កាលពីថ្ងៃទី១៤ ខែកុម្ភ: ឆ្នាំ២០២៣ កីឡាករ Jakub Jankto ខ្សែបម្រើរបស់ក្លិប Getafe និងក្រុមជម្រើសជាតិសាធារណរដ្ឋឆេក បានចេញមុខប្រកាសជាសាធារណៈតាមរយ: Sky Sports ថាខ្លួនស្រលាញ់ប្រុសដូចគ្នា ទោះបីរូបគេធ្លាប់មានសង្សាជាមនុស្សស្រី និងមានកូនប្រុសម្នាក់ក៏ដោយ។
កីឡាករ Jakub Jankto បានប្រកាសដូច្នេះថា៖«ដូចអ្នកដទៃដែរ ខ្ញុំមានចំណុចខ្លាំង ខ្ញុំមានចំណុចខ្សោយ ខ្ញុំមានគ្រួសារ ខ្ញុំមានមិត្តភក្តិរបស់ខ្ញុំ។ ខ្ញុំមានការងារមួយដែលខ្ញុំបានធ្វើអស់ពីសមត្ថភាពអស់រយៈពេលជាច្រើនឆ្នាំដោយភាពស្មោះត្រង់ វិជ្ជាជីវៈ និងចំណង់ចំណូលចិត្ត។ ដូចមនុស្សគ្រប់រូបដែរ ខ្ញុំក៏ចង់រស់នៅក្នុងជីវិតរបស់ខ្ញុំដោយសេរីភាព ដោយគ្មានការភ័យខ្លាច គ្មានការរើសអើង គ្មានអំពើហិង្សា ប៉ុន្តែដោយក្តីស្រឡាញ់។ ខ្ញុំស្រឡាញ់ភេទដូចគ្នា ហើយខ្ញុំលែងចង់លាក់បាំងទៀតឡើយ»។
Czech Republic international Jakub Jankto has publicly come out as gay in a social media statement. pic.twitter.com/cAjnpfDvuL
— Sky Sports News (@SkySportsNews) February 13, 2023
នេះមិនមែនជាលើកទី១នោះទេ ដោយកាលពីថ្ងៃទី២៧ ខែតុលា ឆ្នាំ២០២២ ខ្សែបម្រើ Josh Cavallo របស់ក្រុម Adelaide United នៃក្របខណ្ឌលីគកំពូល A-League ប្រទេសអូស្ត្រាលី បានចេញមុខសារភាពប្រកាសជាសាធារណៈថាខ្លួនជាភេទទី៣ស្រលាញ់ភេទបុរសដូចគ្នាលើបណ្តាញសង្គម Twitter។
គួរដឹងថាកីឡាករ Josh Cavallo គឺជាកីឡាករបាល់ទាត់ផ្នែកបុរសដំបូងគេបង្អស់ក្នុងប្រវត្តិសាស្រ្តដែលហ៊ានចេញមុខប្រកាសជាសាធារណៈថាគាត់គឺជាមនុស្សភេទទី៣ ដែលស្រលាញ់ភេទដូចគ្នា។
យ៉ាងណាមិញ Cavallo បានទទួលសារគាំទ្រជាច្រើននៅលើប្រព័ន្ធផ្សព្វផ្សាយសង្គម Twitter ពីក្លិបបាល់ទាត់លំដាប់កំពូលផ្សេងទៀតរួមទាំង FC Barcelona, Man United និង Juventus ជាដើម៕