សិល្បៈអន្តរជាតិ៖ ប្រិយមិត្តទាំងអស់គ្នាប្រហែលជាធ្លាប់តែលឺរឿងរ៉ាវព្រេងនិទានពី តុក្កតាខ្មោចដែលមានសក់វែង ជាពិសេសតាមរយៈភាពយន្តមួយចំនួនរបស់លោកខាងលិច។ ប៉ុន្តែយើងជឿថា អ្នកខ្លះនៅមិនទាន់បានដឹងលឺពីរឿងរ៉ាវរន្ធត់ដ៏គួរឱ្យខ្លាចបំផុតរបស់តុក្កតាជប៉ុននោះទេ។
នៅក្នុងថ្ងៃនេះ ត្រយង នឹងនាំអារម្មណ៍ប្រិយមិត្តមកដឹងពីរឿងរ៉ាវរបស់ តុក្កតាខ្មោចសក់វែង Okiku ដែលមានសក់ដូចមនុស្សមានវិញ្ញាណសណ្ឋិត។
Okiku គឺជាតុក្កតាជប៉ុនចាស់មួយដែលប្រជាជជប៉ុនបានដាក់គោរពបូជានៅក្នុងប្រាសាទមួយក្នុងទីក្រុង Iwamizawa ។ តុក្កតាខ្មោចដូចមានវិញ្ញាណនេះ មានពាក្យចចាមអារ៉ាមថា ជាតុក្កតាខ្មោចដែលមានសក់វែងដូចមនុស្សពិតប្រាកដ។ មានអ្នកខ្លះនិយាយថា វាមានវិញ្ញាណក្មេងស្រីតូចម្នាក់ចូលសណ្ឋិត។
តុក្កតាមួយនេះមានរឿងដំណាលមួយនិយាយថា ក្មេងប្រុស Eikichi Suzuki អាយុ 17 ឆ្នាំ បានទិញតុក្កតាមួយនេះទៅឱ្យប្អូនស្រីរបស់គេដែលមានឈ្មោះថា Okiku នៅឆ្នាំ 1918 ។ ប្អូនស្រីរបស់ក្មេងប្រុសនេះមានអាយុ 3 ឆ្នាំ នាងស្រលាញ់តុក្កតានេះខ្លាំងណាស់។ នាងយកវាទៅជាមួយនាងគ្រប់ទីកន្លែង សូម្បីតែពេលនាងគេងក៏ដោយ។ តុក្កតានេះ មានកំពស់មិនដល់ ៤០ សង់ទីម៉ែត្រនោះទេ មានសក់ត្រឹមស្មា និងមានស្លៀកឈុតបុរាណរបស់ជនជាតិជប៉ុន។ រឿងវ៉ាវចម្លែកៗបានកើតឡើងលើក្មេងស្រីនោះ ។
នាងចាប់ផ្ដើមធ្លាក់ខ្លួនឈឺ ក្ដៅខ្លាំង រហូតដល់គាំបេះដូងស្លាប់តែម្ដង។ រឿងចម្លែកនេះ គ្រាន់តែជាការចាប់ផ្ដើមនៃព្រឹត្តិការណ៍ដ៏គួរឱ្យរន្ធត់មួយប៉ុណ្ណោះ។ យ៉ាងណាមិញ គ្រួសាររបស់ក្មេងស្រីនោះបានរក្សាទុកតុក្កតាមួយនឹង នៅក្នុងទីសក្ការបូជាតូចមួយនៅក្នុងផ្ទះ ដើម្បីរក្សាទុកការចងចាំរបស់នាង។ គ្រួសាររបស់នាងបានដាក់ឈ្មោះតុក្កតានោះថា “Okiku” ហើយពួកគេតែងតែមកបួងសួងសុំកូនស្រីជាមួយតុក្កតានេះ។
