សហព័ន្ធកីឡាបាល់ទាត់កម្ពុជា បានប្រកាសជាផ្លូវការនៅថ្ងៃទី២៩ ខែមីនា ឆ្នាំ២០២៣ នេះដោយគណ:កម្មការរៀបចំការប្រកួតកីឡាអាស៊ីអាគ្នេយ៍ បានអនុញ្ញាតជូនសហព័ន្ធកីឡាបាល់ទាត់កម្ពុជា ឲ្យប្រើប្រាស់ឯកសណ្ឋានកីឡារបស់សហព័ន្ធផ្ទាល់ ក្នុងការប្រកួតកីឡាស៊ីហ្គេមលើកទី៣២ ឆ្នាំ២០២៣។
ហេតុដូច្នេះ ក្នុងការប្រកួតវិញ្ញាសារបាល់ទាត់ ក្រុមជម្រើសជាតិកម្ពុជាទាំង២ក្រុម ពោលគឺក្រុមបុរស និងក្រុមនារី នឹងប្រើប្រាស់ឯកសណ្ឋានដែលផលិត និងផ្គត់ផ្គង់ដោយក្រុមហ៊ុន Varaman នៃ Collection ២០២២-២០២៤ ដែលកំពុងប្រើប្រាស់ក្នុងពេលបច្ចុប្បន្ននេះ រួមមានដូចជា ឯកសណ្ឋានធ្វើដំណើរ ឯកសណ្ឋានហ្វឹកហាត់ និងឯកសណ្ឋានការប្រកួត។
VARAMAN (វរ្ម័ន) គឺជាម៉ាកក្នុងស្រុកថ្មី បង្កើតឡើងជាមួយគោលបំណង ចង់ឱ្យក្រុមជម្រើសជាតិកម្ពុជាប្រើប្រាស់ឯកសណ្ឋានដែលរចនា និងផលិតនៅក្នុងព្រះរាជាណាចក្រកម្ពុជា ជាផលិតផលដែលផលិតដោយដៃបងប្អូនខ្មែរយើងផ្ទាល់ ដើម្បីប្រើប្រាស់ក្នុងពេលប្រកួតប្រជែងលើឆាកអន្តរជាតិ។
សហព័ន្ធកីឡាបាល់ទាត់កម្ពុជា បានថ្លែងអំណរយ៉ាងជ្រាលជ្រៅជាទីបំផុតចំពោះ សម្ដេច ពិជ័យ សេនា ទា បាញ់ ឧបនាយករដ្ឋមន្រ្តី រដ្ឋមន្រ្តីការពារជាតិ និងជាប្រធានគណ:កម្មការធិការជាតិ CAMSOC ដែលបានឯកភាពផ្ដល់សិទ្ធិឲ្យសហព័ន្ធបាល់ទាត់ បានប្រើប្រាស់នូវសម្ភារ:ឬ ឯក សណ្ឋានផ្ទាល់ខ្លួន ដែលជាផលិតផលស្នាដៃរបស់ខ្មែរ ដើម្បីបង្ហាញពីអត្តសញ្ញាណជាតិយើង នៅក្នុងព្រឹត្តិការណ៍ប្រវត្តិសាស្រ្ត ដែលកម្ពុជាធ្វើជាម្ចាស់ផ្ទះលើកដំបូង។
សូមរំលឹកថា មុនប្រកាសជាផ្លូវការនេះ កាលពីថ្ងៃទី២៣ ខែមីនា ឆ្នាំ២០២៣ ក្រុមហ៊ុន Varaman (វរ្ម័ន) បានប្រកាសថាក្រុមជម្រើសជាតិកម្ពុជាទាំងក្រុមបាល់ទាត់បុរស និងនារី នឹងប្រើឯកសណ្ឋានផលិតដោយ Varaman (វរ្ម័ន) សម្រាប់ការប្រកួតក្នុងព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ។
នេះបើយោងតាមហេតុផលដូចខាងក្រោម៖
១. សហព័ន្ធកីឡាបាល់ទាត់កម្ពុជា មានកិច្ចព្រមព្រៀងជាមួយ Varaman (វរ្ម័ន) ចាប់ផ្តើមជាផ្លូវការពីខែមិថុនាឆ្នាំ២០២២ រហូតដល់ខែមិថុនាឆ្នាំ២០២៦ ថាសម្រាប់ការឧបត្ថម្ភគ្រប់ឯកសណ្ឋានការប្រកួតការហ្វឹកហាត់និងការធ្វើដំណើរដែលក្រុមបាល់ទាត់ជម្រើសជាតិកម្ពុជាត្រូវការ។
ក្រុមជម្រើសជាតិកម្ពុជាគ្រប់កម្រិតនឹងប្រើប្រាស់ឯកសណ្ឋានផលិតដោយ Varaman (វរ្ម័ន) ក្នុងការប្រកួតការហ្វឹកហាត់ និងការធ្វើដំណើរទាំងអស់ដែលក្រុមបាល់ទាត់ជម្រើសជាតិកម្ពុជាមានក្នុងអំឡុងពេលនៃកិច្ចសន្យា (ភាគីដែលបំពានកិច្ចព្រមព្រៀងនឹងប្រឈមមុខការពិន័យលើការបំពានកិច្ចសន្យា) ។
២. យោងតាមឯកសាររូបភាពខាងក្រោមនេះ ក្រុមបាល់ទាត់ជម្រើសជាតិនៃប្រទេសម្ចាស់ផ្ទះព្រឹត្តិការណ៍ស៊ីហ្គេម ទាំង៤លើកកន្លងមកប្រើឯកសណ្ឋាននៃម៉ាក Brand ដែលឧបត្ថម្ភក្រុមជម្រើសជាតិរបស់ពួកគេ៕
