ក្រុមបាល់ទាត់ Happy Valley AA ដែលធ្លាប់ឈ្នះជើងឯកពានរង្វាន់លីគកំពូលនៃកោះហុងកុង Hong Kong Premier League ចំនួន៦សម័យកាលបានប្រកាសដកខ្លួនចេញពីពានរង្វាន់មួយនេះនៅរដូវកាលឆ្នាំ២០២១-២២។
បើតាមសេចក្តីជូនដំណឹងរបស់ក្លិប នៅថ្ងៃព្រហស្បតិ៍ សប្ដាហ៍នេះថា៖«ក្រោយពីបានធ្វើការប្រជុំពិនិត្យ គណៈគ្រប់គ្រងHappy Valley FC សម្រេចមិនបន្តការចូលរួមប្រកួតលីគកំពូលហុងកុងឆ្នាំ ២០២១-២២។ ជាការសោកស្តាយបំផុត ដែលយើងមិនអាចបន្តចូលរួមក្នុងការប្រកួតនៅក្នុងលីគកំពូលនេះបាន។ ក្លិបសូមថ្លែងអំណរគុណចំពោះអ្នកឧបត្ថម្ភ អ្នកគាំទ្រ ដែលតែងមកគាំទ្រដល់ទីលានប្រកួតរបស់ Happy Valley Fcនាពេលកន្លងមកនេះ»។ ក្លិបមិនបានបញ្ជាក់ពីមូលហេតុនៃការដកខ្លួននេះនោះទេ។
ក្រុម Happy Valley AA ប្រើប្រាស់កីឡដ្ឋាន Sham Shui Po Sports Ground ជាទឹកដីរបស់ខ្លួន ហើយក្រៅពីធ្លាប់ឈ្នះជើងឯកលីគកំពូលហុងកុង ៦សម័យកាលក្រុមនេះធ្លាប់ឈ្នះជើងឯករងរហូតដល់១៦លើកផងដែរ។ ក្រុមនេះធ្លាប់តំណាងឱ្យហុងកុង ចូលរួមប្រកួតជើងឯកកម្រិតទ្វីបដូចជា Asian Cup Winners’ Cup ឆ្នាំ១៩៩៨-៩៩ និង២០០០-២០០១, ពានរង្វាន់ Asian Club Championship ឆ្នាំ២០០០, ២០០២ និងពានរង្វាន់ AFC Cup ឆ្នាំ២០០៥, ២០០៦ និង២០០៧ ផងដែរ។
បច្ចុប្បន្នក្រុមដែលបង្កើតឡើងពីឆ្នាំ១៩៥០ មួយនេះមានក្រុមយុវជនថ្នាលឈុត U-13, U-15, U-18 និងឈុតធំ ព្រមទាំងក្រុមបាល់ទាត់នារី ថែមទៀត៕
