សិល្បៈជាតិ៖ គិតមកត្រឹមថ្ងៃទី ៤ ខែមេសា ឆ្នាំ ២០២៣នេះ ភាពយន្ត «ទេពហត្ថា» ដែលជាភាពយន្តលើកស្ទួយពីរបាំព្រះរាជទ្រព្យខ្មែរ បានចាក់បញ្ចាំងនៅក្នុងរោងភាពយន្ត បានចំនួន ៤ ថ្ងៃមកហើយ។ ក៏ប៉ុន្តែតាមការសង្កេត គេមើលឃើញថា សន្ទុះនៃការគាំទ្រភាពយន្តនេះគឺមានតែនៅលើបណ្ដាញសង្គមតែប៉ុណ្ណោះ ជាក់ស្ដែងនៅក្នុងរោងភាពយន្តគឺសល់កៅទំនេរពេញៗរោង ពោលគឺគ្មានអ្នកទៅទស្សនា។
តាមការបង្ហោះនៅលើហ្វេសប៊ុក Hatta ហត្ថា បានបង្ហោះរូបភាពជាច្រើនសន្លឹកបញ្ជាក់ថា ភាពយន្តឯកសារ «ទេពហត្ថា» ពិតជាអភ័ព្វជាងភាពយន្តបែបរន្ធត់ ឬភាពយន្តបែបកំប្លែង ដែលមានអ្នកគាំទ្រទស្សនាពេញរោង រហូតពេលខ្លះស្ទើរតែកក់កៅអីទស្សនាមិនទាន់ផង។ ទំព័រហ្វេសប៊ុកផេក Hatta ហត្ថា បានបំផុសជាគំនិតថា ៖ «អ្នកស្រឡាញ់របាំ អ្នកគាំទ្ររបាំ អើយទៅណាអស់ហើយ តោះតោះ»។
ក្នុងនោះ មានអ្នកលេងបណ្ដាញសង្គមលើកឡើងជាមតិថា ៖ «Hall ខ្ញុំបានជិត១០នាក់ដែរ Documentary video ទស្សនាហើយមានអារម្មណ៍ក្តុកក្តួល ចង់ស្រក់ទឹកភ្នែក សរសើរគ្រូរបាំនិងព្រះនាងយើងណាស់ ចូរខ្មែរយើងចងចាំថា វប្បធម៌ផ្សារភ្ជាប់ជាមួយប្រទេសជាតិ ប្រទេសមួយរីកចម្រើនទៅបានក៏ដោយសារវប្បធម៌អរិយធម៌របស់ប្រទេសនោះដើរទន្ទឹមគ្នាដែរ។ ជារួមមក យើងត្រូវលើកស្ទួយវប្បធម៌អរិយធម៌ខ្មែរជាចាំបាច់»។
ខ្លះទៀតនិយាយថា ៖ «ម្នាក់ៗ ស្រែកតែតាមបណ្តាញសង្គម ស្រលាញ់ណាស់។ តែបើអោយទៅអង្គុយមើលគ្មានទេ។ កុំថាឡើយក្នុងរោងកុន ទោះចាក់អោយមើលសេរី ក៏គ្មានអ្នកគាំទ្រដែរ។ ការគាំទ្រចេញពីចិត្ត តែក៏ត្រូវការថវិកាខ្លះសម្រាប់ទ្រទ្រង់ដែរ។ បើគាំទ្រទាំងអស់គ្នា គួរតែចំណាយថវិកាបន្តិចៗ ដើម្បីលើកទឹកអោយខំ ផលិតបន្ថែម គ្រាន់តែជាគំនិតខ្ញុំ »។
ហើយមានអ្នកខ្លះទៀតនិយាយថា ៖ «ពិបាករឿង Show Time បន្តិច (ពិបាកដែរខាងរោងកុន គិតតែរឿងលុយពេក) បើជាភាគយន្តឯកសារចឹងគួរមានអ្នកឧបត្ថម ឬរដ្ឋចាត់ចែងចាក់តាមទូរទស្សន៍ ឬ Live តាម FB,YouTube អោយប្រជាជនទូទៅបានមើលផងទៅ» ។
និងខ្លះទៀតនិយាយថា៖ «ឃើញផេកធំៗបានបង្ហោះថា show time មានតែមួយ ហើយបងៗ Comment មួយចំនួនក៏ថា show time ចំម៉ោងគាត់ធ្វើការ ចឹងគាត់ទៅមើលអត់បាន បើសិនជាអាច ពេលឈប់ចាក់ក្នុង cinema គួរដាក់ក្នុង app ដែលបង់លុយបានមើលរឿងកើតក៏បានដែរ អ្នកមិនបានទៅ គាំទ្រនៅរោងកុន ក៏អាចគ្រាំទ្រនៅផ្ទះបាន ណាមួយបើមើលក្នុង app យើងអាចមើល view count ថាមានអ្នកគាំទ្រច្រើនប៉ុណ្ណា»។
ទាំងអស់គ្នានេះគឺជាមតិលើកឡើងនៅលើបណ្ដាញសង្គម ដែលបានវែកញែកពីមូលហេតុដែលនាំឱ្យភាពយន្តឯកសារដ៏ល្អឯកមួយនេះ មិនសូវមានអ្នកគាំទ្រទស្សនាច្រើននៅក្នុងរោង។ តែយ៉ាងណាមិញ មហាជនរំពឹងថា ភាពយន្តនឹងដាក់បញ្ចាំងនៅលើបណ្ដាញសង្គមដូចជា Youtube ជាដើម ក្រោយបញ្ចប់ការបញ្ចាំងនៅក្នុងរោង។
សូមជម្រាបថា ភាពយន្ដ «ទេពហត្ថា» រយៈពេល ១ ម៉ោង ២៦ នាទីផ្ដោត លើសាច់រឿងសំខាន់ចំនួន ២ ជាការបង្កើតក្បាច់របាំ «នាងវឌ្ឍនាទេវី»ដោយព្រះរៀមនរោត្ដម បុប្ផាទេវី ជាស្នាព្រះហស្ដចុងក្រោយរបស់ទ្រង់ និងប្រវត្ដិរបាំព្រះរាជទ្រព្យតាំងពីឆ្នាំ ១៩០៦។ ភាពយន្តនេះបានឧទ្ទិសចំពោះសម្តេចព្រះរាជបុត្រី ព្រះរៀម នរោត្តម បុប្ផាទេវី ដែលទ្រង់បានចូលរួម លើកស្ទួយរបាំព្រះរាជទ្រព្យខ្មែរឱ្យល្បីរន្ទឺចូលបញ្ជីបេតិកភណ្ឌវប្បធម៌អរូបីនៃមនុស្សជាតិ។
ភាពយន្ត រឿង «ទេពហត្ថា» នេះ ជាស្នាដៃដឹកនាំរបស់លោក ហ្សាវីយ៉េ ដឺ ឡូហ្សាន (Xavier de Lauzanne) និងមានការចូលរួមសម្តែងដោយនាដក នាដការបាំក្មេងចាស់ជាច្រើនរូប ដូចជា អ្នកគ្រូ ប៉ែន សុខហួន អ្នកគ្រូ វ័ន សាវ៉ៃ អ្នកគ្រូ សូភីលីន ជៀមសាភីរ៉ូ លោកគ្រូ ព្រឿង ឈៀង នាដកា សុខ ណាលីស និង សេរីវណ្ណ កុសន ជាដើម៕
