សហភាពសហព័ន្ធយុវជនកម្ពុជាខេត្តបាត់ដំបង សហការជាមួយរដ្ឋបាលខេត្តបាត់ដំបង បានរៀបចំកម្មវិធីម៉ារ៉ាតុងបាត់ដំបងលើកទី៥ ចម្ងាយ៥គីឡូម៉ែត្រ កាលពីព្រឹកថ្ងៃទី១២ ខែមីនា ឆ្នាំ២០២៣ នៅមុខអគារសាលាខេត្តចាស់ ក្រុងបាត់ដំបង ខេត្តបាត់ដំបង។
ឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបង បានលើកឡើងថា៖ «ព្រឹត្តិការណ៍ម៉ារ៉ាតុងដែលមានអ្នកចូលរួមប្រមាណជាង ២ពាន់នាក់ធ្វើឡើងក្នុងគោលបំណងអបអរសាទរសង្ក្រាន្តបាត់ដំបង ២០២៣នាពេលខាងមុខ ក៏ដូចជាការចូលរួមចំណែក លើកកម្ពស់វិស័យកីឡាឲ្យកាន់តែរីកចម្រើន ស្របពេលដែលព្រះរាជាណាចក្រកម្ពុជា ធ្វើជាម្ចាស់ផ្ទះ រៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ក្រោមពាក្យស្លោក ‘‘កីឡារស់នៅក្នុងសន្តិភាព’’»។
លោក ធូ ភា អភិបាលរងខេត្តបាត់ដំបង បានលើកឡើងថា៖ ការរៀបព្រឹត្តិការណ៍ម៉ារ៉ាតុងនេះដើម្បីជាការលើកទឹកចិត្តដល់យុវជនឱ្យចូលរួមលេងកីឡា ចៀសឆ្ងាយពីគ្រឿងញៀន ព្រមទាំងចូលរួមផ្សព្វផ្សាយពីសក្ដានុពលវិស័យវប្បធម៌ និងទេសចរណ៍នៅក្នុងខេត្តបាត់ដំបង សំដៅទាក់ទាញភ្ញៀវជាតិ អន្តរជាតិដែលមកស្នាក់នៅកម្សាន្តសប្បាយនៅខេត្តបាត់ដំបង ឱ្យកាន់តែច្រើនឡើងបន្ថែមទៀត។
ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា បានមានប្រសាសន៍ថា៖«កម្មវិធីម៉ារ៉ាតុងបាត់ដំបងធ្វើឡើងក្នុងគោលបំណងធំបំផុតក្នុងការផ្សព្វផ្សាយពីកីឡាដែលសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាបានលើកឡើងហើយគឺក្នុងមនុស្សម្នាក់ត្រូវហាត់កីឡាយ៉ាងតិចឱ្យបានមួយប្រភេទនៅក្នុងជីវិតរបស់ខ្លួន។ ឯកឧត្តម បានលើកទឹកចិត្តដល់ប្រជាពលរដ្ឋឱ្យចូលរួមលេងកីឡាទាំងអស់គ្នាដើម្បីពង្រឹងសុខភាព និងបង្កើនអាយុ»។
ឯកឧត្តម ស សុខា បានថ្លែងបញ្ជាក់បន្ថែមថា រាជរដ្ឋាភិបាលកម្ពុជានឹងធ្វើជាម្ចាស់ផ្ទះ រៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលជាព្រឹត្តិការណ៍កីឡាដ៏សំខាន់ និងចូលរួមចំណែកផ្ដល់ភាពកក់ក្ដៅជូនដល់កីឡាករ កីឡាការិនីជនពិការដែលការរស់នៅក្នុងសង្គមត្រូវជួយថែទាំគ្នាទៅវិញទៅមកក្នុងរង្វង់ក្រុមគ្រួសារខ្មែរដូចគ្នា៕
