សិល្បៈជាតិ៖ ថ្មីៗនេះ Kool Play បានបញ្ចេញវណ្ណកម្មថ្មីរបស់ខ្លួន ដោយបង្ហាញពីសកម្មភាពថតភាពយន្តភាគថ្មីដែលមានចំណងជើងថា «បេសដូង | My Croissant The Series » ជាប្រភេទរឿង BL ដែលមានការចូលរួមសម្ដែងដោយលោក ម៉ក់ ឈុនលី និងលោក Chris Pittara ។
ភាពយន្តភាគបែបយុវវ័យនេះ ត្រូវបានលើកសាច់រឿងពីសេចក្ដីស្នេហារបស់បុរសពីរនាក់ បង្កើតឡើងនៅក្នុងហាងអាហារមួយកន្លែង ជាចំណោទបញ្ហាជាច្រើន ដែលធ្វើឱ្យសាច់រឿងប្រទាក់ក្រឡាគ្នាពីដើមដល់ចប់។
យ៉ាងណាមិញ គេបានដឹងថា នេះគឺជារឿងដំបូងហើយដែលតារាសម្ដែង ម៉ក់ ឈុនលី បានប្ដូរអត្តចរិតតួអង្គ ដោយងាកមកជាតួ BL ហើយស្របពេលដែលលោកទើបតែធំពេញកំឡោះពេញរូបពេញរាងសង្ហា។
សូមជម្រាបថា ម៉ក់ ឈុនលី ត្រូវបានមហាជនគ្រប់គ្នាចងចាំពីលោក កាលដែលបានចូលរួមសម្ដែងនៅក្នុងរឿង “កូនពស់កេងកង” ដែលជាវណ្ណកម្មដឹកនាំសម្ដែងដោយលោក ហ្វៃ សំអាង ហើយពេលនេះ ឈុនលី នៅមានវ័យជាកុមារា នៅឡើយ។
គួររំលឹកដែរថា ម៉ក់ ឈុនលី ផ្ដើមចូលសិល្បៈដំបូងចុងឆ្នាំ២០១៧ ដោយចៃដន្យបំផុតពេលលេង Facebook នៅពេលក្រុមហ៊ុនមួយ ឃើញសម្រស់និងវ័យរបស់ ម៉ក់ ឈុនលី អាចថតស្ប៉តពាណិជ្ជកម្មលក្ខណៈគ្រួសារបាន ក៏ហៅថតតែម្ដង។ ចាប់ពីពេលនោះមក ឈុនលី ប្ដូរមករស់នៅទីក្រុងភ្នំពេញ និងមានឱកាសបន្តបន្ទាប់ក្នុងអាជីពសិល្បៈ៕