រហូតដល់ថ្ងៃមួយ ពួកគេបានកត់សម្គាល់ឃើញថា មានរឿងចម្លែកកើតឡើងពីតុក្កតានោះទៀតហើយ។ នោះគឺម៉ូដសក់របស់វា ត្រង់ភ្លឹងគ្មានភ្លី ប៉ុន្តែវាដូចជាសក់មនុស្សរស់ពិតៗអីចឹង។ ពួកគេសង្កេតសក់របស់តុក្កតានោះ កាន់តែដុះវែងទៅៗមិនគួរឱ្យជឿ ប្រៀបដូចសក់មនុស្សដែលមានការលូតលាស់ជារៀងរាល់ថ្ងៃ។ រឿងចម្លែកនេះបានធ្វើឱ្យគ្រួសាររបស់ក្មេងស្រីមានជំនឿថា តុក្កតានេះមានវិញ្ញាណកូនស្រីសណ្ឋិត ហើយពួកគេជឿថា កូនស្រីរបស់ពួកគេគឺនៅរស់។
នៅឆ្នាំ 1938 គ្រួសាររបស់ក្មេងស្រី Kikuko បានសម្រេចចិត្តចាកចេញពីកោះហុកកៃដូ ហើយសម្រេចចិត្តមិនយកតុក្កតានោះទៅជាមួយ។ ពួកគេបានគិតថា ការទុកតុក្កតាមួយនេះឱ្យនៅលើកោះហុកកៃដូគឺជារឿងប្រសើរបំផុតហើយ។ ពួកគេបានរកឃើញដំណោះស្រាយល្អមួយ ដោយប្រគល់តុក្កតាខ្មោចនោះទៅប្រាសាទ Manenji ។ ក្រោយមក តុក្កតា Okiku បានក្លាយជានិមិត្តរូបនៃប្រាសាទតូចមួយនេះ ក្នុងការបួងសួងសុំកូនស្រី រហូតដល់ពាក្យចចាមអារ៉ាមអំពីតុក្កតាខ្មោចមួយនេះ បានចាប់ផ្ដើមរីករាលដាលនិងនិយាយពីមាត់មួយទៅមាត់មួយ ធ្វើឱ្យមានមនុស្សជាច្រើនដែលចង់មកមើលតុក្កតានោះ ដោយផ្ទាល់ភ្នែករបស់ពួកគេ។
អ្វីដែលសំខាន់អ្នកដែលចូលទៅក្នុងប្រាសាទ ចង់ឃើញតុក្កតាខ្មោចនោះ គឺមិនត្រូវបានអនុញ្ញាតឱ្យថតរូបឡើយ។ រហូតមកទល់សព្វថ្ងៃនេះ ពាក្យចចាមអារ៉ាមថា តុក្កតាខ្មោច Okiku មានសក់ប្រវែងដល់ត្រឹមជង្គង់។ ហើយនៅពេលដែលសក់របស់វាមានប្រវែងវែងពេក នោះព្រះសង្ឃដែលនៅក្នុងប្រាសាទ នឹងកាត់វាសម្រាប់បូជា។ មានប្រភពខ្លះនិយាយថា បើអ្នកចូលទៅមើលឱ្យកាន់តែជិត អ្នកអាចឃើញធ្មេញរបស់តុក្កតានោះថែមទៀតផង។
ប្រភពខ្លះអះអាងថា មានការស៊ើបអង្កេតបែបវិទ្យាសាស្ត្រមួយដែលបង្ហាញថា សក់របស់តុក្កតាខ្មោច Okiku គឺជាសក់របស់ក្មេងពិតប្រាកដ។ ប៉ុន្តែមិនមានភស្តុតាងច្បាស់លាស់ថា វាអាចលូតលាស់ដោយខ្លួនឯងនោះទេ។ លើសពីនេះទៅទៀតវាគ្រាន់តែជា មានការអះអាង ពីមាត់មួយទៅមាត់មួយប៉ុណ្ណោះ។ សូមជម្រាបថា រឿងរ៉ាវរបស់ តុក្កតាវិញ្ញាណខ្មោចសណ្ដិត Okiku ក៏ត្រូវបានផលិតជាខ្សែភាពយន្តជាច្រើនរឿង ដែលមានឈុតឆាកលងបន្លាចឱ្យអ្នកទស្សនាលស់ព្រលឹងថែមទៀតផង៕