សហព័ន្ធកីឡាបាល់ទាត់លើតុកម្ពុជា បានរៀបចំវគ្គបណ្តុះបណ្តាលគ្រូកម្រិតមូលដ្ឋាន និងអាជ្ញាកណ្តាលអន្តរជាតិ ត្រៀមស៊ីហ្គេម ឆ្នាំ២០២៣ រយៈពេល៣ថ្ងៃ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដើម្បីពង្រឹងសមត្ថភាពឱ្យកាន់តែល្អប្រសើរ ត្រៀមធ្វើម្ចាស់ផ្ទះ ស៊ីហ្គេម នាខែឧសភា ឆ្នាំ២០២៣។
វគ្គបណ្តុះបណ្តាលនេះ បង្រៀនដោយគ្រូឧទ្ទេស គឺលោក Marton Kereszturt ជាជនជាតិហុងគ្រី ដែលជា ប្រទេសដើមកំណើត នៃប្រភេទកីឡា Teqball នេះតែម្តង។ លោក Marton Kereszturt បានសន្យាថា លោកនឹង ព្យាយាមបង្ហាត់បង្រៀនដល់សិក្ខាកាមកម្ពុជាឱ្យមានការយល់ និងបានដឹងពីលក្ខខណ្ឌ បទបញ្ជាប្រកួត និងប្រវត្តិ នៃប្រភេទកីឡា Teqball នេះឱ្យបានច្បាស់លាស់ ដើម្បីបង្កើនការអភិវឌ្ឍឱ្យបានលឿន នៅក្នុងប្រទេសកម្ពុជា។
លោក Gao Feng អនុប្រធានសហព័ន្ធកីឡាបាល់ទាត់លើតុកម្ពុជាបានថ្លែង នៅក្នុងពិធីបើកវគ្គថា៖«សហព័ន្ធកីឡាបាល់ទាត់លើតុកម្ពុជា គឺជាប្រភេទកីឡាថ្មី ទើបបានដាក់បញ្ចូល ក្នុងព្រឹត្តិការណ៍ ស៊ីហ្គេម នៅកម្ពុជា លើកនេះ ហើយអ្នកទាំងអស់គ្នា នៅទីនេះ ជាសមាជិកដ៏សំខាន់របស់សហព័ន្ធយើង។ យើងត្រូវរួបរួមគ្នាខិតខំសិក្សា និង អភិវឌ្ឍសមត្ថភាព ដើម្បីលើកស្ទួយវិស័យកីឡាបាល់ទាត់លើតុរបស់យើង ឱ្យកាន់តែមានការរីក ចម្រើន ១កម្រិតទៀត»។
លោក អន ចន្ត្រាសំរិត អគ្គលេខាធិការរង សហព័ន្ធកីឡាបាល់ទាត់លើតុកម្ពុជាបានលើកឡើងថា បាល់ទាត់លើតុ គឺជាប្រភេទកីឡាថ្មីមួយ សម្រាប់កម្ពុជា ហើយក៏ថ្មី សម្រាប់ព្រឹត្តិការណ៍កីឡាស៊ីហ្គេម ផងដែរ។ ជាមួយនឹងការបង្កើតថ្មីនូវសហព័ន្ធជំនាញកីឡាមួយនេះ ការបណ្តុះបណ្តាលធនធាន គឺជាការចំបាច់បំផុត ដើម្បីអភិវឌ្ឍធនធានមនុស្ស តាមរយៈការបើកវគ្គបណ្តុះបណ្តាល គ្រូបង្វឹក កម្រិតមូលដ្ឋាន និង អាជ្ញាកណ្តាលអន្តរជាតិ សម្រាប់ត្រៀមទទួលធ្វើម្ចាស់ផ្ទះ ស៊ីហ្គេម លើកទី៣២ នាខែឧសភា ឆ្នាំ២០២៣។
អគ្គលេខាធិការរងរូបនេះ គូសបញ្ជាក់ទៀតថា៖ «ការបើកវគ្គបណ្តុះបណ្តាលនេះ គឺធ្វើយ៉ាងណាឱ្យយើងត្រៀមខ្លួនឱ្យបានមុតមាំ សម្រាប់ការប្រកួត ស៊ីហ្គេម នាខែឧសភា ខាងមុខ។ តាមរយៈការសិក្សា និងអនុវត្តផ្ទាល់ជាមួយ គ្រូឧទ្ទេសមកពីប្រទេសដើម នៃកីឡា Teqball នេះ យើងរំពឹងថា សិក្ខាកាមកម្ពុជា នឹងទទួលបានទាំងចំណេះ និង ជំនាញដ៏ពិតប្រាកដមួយ សម្រាប់យកទៅអនុវត្ត នៅពេលយើងធ្វើម្ចាស់ផ្ទះ ក្នុងព្រឹត្តិការណ៍ ស៊ីហ្គេម ខាងមុខនេះ»។
លោក អន ចន្ត្រាសំរិត បានបញ្ជាក់ថា ៖«កីឡា Teqball មានការប្រកួតប្រជែង ដូចប្រភេទកីឡាផ្សេងៗ ដែរ គ្រាន់តែមេដាយ ដែលយើងដណ្តើមបានមិនរាប់បញ្ចូល ក្នុងបញ្ជីផ្លូវការនៃស៊ីហ្គេម នោះទេ។ ទោះបែបនេះក្តី ក៏កីឡាករ កីឡាការិនីរបស់យើងមានទឹកចិត្តមុតមាំ និងឆន្ទៈពិតប្រាកដ ក្នុងការបង្ហាញសមត្ថភាព ក្នុងព្រឹត្តិការណ៍នេះ ឱ្យបានល្អ ព្រោះបន្ទាប់ពីបង្ហាញវត្តមានជាលើកដំបូង ក្នុងព្រឹត្តិការណ៍ ស៊ីហ្គេម នេះហើយ គឺ កីឡា Teqball នឹងត្រូវដាក់ឱ្យប្រកួតជាផ្លូវការ ក្នុងស៊ីហ្គេម ឆ្នាំ២០២៥ តែម្តង»។
សូមបញ្ជាក់ថា Teqball ជាប្រភេទកីឡាមួយ ក្នុងចំណោមប្រភេទកីឡាទាំង៣៧ ដែលត្រូវបានដាក់ឱ្យ ប្រកួត ក្នុងព្រឹត្តិការណ៍ ស៊ីហ្គេម ឆ្នាំ២០២៣។ ប៉ុន្តែការប្រកួត កីឡា Teqball មិនត្រូវបានដាក់បញ្ចូលជាមេដាយផ្លូវការ ក្នុង ស៊ីហ្គេម នោះទេ ពោលគឺ គ្រាន់តែជាការប្រកួតមិត្តភាពធម្មតា រវាងប្រទេសចូលរួម ចំនួន ៧ រួមមាន ម្ចាស់ផ្ទះ កម្ពុជា ហ្វីលីពីន ប្រ៊ុយណេ សិង្ហបុរី ឥណ្ឌូនេស៊ី ម៉ាឡេស៊ី និងថៃ៕