សិល្បៈជាតិ៖ ចម្រៀងយីកេរឿង «ម៉ាក់ថឺង» ដែលលើកមកសម្ដែងជាថ្មីដោយស្រីស្អាត ល្អហួស និងតួប្រុស វ៉ាន់ ដាវីត កំពុងទទួលការចាប់អារម្មណ៍ខ្លាំងនៅលើបណ្ដាញសង្គមហ្វេសប៊ុក។ បើទោះបីជាមិនទាន់បង្ហាញសមិទ្ធផលវីដេអូសម្ដែងទាំងស្រុង តែអ្នកគាំទ្រលាន់មាត់សរសើរថា អ្នកទាំងសមគ្នាឥតទាស់ក្នុងការសម្ដែងមួយរឿងនេះ។
រហូតមកទល់ពេលនេះ គឺមានការបង្ហាញឱ្យមហាជនបានទស្សនាបានឃើញត្រឹមតែរូបភាពជាច្រើនសន្លឹកដែលស្ដែងពីសកម្មភាពពីក្រោយឆាកនៃការថតបទចម្រៀងក្នុងយីកេរឿង «ម៉ាក់ថឺង» និងវីដេអូខ្លីៗខ្លះៗទៀតនៃបទចម្រៀង « ម៉ាក់ថឺងលក់ប្រេងម្សៅ»។ ប៉ុន្តែ លួហួស បានឆក់យកបេះដូងមហាជនតាមរយៈការតុបតែងខ្លួន តួឯកស្រី មឺយជឺយ ដែលកំពុងទាមទារយុត្តិធម៌សម្រាប់ខ្លួនឯងនៅមុខស្ដេចត្រាញ់។
សូមជម្រាបថា យីកេរឿង «ម៉ាក់ថឺង»គឺតំណាលអំពីបុរសចំណាស់វ័យ៥០ឆ្នាំឈ្មោះ ម៉ាក់ថឺង បានរៀបការជាមួយប្រពន្ធក្មេងខ្ចីវ័យ១៨ឆ្នាំឈ្មោះនាង មឺយជឺយ ។ អ្នកទាំងពីរប្តីប្រពន្ធបានប្រកបរបរជាអ្នកលក់ដូរគ្រឿងក្រអូប និងម្សៅលាប តែមានពេលមួយប្រពន្ធរបស់តា ម៉ាក់ថឺង ត្រូវបានបុត្រាស្តេចត្រាញ់ចាប់ទៅធ្វើជាមហេសី។ ឮដំណឹងថាប្រពន្ធខ្លួនត្រូវ ព្យាណយ ចាប់ហើយនោះ ម៉ាក់ថឺង បានទៅជួបស្ដេចត្រាញ់ដើម្បីទាមទារយកប្រពន្ធមកវិញទោះដឹង ថា ខ្លួននឹងទទួលរងគ្រោះថ្នាក់ក៏ដោយ។ តែផ្ទុយទៅវិញប្រពន្ធរបស់គាត់មិនមានសេចក្ដីក្លាហានសម្ដែងការ ពិតនៅចំពោះមុខស្ដេចត្រាញ់នោះឡើយ ថានាងគឺជាប្រពន្ធរបស់គាត់ ព្រោះមានការចាក់គំរាមពី ព្រះបុត្រាព្យាណយ។ ដូច្នេះហើយ ស្ដេចត្រាញ់មិនជឿលើការអះអាងរបស់តាម៉ាក់ថឺងនោះទេ ដោយចោទថាគាត់និយាយកុហក រហូតដល់បញ្ជាឱ្យគេដាក់ទោសដល់តា ម៉ាក់ថឺង ទៀតផង។ ខណៈពេលនោះដែរ តុលាការក៏បានដោះស្រាយរឿងវិវាទនេះ តាមរយៈការឱ្យតាម៉ាក់ថឺង មឺយជឺយ និងព្រះបុត្រា ព្យាណយ សែងស្គរជ័យ។ ជាអកុសល ចុងក្រោយការពិតត្រូវបានលាតត្រដាង ហើយយុត្តិធម៌ពិតជាមានពិតសម្រាប់រាស្ត្រស្លូតត្រង់ ក៏ប៉ុន្តែ មឺយជឺយ បានចាក់ស្លាប់ខ្លួនដើម្បីបញ្ចប់វិវាទនាពេលនោះ។
យ៉ាងណាមិញ យើងនឹងចាំមើលទាំងអស់គ្នាថា តើការសម្ដែងរបស់ប្អូនស្រី ល្អហួស និងលោក វ៉ាន់ ដាវីត រួមទាំងតារាកិត្តិយសផ្សេងទៀត មានភាពទាក់ទាញកម្រិតណានោះ កុំភ្លេចរង់ចាំទស្សនាទាំងអស់គ្នា។
