លោក Jamie Spears ឪពុកបង្កើតរបស់តារាចម្រៀង Britney Spears បានស្នើសុំឱ្យធ្វើការស៊ើបអង្កេតលើករណីដែលកូនស្រីអះអាង ថាខ្លួនបានបាត់បង់សិទ្ធិសេរីភាព សូម្បីតែការសម្រេចចិត្តលើការប្រើប្រាស់ឱសថ ដោយសារតែច្បាប់រក្សាការពារ និងឃ្លាំមើល។
មេធាវីរបស់លោក Jamie Spears បានឱ្យដឹងថាលោកឪពុករូបនេះមានការឈឺចាប់យ៉ាងខ្លាំងដែលបានដឹងបញ្ហាលំបាកនិងការឈឺចាប់របស់កូនស្រីលោក ដូច្នេះលោកស្នើសុំឱ្យមានការស្រាវជ្រាវទៅលើការលើកឡើងខាងលើ។ Britney Spears ត្រូវបានតុលការសម្រេចឱ្យស្ថិតនៅក្រោមការគ្រប់គ្រង និង មើលថែទាំពីឪពុករបស់អ្នកនាងចាប់តាំងពីឆ្នាំ២០០៨ ក្រោយពីអ្នកនាងមានបញ្ហាផ្លូវចិត្តធ្ងន់ធ្ងរ។
Britney Spears បានប្រាប់ចៅក្រមកាលពីសប្ដាហ៍មុនថាអ្នកនាងត្រូវបានបង្ខំឱ្យលេបថ្នាំ Lithium ដែលផ្ទុយពីវត្ថុបំណងរបស់អ្នកនាង ជាពិសេសទៀតត្រូវបានហាមឃាត់មិនឱ្យរៀបកា ឬដកឧបករណ៍ការពារកំណើតចេញ ដូច្នេះអ្នកនាងចង់ឱ្យច្បាប់ឃ្លាំមើលនិងការពារនេះបញ្ចប់។
លោក Jamie បានកាន់កាប់តំណែងជាអ្នកគ្រប់គ្រងហិរញ្ញវត្ថុ ក៏ដូចជាកិច្ចការងារផ្ទាល់ខ្លួនកូនស្រីរហូតដល់ឆ្នាំ២០១៩ ទើបលោកចាកចេញពីមុខងារនេះ ដោយជំនួសមកវិញដោយ Jodi Montgomery ជាអ្នកចាត់ចែងបណ្ដោះអាសន្ន។ ឆ្នាំមុន Britney បានដាក់ពាក្យប្ដឹងជំទាស់មិនឱ្យឪពុករបស់អ្នកនាងអាចត្រលប់មកកាន់តំណែងរបស់លោកវិញ។
ខណៈដែលមេធាវីរបស់ឪពុក Britney Spears បាននិយាយនៅក្នុងឯកសារថ្មីថា លោក Jamie មិនមានចេតនាព្យាយាមទាមទារសិទ្ធិ ឬចង់ចូលទៅពាក់ព័ន្ធក្នុងកិច្ចការងារផ្ទាល់ខ្លួន ឬ ការព្យាបាលរបស់កូនស្រីឡើយ។
ចំណែកមេធាវីរបស់ Montgomery ឈ្មោះ Lauriann Wright បានប្រកាសឱ្យដឹងដែរថាកូនក្ដីរបស់ខ្លួនមានការហត់នឿយយ៉ាងខ្លាំងដែលចំណាយចិត្តកាយដើម្បីធ្វើឱ្យជីវិតរបស់ Britney Spears មានសេចក្ដីសុខ ហើយកូនក្ដីខ្លួនក៏បានត្រៀមឯកសារដើម្បីបង្ហាញជូនដល់តុលាការដើម្បីសុំនិរាករណ៍សេចក្ដីសម្រេចឃ្លាំមើលនិងការពារលើតារាចម្រៀង Britney Spears។
នៅក្នុងតុលាការកាលពីសប្ដាហ៍កន្លងទៅ Britney Spears បានហៅឪពុករបស់ខ្លួនថា ឆ្នើងឆ្នៃ និង ក្ដោបក្ដាប់គ្រប់យ៉ាង «គាត់ពេញចិត្ត នឹងក្ដោបក្ដាប់ទៅលើអ្វីៗគ្រប់យ៉ាង»។
អ្នកគាំទ្ររបស់ Britney Spears កន្លងមកបានជួយចេញមកធ្វើយុទ្ធនាការ ស្រែកទាមទារឱ្យ ដោះលែង មានសេរីភាព ដើម្បីឱ្យមានសិទ្ធិគ្រប់គ្រងលើទ្រព្យសម្បត្តិ ក៏ដូចជាមានសិទ្ធិបានធ្វើអ្វីដោយខ្លួនឯងផងដែរ។
គួរដឹងដែរថា តុលការនៅថ្ងៃទី២ ខែកក្កដា ឆ្នាំ២០២១ តុលាការបានសម្រេចបដិសេធសំណើរសុំនិរាករណ៍សិទ្ធិឃ្លាំមើលនិងការពាររបស់លោក Jamie Spears មកលើកូនស្រី Britney Spears តែបានសម្រេចឱ្យក្រុមហ៊ុន Bessemer Trust មានសិទ្ធិរួមក្នុងការឃ្លាំមើលនិងការពារលើ Britney Spears ៕
ប្រភព៖ Asianone