សិល្បៈជាតិ៖ កូនប្រុសច្បងឧកញ៉ា ព្រាប សុវត្ថិ គឺកំឡោះសង្ហា សុវត្ថិ មុនីវណ្ណ បានលេចមុខជាតារារះថ្មីក្នុងផលិតកម្ម Galaxy Navatra តាមរយៈការបង្ហាញមុខដំបូងនៅលើ Poster ផ្សព្វផ្សាយការប្រគំតន្ត្រី ដែលគ្រោងធ្វើឡើងនៅថ្ងៃទី១៣-១៤ កុម្ភៈ ២០២៣ នេះ ចំថ្ងៃនេះទិវាបុណ្យនៃក្ដីស្រឡាញ់ ។
ជុំវិញករណីនេះដែរ មានការសង្ស័យពីមហាជនអ្នកគាំទ្រដែលឆ្ងល់ថា តើកូនប្រុសច្បងសង្ហាជាងគេត្រកូលគ្រួសារកំពូលតារាចម្រៀង ឧកញ៉ា ព្រាប សុវត្ថិ លែងច្រៀងនៅហង្សមាសហើយមែនទេ បានជាមកតាមឪពុកនៅក្នុងទ្រនំកាឡាក់ស៊ីបែបនេះ?
រហូតមកទល់ពេលនេះ មិនទាន់មានការប្រកាសជាផ្លូវការណាមួយបញ្ជាក់ឱ្យច្បាស់ថា តារាចម្រៀង សុវត្ថិ មុនីវណ្ណ គឺជាសមាជិកពេញសិទ្ធដែលមានកុងត្រាឱ្យផលិតកម្ម Galaxy Navatra ឬ ក៏ជាតារាឯករាជ្យ ប៉ុន្តែដោយសារ សុវត្ថិ មុនីវណ្ណ ធ្លាប់បានប្រកាសថារូបលោកបានផុតកិច្ចសន្យាការងារជាមួយហង្សមាសតាំងពីចុងឆ្នាំ ២០២២ ម្លេះ ហើយលោកនឹងត្រៀមបញ្ចេញអ្វីដែលថ្មីបំផុតនៅដើមឆ្នាំ២០២៣ ដែលសុំឱ្យហ្វេនរងចាំតាមដានបន្តពីសកម្មភាពសិល្បៈរបស់លោក។
គេនៅចាំបានថា តារាចម្រៀងបងប្អូនប្រុសទាំង ៣នាក់ជាកូនប្រុសរបស់លោក ព្រាប សុវត្ថិ បានចូលទៅជ្រកនៅក្នុងផលិតកម្មរស្មីហង្សមាស កាលពីដើមខែមករា ឆ្នាំ២០១៨ ដែលកាលនោះ សុវត្ថិ មុន្នីវណ្ណ មានអាយុ២០ឆ្នាំ សុវត្ថិ មុន្នីនាគ វ័យ១៨ឆ្នាំ និងសុវត្ថិ សេរីវុឌ្ឍ អាយុ១៥ឆ្នាំ ហើយពួកគេសុទ្ធតែនៅសិក្សាទាំងអស់ ។ បើគិតមកទល់ពេលនេះ គ្រប់រយៈពេល ៥ ឆ្នាំល្មមដែលពួកគេបានផុតកុងត្រាជាមួយផលិតកម្មហង្សមាស ដែលជាធម្មតាតារានីមួយៗធ្លាប់មានកុងត្រាមិនពី ៥ឆ្នាំដូចគ្នា។
យ៉ាងណាមិញក៏មានការសង្ស័យដូចគ្នាដែរថា ក្រៅពី សុវត្ថិ មុនីវណ្ណ កូនប្រុសពីររូបទៀតរបស់លោក ព្រាប សុវត្ថិ អាចនឹងត្រៀមចេញមុខក្នុងផលិតកម្ម Galaxy Navatra នាពេលឆាប់ៗនេះមិនខុសពីកូនប្រុសច្បងដែរ។ អ្វីដែលគួរចាប់អារម្មណ៍ខ្លាំងបំផុតនោះគឺ កូនប្រុសពៅលោក ព្រាប សុវត្ថិ ក៏ធ្លាប់បានបញ្ចេញស្នាដៃដំបូង គឺការនិពន្ធបទភ្លេង និងទំនុកច្រៀងឱ្យឪពុកខ្លួនច្រៀងនៅផលិតកម្ម Galaxy Navatra ជាមួយបទថ្មីមានចំណងជើងថា «Gang Gang» ដែលជាបទរ៉េបបែប Hip Hop ដំបូងរបស់លោក ព្រាប សុវត្ថិ នៅផលិតកម្មថ្មីនោះ និងជាការសម្រួលបទភ្លេងដោយ Grimes។
តើអាចទេតារាចម្រៀងរលកក្រោយនៃសែស្រឡាយអ្នកសិល្បៈមានឪពុកជាកំពូលតារាចម្រៀង នឹងជ្រកកោននៅទ្រនំតែមួយជាមួយឪពុកនៅកាឡាក់ស៊ីទាំងអស់គ្នា ដោយមានការជ្រោមជ្រែងផ្ទាល់ពីឪពុកជាបង្គោល ហើយនឹងត្រៀមបញ្ចេញមុខម្ដងម្នាក់ៗទៅតាមពេលកំណត់? សារព័ត៌មានត្រយងកំពុងព្យាយាមសុំសម្ភាសបញ្ជាក់បន្ថែមពី អ្នកគ្របគ្រងផលិតកម្ម Galaxy Navatra ដើម្បីលម្អិតពីរឿងនេះនាពេលខាងមុខបន្តទៀត។
