេចលឺដំណឹងមកថា ប្រទេសជិតខាងកំពុងព្យាយាមអូសទាញគ្រូៗជំនាញសិល្បៈបុរាណយកទៅបង្រៀននៅស្រុកគេ។
លោក សុះ ម៉ាច បានរៀបរាប់ខ្លឹមសារប្រាប់មហាជនយ៉ាងដូច្នោះ៖ «ខ្ញុំបានឮល្ហិចល្ហៀងថា ថៃបានជួលអ្នកគ្រូរបាំបុរាណ ឱ្យទៅបង្ហាត់នៅសាលាថៃ ព្រមទាំងទាក់ទងលោកគ្រូតុលា ដែលជាគ្រូបង្ហាត់ឧបករណ៍ភ្លេងបុរាណ (ទ្រ) ទៅបង្ហាត់នៅសាលាថៃ ដោយផ្តល់ជូនប្រាក់ខែខ្ពស់ទៀតផង តែលោកគ្រូតុលាមិនព្រមទទួលយកការអញ្ជើញនោះទេ។ តែអ្នកគ្រូរបាំដែលខ្ញុំមិនចាំឈ្មោះបាននឹងកំពុងតែបង្ហាត់នៅទីនោះផងដែរ (មិនដឹងថាពិតឬយ៉ាងណានោះទេ)។ នេះបើតាមការឱ្យដឹងពីលោកគ្រូតុលានិងប្រភពមួយទៀតដែលខ្ញុំមិនចាំ។ពាក់ព័ន្ធនិងរបាំបុរាណបើថៃគេរៀនបានប្រហាក់ប្រហែលនឹងខ្មែរមែននោះបញ្ហានឹងកើតមានទៀតមិនខានដូចជាល្ខោនខោល គុនខ្មែរជាដើម។»
លោកបន្តសង្កត់ធ្ងន់ថា ៖ «ចូរប្រយ័ត្នផងណា៎!សូមរដ្ឋាភិបាលមេត្តាយកចិត្តទុកដាក់ដល់អ្នកគ្រូលោកគ្រូសិល្ប:បុរាណខ្មែរឱ្យបានជីវភាពសមរម្យល្អដើម្បីបន្តមនសិការជាតិរបស់ពួកគាត់ផង ។ នេះជាការបញ្ចេញមតិយោបល់របស់ខ្ញុំក្នុងនាមសិល្បករខ្មែរមួយរូបដែលស្រឡាញ់និងអភិរក្សសិល្ប:វប្បធម៌ខ្មែរដ៏ល្អផូរផង់។គួរពុំគួរសូមអធ្យាស្រ័យដល់ខ្ញុំបាទផង សូមអរគុណ។»
ចំពោះករណីខាងលើនេះ ត្រយងកំពុងព្យាយាមសុំសម្ភាសលោកគ្រូអ្នកគ្រូ សាស្ត្រារ្យផ្នែកសិល្បៈបុរាណ ដើម្បីបំភ្លឺបន្ថែមថា តើពិតជាមានករណីអូសទាញទឹកចិត្តគ្រូៗមែនដូចការលើកឡើងឬយ៉ាងណា?សារព័ត៌មានត្រយងនឹងផ្សាយជូនព័ត៌មានលម្អិតនាពេលខាងមុខបន្តទៀត។
ក្រោយការបង្ហោះរបស់លោក សុះ ម៉ាច គេមើលឃើញថា មហាជនជាច្រើនគាំទ្រចំពោះមតិរបស់លោក ហើយខ្លះទៀតមានសំណូមពរឱ្យក្រសួងពាក់ព័ន្ធជួយពិនិត្យចំពោះបញ្ហានេះផងដែរ៕
