សិល្បៈជាតិ៖ អ្នកនាង ប្រាសាទ ដាវីន បានប្រាប់នៅចំមុខអ្នកសារព័ត៌មានជាច្រើននាក់ថា ខ្លួនគ្រោងនឹងបង្កើតកម្មវិធីប្រកួតសម្រស់មួយដែលមានគុណភាពស្តង់ដារ និងមានការហ្វឹកហាត់បេក្ខភាពចូលរួមប្រកួតរយៈពេលយូរយ៉ាងម៉ដ្ឋចត់។ ការនិយាយបែបនេះ បន្ទាប់ពីអ្នកនាង ទទួលបានបទពិសោធន៍ថ្មីពីការរៀបចំកម្មវិធី Miss Supranational Cambodia 2023 ដែលទើបបញ្ចប់ពីពេលថ្មីៗនេះ។
អ្នកនាង ប្រាសាទ ដាវីន ទទួលស្គាល់ថា កន្លងមកអ្នកនាងក៏ធ្លាប់រិះគន់នូវភាពចន្លោះប្រហោងនៃការរៀបចំកម្មវិធីធំៗផ្សេងៗទៀតដែលអ្នកនាងមើលឃើញនឹងភ្នែក ប៉ុន្តែអ្នកនាងមិនដឹងថា ការចូលមកប្រឡូករៀបចំមួយឱ្យដំណើរការបានយ៉ាងរលូននោះ ធាតុពិតគឺវាភាពលំបាកប៉ុណ្ណានោះទេ។
អ្នកនាងបញ្ជាក់ថា ការដែលអ្នកនាងធ្លាប់រិះគន់កម្មវិធីតែមាត់ទទេ នោះមិនបានជួយកែប្រែអ្វីឱ្យកម្មវិធីល្អប្រសើរជាងមុននេះ លុះត្រាតែអ្នកនាងហ៊ានចំណាយទាំងថវិកា និងពេលវេលាមករៀបចំកម្មវិធី ទើបអាចទទួលបានលទ្ធផលដូចការរំពឹងទុកដែលអ្នកនាងចង់បាន។
ភ្ជាប់ជាមួយឃ្លាដែលអ្នកនាង ប្រាសាទ ដាវីន បានបង្ហោះនៅលើបណ្ដាញសង្គមហ្វេសប៊ុកថា «ខ្ញុំរឹតតែដឹងច្បាស់ជាមួយសង្គមមួយនេះ» បានធ្វើឱ្យមហាជនសង្ស័យថា អ្នកនាងនឹងលាលែងពីតំណែងរបស់កម្មវិធី។ ប៉ុន្តែមួយឃ្លានេះបានធ្វើឱ្យអ្នកនាងយល់ច្បាស់ពីវិស័យបវរកញ្ញា និងមិនមែនបានន័យថា ចប់កម្មវិធី Miss Supranational Cambodia 2023 ភ្លាមអ្នកនាងលាឈប់ពីអនុប្រធានរៀបចំកម្មវិធីនោះទេ តែអ្នកនាងនឹងប្រឹងដុសខាត់សមត្ថភាពបេក្ខភាពជ័យលាភីបន្តទៀត ដើម្បីឱ្យពួកគេក្លាយជាគ្រាប់ពេជ្រមួយដែលភ្លឺចែងចាំងនៅលើវេទិកាប្រកួតលំដាប់អន្តរជាតិ។
ទោះជាយ៉ាងណា គម្រោងដែលអ្នកនាង ប្រាសាទ ដាវីន ចង់ផលិតកម្មវិធីប្រកួតសម្រស់ដោយខ្លួនផ្ទាល់ គឺស្ថិតនៅកម្រិតនៃការស្ទាបស្ទង់នៅឡើយ ព្រោះអ្នកនាងបារម្ភថា នៅពេលចេញមកបង្កើតសមិទ្ធផលថ្មីដោយខ្លួនឯងភ្លាម គឺអាចប្រឈមនឹងខ្វះកម្លាំងគាំទ្រ។
អ្នកនាង ប្រាសាទ ដាវីន យល់ឃើញថា ខ្លួននឹងខំពង្រឹងសមត្ថបន្តិចទៀតសិន មុននឹងបោះជំហ៊ានទៅមួយកម្រិតទៀត ណាមួយអ្នកនាងមិនហ៊ានទៅណាឆ្ងាយពី បេក្ខភាពបវរកញ្ញា ដែលស្ថិតក្រោមការមើលថែរបស់អ្នកនាងឡើយ៕
