កំពង់ធំ៖ លោក អ៊ុត វណ្ណរ៉ា អភិបាលស្រុកកំពង់ស្វាយ បានឲ្យដឹងនាព្រឹកមិញថា នៅវេលាម៉ោង០៦:៣០នាទី ល្ងាចថ្ងៃទី២៩ ខែមីនា ឆ្នាំ២០២៣ មានភ្លៀងធ្លាក់បន្តិចបន្តួចលាយឡំ និងខ្យល់កន្រ្តាក់ ធ្វើឲ្យរលំដើមឈើតាមថ្នល់ជាតិលេខ៦២ ចំនួន០៧កន្លែង នៅចន្លោះភូមិវល្លិ៍យាវ ឃុំត្រពាំងប្ញស្សី និងភូមិកូនត្នោត ឃុំជ័យ ស្ថិតក្នុងភូមិសាស្រ្តស្រុកកំពង់ស្វាយ។
ក្រោយពីបានទទួលព័ត៌មានភ្លាមៗ លោកអភិបាលស្រុកកំពង់ស្វាយ និងកម្លាំងអធិការដ្ឋាននគរបាលស្រុក កងរាជអាវុធហត្ថស្រុក មេឃុំ/ភូមិ និងប្រជាការពារចុះកាត់ដើមឈើដែលដួលចេញពីថ្នល់ជាតិ.ដើម្បីសម្រួលចរាចរណ៍ឡើងវិញ។
លោក អ៊ុត វណ្ណរ៉ា អភិបាលស្រុកកំពង់ស្វាយ បញ្ជាក់បន្ថែមថា ដោយឡែកចំពោះរថយន្តកាមេរីមួយគ្រឿងធ្លាក់ពីលើថ្នល់គ្រាន់តែរអិលទេគឺគាត់បើកតិចៗ ក្រោយមកក្រុមការងារដើរធ្វើចរាចរណ៍ សម្រួលឡើងវិញ ក្នុងនោះមិនមានអ្នកទទួលរងរបួស ឬគ្រោះថ្នាក់ដោយសារគ្រោះធម្មជាតិនោះទេ៕
អត្ថបទ៖ កំពង់ធំ
