លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានមានប្រសាសន៍ នៅក្នុងសន្និសីទសារព័ត៌មានប្រកាសគ្រូបង្គោលថ្មីរបស់ក្រុមជម្រើសជាតិកម្ពុជា ថា៖«ការដឹកនាំរបស់លោក Fekix ពីមុនគឺជាចំណុចដែលយើងយកមកធ្វើជាការពិចារណា។ សមិទ្ធិផលពីមុនរបស់គាត់ បានធ្វើឲ្យយើងមានមោទនភាព ដែលវាជាចំណុចចង់ឲ្យយើងមានមនោសញ្ចេតនាជាមួយគាត់»។
លោកបន្តថា៖ «យើងក៏មានជម្រើសបេកភាពជាច្រើន មកពីខាងក្រៅ ប៉ុន្តែលក្ខខណ្ឌខ្លះមិនទាន់ត្រូវគ្នាជាមួយនឹងបរិបទបាល់ទាត់យើងនៅពេលនេះ។ ដូចច្នេះហើយសហព័ន្ធ និងគណកម្មការប្រតិបត្តិ បានសម្រេចជាឯកច្ឆ័នជ្រើសរើសយកគាត់»។
អគ្គលេខាធិការសហព័ន្ធបន្ថែមថា៖ «មូលហេតុដែលយើងសម្រេចប្រាសពីសមាសភាពគ្រូបង្វឹកថ្មីក្នុងពេលឥឡូវនេះដោយសារយើងមានកម្មវិធីប្រកួតដែលនិងខិតចូលមកដល់ឆាប់ៗនេះ ដែលត្រូវរៀបចំក្រុមជម្រើសជាតិចូលរួម ដូចជាការប្រកួតជម្រុះ FIFA World Cup និថការប្រកួតផ្សេងៗទៀតជាច្រើនទាំងក្នុងអាស៊ាន និងទ្វីបអាស៊ី។ ម្លោះហើយយើងក៏បានចរចារគ្នារួចរាល់ រួមទាំងគ្រូបង្វឹកបច្ចុប្បន្នក៏បានដឹងអំពីកិច្ចការនេះផងដែរ»។
ជុំវិញការប្រកាសនេះដែរលោក Felix Dalmas បានលើកឡើងថា៖ «ខ្ញុំពិតជារីករាយដែលបានត្រឡប់មកវិញ។ ខ្ញុំពិតជានឹករលឹកប្រទេសកម្ពុជា ជាខ្លាំង។ ខ្ញុំចង់អរគុណដល់ លោកអគ្គលេខាធិការ ជាពិសេសប្រធានសហព័ន្ធបាល់ទាត់កម្ពុជា ឯកឧត្តម សៅ សុខា និងអ្នករាល់គ្នា ដែលបានជឿទុកចិត្តលើខ្ញុំ»។
លោកបានបញ្ជាក់បន្ថែមថា៖ «វាពិតជាល្អដែលឃើញលីគបច្ចុប្បន្នមានការអភិវឌ្ឍ។ គ្រូបង្វឹកចាស់និងថ្មី បាននាំមកនូវបទពិសោធន៍ ល្អៗ និងភាពជាកីឡាករអាជីពជូនដល់កីឡាករ។ ខ្ញុំក៏បានឃើញកីឡាករថ្មីៗល្អៗជាច្រើន ចំណែកកីឡាករ ដែលយើងមានពីមុនក៏មានការរីកចម្រើនផងដែរ។ វាពិតជារំភើបដែលឃើញនូវអ្វីទាំងអស់នេះ។ យើងចង់បន្តធ្វើការងារឲ្យបានល្អដូចដែលយើងធ្លាប់ធ្វើពីមុន។ យើងចង់បង្កើតក្រុមមួយដែលតំណាងឲ្យ អ្នកទាំងអស់គ្នា ជាក្រុមមួយដែលអ្នកអាចមានមោទកភាពទៅលើ និងនាំភាពរីករាយពេលដែល មើលយើងប្រកួត។ អ្វីដែលខ្ញុំបានរៀនសូត្រពីអតីតកាលគឺថា គ្មាននរណាម្នាក់អាចធ្វើវាដោយម្នាក់ឯង បាននោះទេ យើងត្រូវការចូលរួមពីអ្នកទាំងអស់គ្នា»។
គួរបញ្ជាក់ថា កាលពីថ្ងៃទី០២ មេសា ឆ្នាំ២០២៣ សហព័ន្ធបាល់ទាត់កម្ពុជា បានប្រកាសតែងតាំងលោក Félix Dalmásជនជាអាហ្សង់ទីន បច្ចុប្បន្នមានវ័យ ៣៥ឆ្នាំ ជាគ្រូបង្គោលថ្មីរបស់ក្រុមជម្រើសជាតិកម្ពុជា ទាំងឈុតធំ និងឈុតU23 ក្រោយចប់ព្រឹត្តិការណ៍ស៊ីហ្គេម នាខែឧសភា ខាងមុខ។ លោក Félix Dalmás ធ្លាប់ដឹកនាំក្រុមជម្រើសជាតិកម្ពុជាចាប់តាំងពីឆ្នាំ២០១៨ ហើយអ្វីដែលអ្នកគាំទ្រកម្ពុជាចងចាំមិនភ្លេចនោះគឺ លោកបានឈរដឹកនាំកូនក្រុមទាំងមានបញ្ហារបួសជើងមិនទាន់វះកាត់ និងជួយក្រុមកម្ពុជាបំបែកប្រវត្តិសាស្រ្តឡើងទៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ ស៊ីហ្គេម ២០១៩ នៅប្រទេសហ្វីលីពីន៕
