សិល្បៈជាតិ៖ យោងតាមព្រះរាជក្រឹត្យត្រាស់បង្គាប់ដោយព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានផ្ដល់គោរមងារថ្នាក់ជាតិជូនដល់ព្រឹទ្ធាចារ្យចំនួន៩រូប។
ព្រឹទ្ធាចារ្យទាំង៩រូប ដែលទទួលបានគោរមងារ «មត៌កមនុស្សរស់» មានដូចខាងក្រោម
១.ព្រឹទ្ធាចារ្យសិល្បៈ គិន យិន ជំនាញល្ខោនបុរាណវត្តកៀនស្វាយក្រៅ ទទួលបានគោរមងារ គរុនាដកា គិន យិន ។ ព្រឹទ្ធាចារ្យកើតនៅថ្ងៃទី១៥ មិថុនា ឆ្នាំ១៩៣២ នៅភូមិទួលក្របៅ ឃុំគគីរ ស្រុកកៀនស្វាយ ខេត្តកណ្ដាល។ ព្រឹទ្ធាចារ្យជាគ្រូតួអង្គយក្សក្នុងក្រុមល្ខោនបុរាណវត្តកៀនស្វាយក្រៅ ក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្ដាល
២.ព្រឹទ្ធាចារ្យ ជា យុទ្ធា ជំនាញចម្លាក់ប្រាក់ ទទួលបានគោរមងារ ទេពហត្ថកោស្យ ជា យុទ្ធា។ ព្រឹទ្ធាចារ្យកើតនៅថ្ងៃទី១៩ មេសា ឆ្នាំ១៩៥៤ នៅភូមិសាលាកាត់សក់ ឃុំវិហារហ្លួង ស្រុកពញាឮ ខេត្តកណ្ដាល។ ព្រឹទ្ធាចារ្យជាគ្រូនិងជាងចម្លាក់ប្រាក់និងស្ពាន់នៅ ភូមិសាលាកាត់សក់ ឃុំវិហារហ្លួង ស្រុកពញាឮ ខេត្តកណ្ដាល។
៣. ព្រឹទ្ធាចារ្យសិល្បៈ ជៀន សុផាន ជំនាញល្ខោនស្រមោលស្បែកធំ ទទួលបានគោរមងារ ធម្មការភិរក្ស ជៀន សុផាន។ ព្រឹទ្ធាចារ្យកើតនៅថ្ងៃទី១០ សីហា ឆ្នាំ១៩៧៨ នៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។ ព្រឹទ្ធាចារ្យគឺជាគ្រូពំនោល ជើតស្បែក ឆ្លាក់ស្បែក និងជាប្រធានក្រុមល្ខោនស្បែកធំ លោកតា ទី ជៀន ក្នុងភូមិសាលា កន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។
៤.ព្រឹទ្ធាចារ្យសិល្បៈ ញុច ហឿន ជំនាញតន្ត្រីជនជាតិដើមភាគតិច ទទួលបានគោរមងារ ពិភត្តិតន្តី ញុច ហឿន។ ព្រឹទ្ធចារ្យកើតនៅថ្ងៃទី៣ ធ្នូ ឆ្នាំ១៩៥៥ នៅភូមិតងប្លេង ឃុំអូរជ្រៅ ស្រុកអូរជ្រៅ ខេត្តរតនគិរី។ ព្រឹទ្ធាចារ្យគឺជាព្រឹទ្ធចារ្យសិល្បៈថ្នាក់ឧបករណ៍ម៉ឺមប្រចាំខេត្តរតនគិរី និងជាគ្រូបង្ហាត់ភ្លេងជនជាតិដើមភាគតិច ជាអ្នកធ្វើឧបករណ៍និងជាប្រធានក្រុមសិល្បៈប្រចាំភូមិណងឡិៈ ឃុំអូរជ្រៅ ស្រុកអូរជ្រៅ ខេត្តរតនគិរី។
