សិល្បៈជាតិ៖ ថ្មីៗនេះ ផលិតកម្មថោន បានចេញការប្រកាសជាផ្លូវការនៃការទទួលសមាជិកថ្មី នោះគឺលោក ពេជ្រ រដ្ឋា ដែលជាតារាចម្រៀងរះថ្មី និងទទួលបានការលើកសរសើរពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
គួររំលឹកផងដែរថា តារាចម្រៀងរះថ្មី លោក ពេជ្រ រដ្ឋា បានឆក់យកបេះដូងប្រមុខដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន រហូតដល់សម្តេចតេជោផ្តល់ឱកាសបកស្រាយចម្រៀងមួយបទ នៅជិតវេទិការបស់សម្តេច នៅឯកម្មវិធីនាខេត្តពោធិ៍សាត់។ ហើយតារាចម្រៀងរូបនេះក៏ត្រូវបានសម្ដេចតេជោសរសើរថា ជាតារាប្រុសដែលមានទឹកដមសម្លេងពីរោះរណ្តំ តែឆាកជីវិតពិតរបស់លោក គឺកម្សត់ឥតឧបមា មុនពេលឈានជើងដើរលើវិថីសិល្បៈនេះ។
សូមជម្រាបថា លោក ពេជ្រ រដ្ឋា មានវ័យ ២៤ ឆ្នាំ និងមានឈ្មោះពិត ម៉ាន់ រដ្ឋា គឺជាអតីតកម្មករឆ្លងដែនទៅប្រទេសថៃ ហើយលោកក៏ធ្លាប់ប្រឡងចម្រៀងនៅក្នុងកម្មវិធីកាលពីឆ្នាំ២០១៨ ប៉ុន្តែលោក ពុំទទួលបានជ័យលាភី នោះទេ តែលោកនឹងព្យាយាមតាមចាប់ក្តីស្រម៉ៃ រហូតបានក្លាយជាតារាកុងត្រាក្នុងផលិតកម្ម ថោន ។
ដោយឡែក លោក ពេជ្រ រដ្ឋា ត្រៀមនឹងបញ្ចេញបទចម្រៀងអបអរពិធីបុណ្យចូលឆ្នាំថ្មីប្រពៃណីខ្មែរជាច្រើនបទក្នុងផលិតកម្មថោន នាពេលខាងមុនេះ៕
