សិល្បៈជាតិ ៖ សារព័ត៌មានត្រយងទទួលបានដំណឹងនាពេលមុននេះបន្តិចឱ្យដឹងថា កញ្ញា យ៉េយ៉េ មានទុក្ខក្រៀមក្រំយ៉ាងខ្លាំង ខណៈបានបាត់បង់ក្មួយស្រីជាទីស្រឡាញ់ ហើយកំពុងរៀបចំពិធីបុណ្យសពនៅឯខេត្តតាកែវ។ ក្មួយស្រីរបស់តារាកំប្លែងរូបនេះបានបាត់បង់ជីវិតបន្ទាប់ពីជួបគ្រោះថ្នាក់ចរាចរណ៍កាលពីថ្ងៃទី ៣ ខែកុម្ភៈ ឆ្នាំ ២០២៣។
កញ្ញា យ៉េយ៉េ បានរៀបរាប់ប្រាប់មហាជនដែល Comment សួរនៅលើហ្វេសប៊ុកនាងថា ក្មួយស្រីរបស់នាងបានជិះម៉ូតូហើយប៉ះគ្នាជាមួយរថយន្តកុងតឺណ័រ បណ្ដាលឱ្យរងរបួសមួយចំហៀងខ្លួនយ៉ាងដំណំ រីឯសភាពម៉ូតូនៅពីក្រោមកង់រថយន្តកុងតឺណ័រ។ ក្រោយកើតហេតុ ក្មួយស្រីរបស់នាងក៏ត្រូវបញ្ចូនទៅសង្គ្រោះ និងវះកាត់នៅក្នុងមន្ទីរពេទ្យលោកសង្ឃ។ សភាពរបស់ក្មួយស្រីត្រូវឈាម ដើម្បីសង្គ្រោះក្នុងការវះកាត់។
តាមការបង្ហោះរបស់កញ្ញា យ៉េយ៉េ គេឃើញមានមិត្តអ្នកសិល្បករ និងអ្នកលេងបណ្ដាញសង្គមមួយចំនួនតូចបានចូលរួមបរិច្ចាគឈាមជួយដល់ក្មួយស្រីរបស់កញ្ញាដែរ។ តែជាអកុសល នៅរសៀលថ្ងៃនេះ ក៏ស្រាប់តែឃើញមានការបង្ហោះដំណឹងថា ក្មួយស្រីកញ្ញា យ៉េយ៉េ បានលាចាកលោកនេះហើយ និងបានតម្កល់សពធ្វើបុណ្យតាមប្រពៃណីនៅឯខេត្ត តាកែវ។
ជាមួយគ្នានោះដែរ គេឃើញមានតារាសិល្បៈជាច្រើនរូបបានប្រមូលគ្នាដូចជា អ្នកនាង ឆៃ លីដាឡែន អ្នកនាង គីម លីហ្សា លោក សាយ សៀរ៉ា លោក ម៉ា ដូណា លោក អ៊ឹម ជីវ៉ា និងសិល្បករដទៃទៀត នាំគ្នាចូលរួមជាថវិកាជូនទៅ កញ្ញា យ៉េយ៉េ ដើម្បីចាត់ចែងរៀបចំបុណ្យសពឱ្យក្មួយស្រីផងដែរ។ សូមបួងសួងសូមឱ្យវិញ្ញាណក្ខន្ធក្មួយស្រីកញ្ញា យ៉េយ៉េ ទៅកាន់សុគតិភព៕
