សិល្បៈជាតិ៖ តារាចម្រៀងប្រុសជួរមុខប្រចាំផលិតកម្មហង្សមាស ឆន សុវណ្ណរាជ បានចេញមកទម្លាយអារម្មណ៍នៅលើហ្វេសប៊ុកផ្ទាល់ខ្លួនឱ្យមហាជនអ្នកគាំទ្រដឹងថា លោកមានអារម្មណ៍ខកចិត្តយ៉ាងខ្លាំង នៅពេលបានដឹងថាមនុស្សស្រីជិតដិតម្នាក់ស្រឡាញ់រាប់អានដូចប្អូន ចូលមកបង្កើតមិត្តភាពរាប់អានក្លែងក្លាយអស់រយៈពេលជាង ១០ ឆ្នាំមកហើយ បែរជាបោកប្រាស់ទំនុកចិត្តរបស់លោកទៅវិញ។
ត្រយងសូមដកស្រង់ការបង្ហោះរបស់តារាចម្រៀង ឆន សុវណ្ណរាជ នៅថ្ងៃទៅ ៧ ខែកុម្ភៈ នេះទាំងស្រុងថា៖ «អ្នកជិតដិត! ស្រលាញ់បងណាស់ បងប្រុស ចុងក្រោយលេងបងប្រុសម៉ាផ្អែមមាត់។ អរគុណ ការស្រលាញ់ក្លែងក្លាយរបស់ប្អូនស្រីរយៈពេល ១០ ឆ្នាំជាងមកនេះ! អ្នកមកក្បែរខ្ញុំ ដើម្បីយកក្រេឌីតតែប៉ុណ្ណោះ ស្តាយទឹកចិត្តការស្រលាញ់ អស់ពីពោះទៅអ្នក ស្តាយពេលវេលា លះបង់ទុកអ្នកដូចជាប្អូនស្រីបង្កើតចុងក្រោយដឹងរឿងបាក់ចង្កេះ។ លើកទីមួយ លើកលែងឱ្យតែលើកនេះ good bye my love bye forever អ្នកមើលការផុសរបស់ខ្ញុំមួយនេះ សូមប្រុងប្រយ័ត្នបន្តិចណាជាពិសេសរឿងលុយកាក់ ខ្ញុំអត់ដឹងរឿងហើយក៏មិនទទួលខុសត្រូវដែរ! អារម្មណ៍ពេលនេះ ឆ្អែតហើយក៏ខ្លាចមនុស្សបំផុតដែរ កែខ្លួនទៅណាអាណិតគ្រួសារនឹងអ្នកផ្ទះ អរគុណហើយក៏ខ្លាចបំផុតដែរ អ្នកជិតដិត»។
យ៉ាងណាមិញ លោក ឆន សុវណ្ណរាជ មិនបានបង្ហាញអត្តសញ្ញាណរបស់មនុស្សស្រីដែលរៀបរាប់ដូចខាងលើនេះទេ ប៉ុន្តែ អ្នកគាំទ្ររបស់លោកបានដាក់ការសង្ស័យថា មកពីរឿងលុយកាក់ ឬរឿងប្រើឈ្មោះរបស់លោកដើរបោកលុយអ្នកផ្សេងៗ រហូតដល់ថ្នាក់តារាប្រុសរូបនេះប្រាប់ឱ្យគ្រប់គ្នាប្រុងប្រ័យត្នបំផុត ហើយលោកក៏មិនទទួលខុសត្រូវដែរ ប្រសិនបើមានករណីណាមួយដែលកើតមានឡើង។