សិល្បៈជាតិ៖ លោក សោម ដូរ៉េ ដែលមហាជនអ្នកគាំទ្រស្គាល់លោកជាអ្នកនិពន្ធបទចម្រៀងល្បីៗនោះ ស្រាប់តែថ្មីៗនេះ លោកចេញមកបង្ហោះនៅលើបណ្ដាញសង្គមហ្វេសប៊ុក ដោយលាតត្រដាងពីរឿងរ៉ាវកន្លងមកប្រាប់ថា លោកអស់ផ្លូវដើរនៅក្នុងអាជីពសិល្បៈចម្រៀង ដោយសារតែមានអ្នកចាំបង្ខូចឈ្មោះលោក រហូតដល់តារាចម្រៀងនៅក្នុងផលិតកម្មនាំគ្នាស្អប់រូបលោកទាំងគ្មានមូលហេតុ។
សារព័ត៌មានត្រយង សូមដកស្រង់ការបង្ហោះរបស់លោក សោម ដូរ៉េ ទាំងស្រុងដែលលោកបានរៀបរាប់ដូច្នោះ៖
«កាលពី៩ឆ្នាំមុន ខ្ញុំនៅតែចងចាំមិនភ្លេច គឺក្មេងប្រុសម្នាក់ដែលគឺជាអ្នកគាំទ្រគ្រប់តារាចម្រៀងប្រចាំ HM ហើយក៏ជាអតីតអ្នកកាសែតម្នាក់ គាត់ធ្លាប់បានបង្កបញ្ហាជាច្រើនមកលើខ្ញុំ! យ៉ាងអយុត្តិធម៌ជាទីបំផុត ទាំងខ្ញុំមិនយល់សោះ ថាគាត់ស្អប់ខ្ញុំរឿងអ្វី និយាយបំផ្លើសប្រាប់ មិត្តរួមអាជីពឲ្យគេស្អប់ខ្ញុំ ! ធ្វើឲ្យអ្នកចម្រៀងជាច្រើននាក់ ខឹងខ្ញុំដោយឥតហេតុផល! ទីបំផុតមួយរយៈក្រោយ ខ្ញុំក៏បានស្វែងរកការពិតឃើញ! តែក្នុងនោះក៏មាន95% ខ្ញុំបានជួបផ្ទាល់ហើយជជីកសួររកខុសត្រូវទើបដឹងការពិត! ចំនែក5%ទៀតគឺគាត់ Unfriend ខ្ញុំហើយមិនតបឆាតខ្ញុំ បែរជាឃើញបង្ហោះ Status ឌឺដង ចោទប្រកាន់ខ្ញុំយ៉ាងភ្លាវខុសទំនងដោយមិនមកជជែកតទល់ជាមួយខ្ញុំផ្ទាល់ ដើម្បីដោះស្រាយ ! នេះគឺជារឿងអយុត្តិធម៌មួយដែលខ្ញុំចងចាំមិនភ្លេចក្នុងអាជីពសិល្បៈ ។ បាត់គាត់ជាង៥ឆ្នាំ ចៃដន្យ ខ្ញុំបានអូសតិកតុកមកឃើញ ម្តាយគាត់ស្រែកយំ អំពាវនាវស្រែកសុំរកយុត្តិធម៌ ព្រោះកូនគាត់ (ម្នាក់ដែលរករឿងខ្ញុំ) ជួបគ្រោះថ្នាក់ចរាចរណ៍ បណ្តាលឲ្យស្លាប់ប្អូនស្រីគាត់ ហើយគាត់(ម្នាក់ដែលរករឿងខ្ញុំ) ក៏ធ្លាក់ខ្លួនពិការ! ក្នុងរូបភាព អ៊ំស្រីគាត់ប្រឹងចាប់បង្ខំកូនពិការគាត់ឲ្យថតទាំងគ្នាស្រែកយំខឹងមិនចង់ឲ្យថត តែក្នុងហេតុផលដើម្បីសុំរកយុត្តិធម៌ឲ្យគេជួយ! ពិតជាគួរឲ្យសង្វេគជាពន់ពេក! បណ្តាលឲ្យខ្ញុំកើតមានអារម្មណ៍មិនល្អពេញមួយអាទិត្យ! ថ្ងៃនេះខ្ញុំសូមធ្វើការអហោសិកម្មគ្រប់រឿងរ៉ាវកន្លងមកដែលគាត់ធ្វើដាក់ខ្ញុំទាំងប៉ុន្មាន សូមកុំឲ្យខ្ញុំនិងគាត់ជំពាក់កម្មគ្នាតទៅជាតិក្រោយទៀត! អាយុកាន់តែច្រើន ខ្ញុំកាន់តែជឿលើអំពើបាបបុណ្យ និងកម្មផលនៅលើលោកនេះយ៉ាងប្រាកដ!! គឺគាត់នេះហើយធ្វើឲ្យខ្ញុំ បែកបាក់និងបាត់បង់មិត្តជិតស្និទ្ធជាច្រើននាក់ ធ្វើឲ្យខ្ញុំមានបញ្ហាជាមួយរៀមច្បងធំៗក្នុងក្រុមហ៊ុនTown ជាច្រើននាក់ ! ចាត់ទុកថា..វាជាមេរៀនមួយដ៏សែនងងិត បង្រៀនឲ្យខ្ញុំស្គាល់ពិភពសិល្បៈកាន់តែភ្លឺ ! #សោមដូរ៉េ »។
ដោយឡែក លោក សោម ដូរ៉េ បានលាក់អត្តសញ្ញាណអ្នកបង្ខូចឈ្មោះលោកមិនឱ្យមហាជនបានស្គាល់មុខនោះទេ។ ប៉ុន្តែក្រោយការបង្ហោះពីរឿងរ៉ាវរបស់លោក សោម ដូរ៉េ ខាងលើនេះ គេឃើញមានអ្នកគាំទ្រជាច្រើននាក់បញ្ចេញមតិថា «អំពើល្អមិនសាបសូន្យទេបង » «អំពើល្អ ធ្វើឱ្យមានជ័យជំនះ លើ អំពើអាក្រក់ថ្ងៃណាមួយ» «បង កុំគិតច្រើនអី … មនុស្សល្អ ទេវតានឹង តាមថែរក្សាបង» «ខ្ញុំនៅតែជឿជាក់បង។ជូនពរបង។» «កម្មពៀរមានពិតមិនចាំជាតិមុខជាតិក្រោយឡើយ ដូចនេះយើងចូលរួមនិងនាំគ្នាសាងអំពើល្អឱ្យបានច្រើនៗ ទាំងអស់គ្នា.» «បាបកម្មមានពិតមែនប្រូ ជឿលើធម៌ព្រះ ធ្វើល្អបានល្អ »។
សូមជម្រាបថា សព្វថ្ងៃនេះគេមិនសូវឃើញមានស្នាដៃលោក សោម ដូរ៉េ លើការនិពន្ធបទចម្រៀងដូចមុនទៀតទេ ពោលគឺមានមួយៗ ប៉ុន្តែលោកបានបង្ហាញស្នាដៃតាមរយៈនិពន្ធរឿងភាគទូរទស្សន៍ដូចជារឿង «កាឡៃ» «ម៉ែក្មេកចេញពីក្នុងព្រះច័ន្ទ » «ព្រហ្មលិខិតដុះស្លាប» «ទឹកភ្នែកពណ៌ភ្លើង» «វិញ្ញាណឃ្លានស្រឡាញ់» «ល្បែងស្នេហ៍ល្បិចសិង្ហ» និងរឿង «កែវបាបកែវបុណ្យ» ៕