រឿងរ៉ាវប្លែកៗ៖ ប្រសិនបើលោកអ្នកមានឱកាសបានទៅដើរលេងកម្សាន្តនៅទីក្រុងប៉ារីសប្រទេសបារាំង ហើយបានទីទស្សនាទីកប់សព Pere-Lachaise ដែលជាទីកប់សពដ៏ធំជាងគេរបស់ក្រុងប៉ារីស លោកអ្នកនឹងមានឱកាសបានជួបរូបចម្លាក់ Victor Noir ដែលជារូបចម្លាក់បុរសដេកផ្ងារ ក្នុងកាយវិការធម្មតាមិនមានអ្វីខុសប្លែកពីគេនោះឡើយ ប៉ុន្តែអ្វីដែលមិនប្រក្រតីនោះគឺ រូបចម្លាក់បុរសរូបនេះជារៀងរាល់ថ្ងៃតែងតែត្រូវនារីៗមកពីជុំវិញពិភពលោកមកស្ទាបអង្វែលត្រង់តំបន់ពិសេស រហូតក្លាយជាផ្នូរសពប្រវត្តិសាស្ត្រ១៨+។ និយាយមកដល់ចំណុចនេះលោកអ្នកប្រាកដជាចង់ដឹងហើយថាតើរូបចម្លាក់មួយនេះមានប្រវត្តិយ៉ាងណា?
តាមពិតទៅ Victor Noir កាលនៅរស់គឺគ្រាន់តែជាអ្នកកាសែតធម្មតាម្នាក់ប៉ុណ្ណោះ គេមានជីវិតរស់នៅក្នុងអំឡុងចុងសត្សវត្សរ៍ទី១៩។ ការស្លាប់របស់លោកបណ្ដាលមកពីអំពើហិង្សារវាងក្រុមហ៊ុនកាសែតនិងពយកវណ្ណៈអភិជននៅក្នុងប្រទេសបារាំង ធ្វើឱ្យលោកត្រូវបានគេបាញ់សម្លាប់។ ការស្លាប់របស់លោកបានក្លាយជាចំណុចចាប់ផ្ដើមប្រឆាំងនឹងវណ្ណៈសក្តិភូមិក្នុងប្រទេសបារាំង។ ក្រៅពីនេះលោកបានក្លាយជានិមិត្តរូបនៃការពង្រីកពូជពង្សនិងការរួមភេទផងដែរ។
Victor គឺជាមនុស្សធម្មតាម្នាក់។ លោកមានជីវិតរស់អំឡុងចាប់ពីឆ្នាំ១៨៤៨ ដល់ឆ្នាំ១៨៧០។ការចាប់ផ្ដើមអាជីពដំបូងរបស់លោក លោកបានធ្វើជាអ្នកយកព័ត៌មានឱ្យទស្សនាវដ្ដីមួយឈ្មោះ «La Marseillaise» នៅប៉ារីស។ លោកមិនត្រូវបានអ្នករួមការងារពេញចិត្តប៉ុន្មាននោះឡើយ ហើយចំពោះករណីនេះមិនដឹងថាជាការពិតឬយ៉ាងណាដែរគ្រាន់តែមានការចុះផ្សាយតាមកាសែតជាច្រើនសុទ្ធតែលើកមកបែបនេះ។ មានអ្នកខ្លះលើកឡើងថាប្រហែលជាអ្នកទាំងនោះច្រណែននឹងកាណុងដែលស្ថិតនៅក្នុងខោរបស់លោកទើបនាំគ្នានិយាយមិនល្អពីលោក។
ថ្ងៃមួយជាចៃដន្យអាក្រក់ Victor បានស្ថិតនៅក្នុងហេតុការណ៍ដ៏អាក្រក់មួយ បងប្អូនជីដូនមួយរបស់ព្រះចៅអធិរាជ ណាប៉ូឡេអុង ទី៣ ព្រះអង្គម្ចាស់ Pierre Bonaparte មានកំហឹងយ៉ាងខ្លាំងព្រោះតែចំណងជើងនិងសាច់រឿងដែលចេញផ្សាយនៅទស្សនាវដ្ដី «La Marseillaise» ។ ដោយសារតែមូលហេតុនេះធ្វើឱ្យទ្រង់បបួលនិពន្ធនាយកទស្សនាវដ្ដីទៅជួបតទល់។ តំណាងឱ្យនិពន្ធនាយករបស់ខ្លួន Victor បានចូលទៅជួយកែសម្រួលខ្លឹមសារ។ ខណៈដែល Victor Noir ស្ថិតនៅចំកណ្ដាលនៃជំលោះរវាងភាគីទាំងពីរ ព្រះអង្គម្ចាស់មិនអាចទប់កំហឹងជាប់ទ្រង់បានដក់កាំភ្លើងហើយបាញ់សម្លាញ់ Victor។
បន្ទាប់ពីការបាត់បង់ជីវិតរបស់ Victor Noir សិល្បករសូនរូបបានឆ្លាក់រូបលោកធ្វើជាស្ពាន់នៅពីខាងលើផ្នូរកប់សពរបស់លោក ហើយដោយសារតែរូបចម្លាក់ដែលធ្វើបានប្រៀបដូចជារាងមនុស្សពិតៗពិសេសតំបន់បរិវេណខាងមុខមានទំហំធំនិងលយចេញមកខាងក្រៅទល់ខោ ធ្វើឱ្យរូបចម្លាក់នេះក្លាយជាទីចាប់អារម្មណ៍ជាពិសេសមាននារីៗជាច្រើនចង់មកឃើញដោយផ្ទាល់នឹងភ្នែក និងយកដៃមកស្ទាបថាតើបរិវេណតំបន់ពិសេសនោះមានទំហំធំពិតមែនឬក៏អត់?
ដោយសារតែហេតុនេះហើយទើបធ្វើឱ្យតំបន់ពិសេសរបស់រូបចម្លាក់ Victor Noir ត្រូវបានស្រីៗស្ទើពាសពេញពិភពលោកស្ទាបអង្អែលតាំងពីជំនាន់មកទៅជំនាន់មួយ គិតមកដល់បច្ចុប្បន្ននេះមានអាយុកាលជាង១០០ឆ្នាំទៅហើយ។
សព្វថ្ងៃនេះរូបចម្លាក់ Victor Noir បានប្រែក្លាយជាវត្ថុស័ក្ដិសិទ្ធិដែលគេជឿទៅលើរឿងបន្តពូជ ដោយអ្នកទេសចរណ៍ជាស្ត្រីរមែងមកថើប មកអង្អែលត្រង់តំបន់ពិសេសដើម្បីសុំពរឱ្យខ្លួនមានកូនឬសុំនៅក្នុងរឿងគូស្រករ ដោយមានអ្នកខ្លះទៀតដល់ថ្នាក់ធ្វើឥរិយាបទដូចជាខ្លួនកំពុងតែរួមភេទជាមួយនឹងរូបចម្លាក់នេះក៏សឹងមាន ចំណែកឯគូស្នេហ៍វិញបាននាំគ្នាមកអង្អែលតំបន់ពិសេសដើម្បីឱ្យស្នេហាពួកគេស្រលាញ់គ្នាយូរអង្វែង។
បច្ចុប្បន្នរូបចម្លាក់ Victor នៅត្រង់ចំណុចពិសេសមើលឃើញយ៉ាងច្បាស់ថាមានលក្ខណៈបែកពណ៌និងមានពណ៌ខុសពីពណ៌ដើមរបស់រូបចម្លាក់ រហូតដល់មានពេលខ្លះអាជ្ញាធរបារាំងបានបញ្ជាឱ្យមានការដាក់របងការពារដើម្បីឱ្យដួងវិញ្ញាណរបស់លោក Victor បានស្ងប់សុខ ប៉ុន្តែដោយសារតែមានបាតុកម្មពីអ្នកទេសចរណ៍ទើបចាំបាច់ត្រូវតែរុះរើរបងចោលវិញ។ រូបចម្លាក់ Victor នៅតែស្ថិតនៅក្នុងតំបន់កប់សព Pere-Lachaise ដូចមុន ដូច្នេះបើសិនជាលោកអ្នកបានឱកាសទៅដើរកម្សាន្តនៅប៉ារីស អាចឆ្លៀតចូលទៅមើលរូបចម្លាក់របស់លោកបាន៕