៥. ព្រឹទ្ធាចារ្យសិល្បៈ ណាន សាម័យ ជំនាញរបាំជនជាតិដើមភាគតិច ទទួលបានគោរមងារ នាដកីនិម្មិត។ ព្រឹទ្ធាចារ្យកើតនៅថ្ងៃទី៥ ឧសភា ឆ្នាំ១៩៦៣ នៅភូមិពូតាំង ឃុំរមនា ក្រុងសែនមនោរម្យ ខេត្តមណ្ឌលគិរី។ ព្រឹទ្ធចារ្យគឺជាគ្រូបង្ហាត់របាំជនជាតិ អ្នកចម្រៀង អ្នកបង្កើតទំនុកច្រៀង និងរបាំ អ្នកលេងឧបករណ៍ឃ្មោះ៦ និងជាប្រធានសហគមន៍សិល្បៈ នៅភូមិពូតាំង ឃុំរមនា ក្រុងសែនមនោរម្យ ខេត្តមណ្ឌលគិរី។
៦.ព្រឹទ្ធចារ្យ ប៊ិន វិន ជំនាញអាចារ្យពិធីចូលម្លប់ ទទួលបានគោរមងារ បោរាណាចារ្យ។ ព្រឹទ្ធចារ្យកើតនៅថ្ងៃទី១០ សីហា ឆ្នាំ១៩៣៦ នៅភូមិចាន់ ឃុំតាំងក្រសាំង ស្រុកបាធាយ ខេត្តកំពង់ចាម។ ព្រឹទ្ធចារ្យគឺជាគ្រូកិច្ចពិធីចូលម្លប់និងចេញម្លប់ អ្នកផ្លូវចៅមហា អាចារ្យពេលា ភ្លេងអារក្ស ភ្លេងការ នៅភូមិចាន់ ឃុំតាំងក្រសាំង ស្រុកបាធាយ ខេត្តកំពង់ចាម។
៧. ព្រឹទ្ធាចារ្យ ម៉ក់ ជាង ជំនាញតម្បាញហូលពិដាន ទទួលបានគោរមងារ ទេពសោភ័ណ ម៉ក់ ជាង។ ព្រឹទ្ធចារ្យកើតនៅថ្ងៃទី១០ មេសា ឆ្នាំ១៩៥១ នៅភូមិក្ប៉ម ឃុំក្ដាញ់ ស្រុកព្រៃកប្បាស ខេត្តតាកែវ។ ព្រឹទ្ធចារ្យគឺជាគ្រូតម្បាញហូលពិដាន និងសំពត់សូត្រ នៅភូមិក្ប៉ម ឃុំក្ដាញ់ ស្រុកព្រៃកប្បាស ខេត្តតាកែវ។
៨. ព្រឹទ្ធចារ្យសិល្បៈ ឯល ពេជ ជំនាញចាប៉ីដងវែង ទទួលបានគោរមងារ ទេពវោហារ ឯល ពេជ។ ព្រឹទ្ធចារ្យកើតនៅថ្ងៃទី១០ មិថុនា ឆ្នាំ១៩៣៩ នៅភូមិព្រៃសំណាង ឃុំខ្ជាយ ស្រុកទូកមាស ខេត្តកំពត។ ព្រឹទ្ធាចារ្យគឺជាគ្រូបង្ហាត់និងសិល្បករចាប៉ីដងវែង នៅភូមិរហាលទិល ឃុំត្រឡូង ស្រុកបាកាន ខេត្តពោធិ៍សាត់។
៩.ព្រឹទ្ធចារ្យ អ៊ឹម ស្រួន ជំនាញល្ខោនខោលវត្តស្វាយអណ្ដែតទទួលបានគោរមងារ មហានាដកគរុវិជ្ជា។ ព្រឹទ្ធាចារ្យកើតនៅថ្ងៃទី២ មីនា ១៩៤៣ នៅភូមិតាស្គរ ឃុំសារិកាកែវ ស្រុកល្វាឯម ខេត្តកណ្ដាល។ ព្រឹទ្ធាចារ្យគឺជាគ្រូយក្ស ដឹកនាំរឿង និងជាអនុប្រធានគណៈកម្មការគ្រប់គ្រងក្រុមល្ខោនខោលវត្តស្វាយអណ្ដែត ក្នុងភូមិតាស្ដរ ឃុំសារិកាកែវ និងភូមិពាមតាឯក ឃុំពាមឧកញ៉ាអុង ស្រុកល្វាឯម ខេត្តកណ្ដាល។
