សិល្បៈជាតិ៖ ផលិតកម្ម Wonder Film Entertainment បានបញ្ចេញខ្សែភាពយន្តខ្នាតធំទី ៥ របស់ខ្លួនដែលមានចំណងជើងថា «កំណើតអរូប» ដែលជាភាពយន្តបង្ហាញពីផ្នត់គំនិតបែបវិទ្យាសាស្ត្រ និងអបិយជំនឿខ្មែរ។ ភាពយន្តកម្រិតស្ដង់ដាគុណភាពអន្តរជាតិមួយនេះ បានប្រកាសបើកសម្ពោធជាផ្លូវការនៅថ្ងៃទី ៤ ខែមេសា ឆ្នាំ ២០២៣។
លោក សែម វិសាល បានបញ្ជាក់នៅមុខអ្នកសារព័ត៌មានជាច្រើននាក់ថា ក្រុមការងារផលិតកម្មបានចំណាយពេលជាច្រើនខែសម្រាប់ផលិតភាពយន្តមួយនេះឡើង ដោយសម្រិតសម្រាំង ប្លង់ថត រូបភាព វិចិត្រកម្មទីតាំងថត ខ្លឹមសារសាច់រឿង បច្ចេកទេសសំឡេង ដែលមានក្រុមការងារផលិតគឺសុទ្ធតែជាកូនខ្មែរទាំងអស់។ លោកបន្តថា សម្ដែងនៅក្នុងភាពយន្ត «កំណើតអរូប» គឺមានទាំងបរទេស និងតារាសិល្បៈខ្មែរល្បីឈ្មោះ ដែលជាផ្នែកមួយជួយឱ្យភាពយន្តនេះឆ្ពោះទៅកាន់ទីផ្សារឆាកអន្តរជាតិ។
យ៉ាងណាមិញ ខ្សែភាពយន្ត «កំណើតអរូប» បានឆ្លុះបង្ហាញពីផ្នត់គំនិតបែបវិទ្យសាស្ត្រភ្ជាប់ជាមួយនឹងអបិយជំនឿខ្មែរដ៏ព្រឺព្រួចបែបមន្តអាគមផ្លូវងងឹត និងការធ្វើពិធីបែបសាសនាទាំង ៣ រវាងព្រះពុទ្ធ ព្រហ្មញ្ញ និងគ្រិស្ដ រួមទាំងការតុបតែងខ្លួនបែបប្រពៃណីខ្មែរនូវរបៀបស្លៀកពាក់ក្បិននិងក្រណាត់ប៉ាក់ មន្តអាគមផ្លូវងងឹតដែលយកសាកសពផ្កាប់មុខគ្រប់យ៉ាងជាទម្រង់ខ្មែរ ជាការបញ្ចូលពិសេសដោយមិនចម្លងទម្រង់ណាមួយពីបរទេស។
ភាពយន្តនេះគឺផ្ដើមចេញពីក្រុមគ្រួសារបរទេសមួយក្រុមបានមករស់នៅក្នុងស្រុកខ្មែរ និងបានជួបរឿងចម្លែកៗនៅក្នុងផ្ទះរបស់ពួកគេ។ រូបភាពមនុស្សធ្មប់ស្លៀកពាក់ខ្មៅដែលតាមយាយីដល់គ្រួសារបរទេសនោះ បានធ្វើឱ្យគ្រួសារទាំងមូលក្រឡាប់ចាក់ រហូតដល់បាត់បង់កូននៅផ្ទៃទៀតផង។ រឿងរ៉ាវអាថ៌កំបាំងកើតឡើងជាហូរហែ ដែលគ្រួសារមួយនេះព្យាយាមតាមស្រាយចំណងដោយមិនបោះបង់ចោលគ្នា បើទោះបីជាមានរឿងអ្វីក៏ដោយ។
ភាពយន្តនេះដែរ បានជ្រើសទីតាំងថតសំខាន់ៗមាននៅក្នុងខេត្តសៀមរាប វត្តបាកានខេត្តពោធិសាត់មានបដិមាបែរព្រះភក្ត្រទៅទិសខាងលិច និងព្រះនាងដោះធំលើភ្នំគូលែន ដែលនឹងក្លាយជាផ្នែកមួយចូលរួមក្នុងការលើកស្ទួយផ្សព្វផ្សាយវប្បធម៌ខ្មែរ និងវិស័យទេសចរណ៍របស់កម្ពុជាតាមរយៈទិដ្ឋភាពស្អាតដែលបានផ្ដិតយកមកបង្ហាញ។
លោក សែម វិសាល បានបន្តបញ្ជាក់ទៀតថា មែនទែនទៅ ក្រៅពីបញ្ចាំងភាពយន្ត «កំណើតអរូប» នៅក្នុងរោង កុនទូទាំងប្រទេសហើយ ភាពយន្តនេះក៏ត្រូវបាននាំចេញទៅបញ្ចាំងនៅទីផ្សារអន្តរជាតិផងដែរ ដោយចាប់ ពីការបញ្ចាំងតាមប្រទេសជិតខាងជាមុនសិន។ លោកបន្តថា បន្ទាប់ពីភាពយន្តរន្ធត់មួយនេះ ផលិតកម្ម Wonder Film ក៏ត្រៀមនឹងបង្ហាញភាពយន្តរបស់ខ្លួនចំនួន ៣ រឿងផ្សេងទៀត ដែលសុទ្ធតែជាភាពយន្តកម្រិតស្ដង់ដាអន្តរជាតិទាំងអស់។
សូមជម្រាប ភាពយន្ត «កំណើតអរូប» មានរយ:ពេល១ម៉ោង និង៤៥នាទីចាក់បញ្ចាំងនៅថ្ងៃទី០៦ ខែមេសា ឆ្នាំ២០២៣ខាងមុននេះ នៅគ្រប់រោងភាពយន្ត។ លោក វិសាល បានលើកឡើងថា លោករំពឹងថា ភាពយន្តនេះជាភាពយន្តមួយដែលអាចផ្លាស់ប្ដូរទស្សនៈរបស់ទស្សនិកជនឱ្យងាកមកគាំទ្រខ្មែរវិញ ដោយសារទាំងផលិតករនិងអ្នកដឹកនាំរឿងក្នុងស្រុកបាននិងកំពុងព្យាយាមផលិតរឿងប្រកបដោយគុណភាព។