នៅរសៀលថ្ងៃទី៣១ ខែមីនា ឆ្នាំ២០២៣ សហព័ន្ធកីឡាបាល់ទះកម្ពុជា បានប្រកាសជាផ្លូវការថាក្រុមបាល់ទះជម្រើសជាតិកម្ពុជា នឹងប្រកួតមិត្តភាពអន្តរជាតិទល់នឹងក្រុមដ៏ខ្លាំង និងពោរពេញដោយបទពិសោធន៍ខ្ពស់ នៅប្រទេសចិន ទាំងវិញ្ញាសារបាល់ទះក្នុងសាល និងឆ្នេរខ្សាច់។ ខណ:ការប្រកួត នឹងធ្វើឡើងនៅថ្ងៃទី៥ និងទី៧ ខែមេសា ឆ្នាំ២០២៣ នាពេលខាងមុខ នៅពហុកីឡដ្ឋានជាតិអូឡាំពិក វេលាម៉ោង ១៨:០០នាទីល្ងាច។
យោងតាមលោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានប្រាប់អ្នកសារព័ត៌មានត្រយងថា៖«ពេលត្រឡប់មកពីម៉ាឡេស៊ី វិញក្រុមកម្ពុជា ត្រៀមប្រកួតមិត្តភាពជាមួយក្រុមបាល់ទះមកពីខេត្តសានទុង របស់ចិន នៅថ្ងៃទី៥ និងទី៧ ខែមេសា ឆ្នាំ២០២៣ ខាងមុខ ក្នុងរាជធានីភ្នំពេញ»។
ថ្នាក់ដឹកនាំសហព័ន្ធបានបញ្ជាក់ទៀតថា៖«ក្រុមសាន់ទុង ជាច្រើនល្អមួយនៅប្រទេសចិន ដែលធ្លាប់ឈ្នះពានរង្វាន់ក្នុងស្រុក ហើយបច្ចុប្បន្នគេឈរកំពូលតារាង នៅលីគបាល់ទះចិន»។
បច្ចុប្បន្នក្រុមបាល់ទះជម្រើសជាតិកម្ពុជា កំពុងតែស្ថិតនៅប្រទេសម៉ាឡេស៊ី ដើម្បីចូលរួមប្រកួតពានរង្វាន់បាល់ទះអន្តរជាតិ Tri-Nation Volleyball Cup 2023 ជាមួយក្រុមជម្រើសជាតិម៉ាឡេស៊ីឈុតធំ និងឈុត B ក៏ដូចជាសិង្ហបុរី។
ឆ្លងកាត់២ប្រកួត ឈ្នះ១ ចាញ់១ ខណ:និងនៅថ្ងៃទី៣១ ខែមីនា កម្ពុជា ប៉ះ ក្រុមម៉ាឡេស៊ី B៖
ទំនាក់ទំនងទិញសំបុត្រទស្សនាតាមរយ:៖
– ០១៧ ៦៨៤ ៨៨១
– ០៩៦ ៥៩១ ៦៩៤២
សំបុត្រមាន២ប្រភេទ៖
-ផ្នែកខាងក្រោម តម្លៃ ១០,០០០រៀល
-ផ្នែកខាងលើ តម្លៃ ៨,០០០រៀល។
សូមបញ្ជាក់ថាក្រុមជម្រើសជាតិបាល់ទះកម្ពុជា កំពុងតែត្រៀមខ្លួន និងកម្តៅសាច់ដុំ ដើម្បីឆ្ពោះទៅការប្រកួតជាផ្លូវការ ក្នុងនាមជាម្ចាស់ផ្ទះព្រឹត្តិការណ៍កីឡាស៊ីហ្គេម លើកទី៣២ ដែលធ្វើឡើងលើទីលានបាល់ទះពហុកីឡដ្ឋានជាតិមរតតេជោ ក្នុងរាជធានីភ្នំពេញ ខាងមុខ៕
