សិល្បៈជាតិ៖ ដូចបានដឹងមកហើយថា នៅក្នុងភាពយន្តហូលីវូដ គឺមានឈុតដែលប្រើតួ Stunt ជំនួសតួអង្គពិត។
ឈុតមួយចំនួននោះមានដូចជា ឈុតមិនចេញមុខ ឈុតប្រយុទ្ធគ្នា ឈុតជិះម៉ូតូ ឈុតដែលតួសម្តែងពាក់របាំងមុខ ឬពាក់ស្រោមមុខ ឈុតមុខខ្មោច ឈុតហែលទឹក ឈុតហក់រំលងអាគារ ឈុតនៅក្នុងឡាន ឈុតថតពីលើយន្តហោះ ឈុតថតអាក្រាតពីក្រោយ ជាដើម.. ដែលឈុតទាំងនោះតួពិតមិនអាចសម្ដែងបានទេ។
ដូច្នោះហើយ គឺគេប្រើតួ Stunt ជំនួស ដើម្បីធានាសុវត្ថិភាពឱ្យតួ និង ទុកពេលឱ្យតួបានសម្រាក ទន្ទេញប៉ារ៉ូល និងមិនបាក់សម្រស់ជាដើម..។ ថ្ងៃនេះយើងមកស្គាល់ពីតួ Stunt ចំនួន ៤ រូបដែលមានឈាមជ័រជាកូនខ្មែរ និងបានបង្ហាញក្បាច់គុនខ្មែរនៅក្នុងឧស្សាហកម្មភាពយន្តហូលីវូដ។
1-ណុប ដារ៉ែន
លោក ណុប ដារ៉ែន គឺជាកូនខ្មែរកាត់បារាំងដែលកំពុងរស់នៅប្រទេសបារាំងនិងធ្លាប់លេចមុខសម្ដែងក្នុងភាពយន្តល្បីៗមួយចំនួនដូចជា “From Paris with Love” និង “Tekken Tag Tournament 2” ជាដើម។ លោកបានហាក់គុនខ្មែរចាប់តាំងពីអាយុ ១៤ ឆ្នាំ ហើយបានប្រើក្បាច់គុនខ្មែរសម្ដែងជាតួអង្គឈឺសាច់ជំនួសតាមរយៈភាពយន្តហូលីវូដដូចជា Moon Knight , John Wick: Chapter 4 ជាដើម។
2- Maurice CHAN
លោក Maurice CHAN ជាតារាសម្ដែងកូនកាត់ខ្មែរ-បារាំង បានចាប់ផ្ដើមធ្វើជាតួវាយតប់ ឬ Stunt ក្នុងប្រទេសបារាំងតាំងពីឆ្នាំ ២០០០ មក ដោយដំបូងលោកធ្វើការជាមួយអ្នករៀបចំប្លង់វាយតប់ និងឈុតគ្រោះថ្នាក់ផ្សេងៗ។ ដោយសារមើលឃើញសមត្ថភាព និងជឿជាក់ ទើបកូនខ្មែរមួយរូបនេះទទួលបានឱកាសឱ្យថតរឿងជាតួឈឺសាច់ជំនួសជាហូរហែឥតដាច់។
រឿងហូលីវូដដែលរូបលោកសម្ដែងដំបូងមានចំណងជើងថា “Unleashed” ឬ “Danny the Dog” ដែលសម្ដែងជាមួយលោក លី លានជា (Jet Li) និង Morgan Freeman ក្នុងឆ្នាំ ២០០២ និងរឿង “From Paris with Love (2010)”, ”District 13 Ultimatum (2009)” និង “Lucy (2014)”។ ក្រៅពីនេះ នៅមានភាពយន្តបារាំង និងឥណ្ឌាជាច្រើនផ្សេងទៀតដែលលោកបានចូលរួមសម្ដែងផងដែរ។
ថ្មីៗនេះ លោកក៏បានចូលរួមសកម្មភាពជាក្រុមសម្ដែង John Wick 4 ដែលធ្វើឱ្យមហាជនស្ញប់ស្ញែងពីសមត្ថភាពរបស់លោក។
3-ហ្សង់ ប៉ូលី
លោក -ហ្សង់ ប៉ូលី Jean-Paul Ly គឺជាកូនខ្មែរកាត់បារាំង លោកបានសម្ដែងជាតួ Stunt ចំនួនពីរលើកឱ្យតួអង្គ Wong ក្នុងភាពយន្ត “Doctor Strange in the Multiverse of Madness”។ មែនទែនទៅ នេះមិនមែនជាលើកដំបូងទេដែលតារាប្រុសរូបនេះបានបញ្ចេញក្បាច់គុននៅ Marvel Studios ។ លោកធ្លាប់ជាតួជំនួសនៅក្នុងរឿង « Now You See Me 2»។ លោកក៏ធ្លាប់មានស្នាដៃសម្ដែងនៅក្នុងភាពយន្តរឿង « Jailbreak » ឬ «ការពារឧក្រិដ្ឋជន» ផងដែរ។
4-ឌី សៅ
លោក ឌី សៅ គឺជាតារាក្បាច់គុន ដែលបានបង្ហាញគុនខ្មែរដល់តារាហូលីវូដជាច្រើននាក់។ ថ្មីៗនេះ លោកបានសម្ដែងជាតួជំនួសឱ្យអ្នកស្រី Michelle Yoeh នៅប្លង់ខ្លះៗក្នុងរឿង VERYTHING EVERYWHERE ALL AT ONCE។ លោក ឌី សៅ គឺជាកូនខ្មែរកើតលើទឹកដីកម្ពុជា បានចេញទៅរស់នៅសហរដ្ឋអាមេរិក តាំងមានអាយុ៣ឆ្នាំ ហើយបានចូលហ្វឹកហាត់ក្បាច់គុនតាំងពីវ័យ៧ឆ្នាំ រហូតជំរុញឲ្យលោកជោគជ័យ ក្នុងខ្សែភាពយន្តហូលីវូដ មកដល់បច្ចុប្បន្ន។ លោកធ្លាប់មានស្នាដៃសម្ដែង ហនុមាន និងទទួលបានសម្តែងជាតួឯកនៅក្នុងឆ្នាំ ២០១៣ ទៀតផង។