គម្រោងនៃការរត់ភ្លើងគប់ព្រឹត្តិការណ៍ស៊ីហ្គេមលើកទិ៣២ នៅកម្ពុជា នឹងត្រូវចេញដំណើរពីភ្នំពេញ តាមផ្លូវជាតិលេខ៥ ដោយឆ្លងកាត់ខេត្តកំពង់ស្ពឺ កំពង់ឆ្នាំង ពោធិ៍សាត់ សៀមរាប បាត់ដំបង និងខេត្តបន្ទាយមានជ័យ រួចឆ្លងចូលទៅខេត្តកំពង់ធំ និងបន្តទៅខេត្តកំពង់ចាម ឆ្លងមកខេត្តកណ្តាលវិញ និងចុងក្រោយចូលទៅក្នុងពហុកីឡដ្ឋានជាតិតែម្តង។
នេះជាការលើកឡើងរបស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC-CAMAPGOC ក្នុងកិច្ចប្រជុំត្រួតពិនិត្យការងារដំណើរការរៀបចំពិធីរត់ភ្លើងគប់កីឡាជុំវិញបឹងទន្លេសាប កាលពីថ្ងៃទី១៦ ខែកុម្ភៈ ឆ្នាំ២០២៣។
ឯកឧត្តម វ៉ាត់ ចំរើន បានពន្យល់ថា៖ «ខេត្ត គាត់ត្រូវរៀបចំធនធានមនុស្ស ដែលត្រូវធ្វើការរៀបចំដង្ហែ និងរត់ភ្លើងគប់។ ការដង្ហែ និងរត់ភ្លើងគប់ នៅខេត្តនីមួយៗ ដែលត្រូវឆ្លងកាត់ជុំវិញបឹងទន្លេសាប ត្រូវមានការចូលរួមរត់ ទាំងថ្នាក់ដឹកនាំខេត្ត និងកីឡាករ កីឡាការិនីឆ្នើម ទាំងពិការ និងមិនពិការជាដើម ព្រោះការចូលរួមរត់ភ្លើងគប់នេះ គឺជានិមិត្តរូប នៃការចូលរួមព្រឹត្តិការណ៍ និងជាកំណត់ត្រាប្រវត្តិសាស្ដ្រមួយរបស់ពួកគាត់»។
ក្រៅពីនេះ ពួកគាត់ក៏ត្រូវរៀបចំ និងបំផុសមហាជនមកអបអរសាទរ ក៏ដូចជារៀបចំវេទិកា ដើម្បីទទួលបដិសណ្ឋារកិច្ច ក្នុងការទទួល និងបន្ដរត់ ក៏ដូចជាការរៀបចំកន្លែងរក្សាភ្លើងគប់ឱ្យបានត្រឹមត្រូវផងដែរ។
ឯកឧត្តមអគ្គលេខាធិការគណៈកម្មាធិការជាតិ CAMSOC-CAMAPGOC មានប្រសាសន៍ពីកិច្ចប្រជុំនេះ បានផ្ដោតសំខាន់លើការងារត្រៀមប្រតិបត្តិ បន្ទាប់ពីផែនការ វិធីសាស្ដ្ររៀបចំ និងគោលការណ៍ផ្សេងៗ ត្រូវបានរៀបចំរួចរាល់។ ដូច្នេះការជួបជុំខាងលើ គឺដើម្បីបែងចែកតួនាទីភារកិច្ចឱ្យបានច្បាស់លាស់ រវាងគណៈកម្មការជំនាញ និង CAMSOC ថាធ្វើអ្វីខ្លះ? ហើយខេត្ដពាក់ព័ន្ធត្រូវធ្វើអ្វីខ្លះ?
គួរបញ្ជាក់ថា ការរត់ភ្លើងគប់នេះ គឺមានអត្ថន័យជ្រាលជ្រៅណាស់ ដើម្បីបំភ្លឺ និងបង្ហាញពីសាមគ្គីភាព សន្ដិភាព ទាំងក្នុងប្រទេស និងតំបន់ ជាពិសេសការរត់ជុំវិញបឹងទន្លេសាប ដែលជាបេះដូង នៃព្រះរាជាណាចក្រកម្ពុជានេះតែម្ដង៕