វៀតណាម កំណត់គោលដៅដណ្ដើមមេដាយមាស នៅព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ យ៉ាងហោចណាស់ចំនួនបានចំនួន ១០០គ្រឿង និងបញ្ចប់ នៅក្នុងចំណាត់ថ្នាក់កំពូលទាំង៣។
លោក Hoang Dao Cuong អនុរដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម បានស្នើឱ្យថ្នាក់ដឹកនាំកីឡាជំរុញការរៀបចំ និងកម្មវិធីហ្វឹកហាត់ ដើម្បីបង្កើត លក្ខខណ្ឌល្អបំផុតសម្រាប់អត្តពលិកក្នុងព្រឹត្តិការណ៍កីឡា។ ខណៈពេលដែលគោលដៅនេះ វាគ្រាន់តែជាចំនួនពាក់កណ្តាល នៅក្នុងព្រឹត្តិការណ៍កីឡាស៊ីហ្គេម លើកទី៣១ នៅទីក្រុងហាណូយ កាលពីខែឧសភាកន្លងទៅ ដោយសារតែចំនួនប្រភេទកីឡាដែលវៀតណាម មានសក្ដានុពលដូចជា បាញ់កាំភ្លើង, ជិះទូកកាណូ, គូរ៉ាស (Kurash) និងកីឡាកាយវប្បកម្មពុំត្រូវបានដាក់បញ្ចូលទៅក្នុងព្រឹត្តិការណ៍ស៊ីហ្គេម នៅកម្ពុជាឡើយ។
លោក Dang Ha Viet នាយករដ្ឋបាលកីឡាវៀតណាម បានថ្លែងថា៖«យើងស្ថិតនៅក្រោមសម្ពាធខ្ពស់នៅមុនស៊ីហ្គេម លើកទី៣២ ពីព្រោះយើងធ្វើបានល្អក្នុងព្រឹត្តិការណ៍កីឡាស៊ីហ្គេម លើកទី៣១ ដោយទទួលបានមេដាយមាស ចំនួន ២០៥គ្រឿង និងតំណែងកំពូលតារាង»។
លោកបញ្ជាក់ថា៖ «យើងបានរៀបចំយ៉ាងល្អ សម្រាប់ការប្រកួតស៊ីហ្គេម នៅលើទឹកដីខ្លួនឯង ហើយរីករាយនឹងគុណសម្បត្តិនេះ រួមជាមួយនឹងលក្ខខណ្ឌដ៏ងាយស្រួលផ្សេងទៀត ដែលល្អជាងការប្រកួតនាពេលខាងមុខ។ ក្នុងពេលជាមួយគ្នានេះ កម្ពុជាបានបញ្ចេញច្បាប់ ដែលកាត់បន្ថយប្រភេទកីឡាខ្លាំងៗរបស់យើង និងកាត់បន្ថយវិញ្ញាសាជាច្រើន។ វានាំទៅរកគម្លាតសមិទ្ធិផលដ៏ធំមួយរវាងហ្គេមទាំង២ សម្រាប់ក្រុមវៀតណាម»។
លោក Tran Duc Phan នាយករងរដ្ឋបាលកីឡាវៀតណាម បានឱ្យដឹងថា៖ «បច្ចុប្បន្ន អត្តពលិកទាំងអស់ត្រូវបានកោះហៅសម្រាប់កម្មវិធីហ្វឹកហាត់យ៉ាងខ្លាំងក្នុងស្រុក។ មួយចំនួនបាននឹងកំពុងមានការហ្វឹកហាត់ក្រៅប្រទេស នៅមុនការប្រកួតកីឡានេះ។ លោកបានបន្តថា យើងជាក្រុមខ្លាំងនៅក្នុងតំបន់ ហើយជាមួយនឹងកម្លាំងពិតប្រាកដរបស់យើង គឺយើងពិតជាអាចរក្សាតំណែងកំពូលទាំង៣ របស់យើងបាន»។
ព្រឹត្តិការណ៍ប្រចាំតំបន់អាស៊ីដ៏ធំធ្វើនៅកម្ពុជា គឺការប្រកួតកីឡាអាស៊ីអាគ្នេយ៍ លើកទី៣២ (32nd SEA Games) នឹងចាប់ផ្ដើមពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕
