បងប្អូនភ្លោះស្រីត្រកូល Truong កីឡាការិនី Truong Thao My និង Truong Thao Vy នឹងធ្វើដំណើរពីសហរដ្ឋអាមេរិក មកកាន់ប្រទេសវៀតណាម នាពេលខាងមុខ ដើម្បីចូលរួមជាមួយក្រុមបាល់បោះជម្រើសជាតិនារីវៀតណាម ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា។
កីឡាការិនី Truong Thao My និង Truong Thao Vy បានកើតនៅរដ្ឋតិចសាស សហរដ្ឋអាមេរិក ហើយបច្ចុប្បន្ន អ្នកទាំង២មានវ័យ២១ឆ្នាំ ដោយមានឪពុកសញ្ជាតិវៀតណាម និងម្ដាយសញ្ជាតិវៀតណាម-អាមេរិក។
កីឡាការិនីបាល់បោះកូនភ្លោះទាំង២នាក់នេះ ទំនងជានឹងប្រកួតទាំង២វិញ្ញាសា រួមមានវិញ្ញាសា ៣ទល់៣នាក់ និងវិញ្ញាសា ៥ទល់៥នាក់ ដើម្បីជួយក្រុមបាល់បោះនារីវៀតណាម ឱ្យទទួលបានលទ្ធផលប្រសើរជាងមុន ពោលគឺធៀបទៅនឹងការប្រកួតក្នុងព្រឹត្តិការណ៍ស៊ីហ្គេមចុងក្រោយបង្អស់ (លើកទី៣១) ធ្វើឡើងនៅប្រទេសវៀតណាម កីឡាការិនីទាំង២នេះ បានរួមចំណែកជួយឱ្យប្រទេសកំណើតរបស់ឪពុកម្ដាយខ្លួន ទទួលបានមេដាយប្រាក់ ជាប្រវត្តិសាស្ត្រក្នុងវិញ្ញាសា ៣ទល់៣នាក់។
កូនភ្លោះត្រកូល Truong លេងឱ្យ Gonzaga នៃក្របខណ្ឌលីគសាកលវិទ្យាល័យ (NCAA) នៃសហរដ្ឋអាមេរិក។ រដូវកាលនេះ Thao My និង Thao Vy មានបទពិសោធន៍ផ្ទុយគ្នា គឺកីឡាការិនី Thao Vy លេងបានទៀងទាត់ជាមួយនឹងស្ថិតិគួរឱ្យចាប់អារម្មណ៍ តែ Thao My វិញបានខកខានការប្រកួតជាច្រើន ដោយសារតែបញ្ហារបួស។
ទោះជាយ៉ាងណាក៏ដោយ My បានជាសះស្បើយរបួស១០០ភាគរយហើយ ហើយអាចលេងក្នុងការប្រកួត ២លើកចុងក្រោយនៃរដូវកាលនេះ សម្រាប់ក្រុមសាកលវិទ្យាល័យ Gonzaga។ ដូច្នេះនាងនឹងមានសុខភាពផ្លូវកាយ និងផ្លូវចិត្តល្អបំផុត មុនការប្រកួតស៊ីហ្គេមលើកទី៣២ នៅកម្ពុជា។
ជាមួយនឹងការវិលត្រឡប់មកវិញរបស់ Truong Thao My និង Truong Thao Vy គឺសមត្ថភាពរបស់ក្រុមបាល់បោះនារីវៀតណាម ក្នុងការដណ្ដើមយកមេដាយនៅស៊ីហ្គេម លើកទី៣២ នឹងមានភាពប្រសើរឡើងគួរឱ្យកត់សម្គាល់។ ក្រុមនេះត្រូវបានគេរំពឹងថានឹងប្រមូលផ្តុំ និងចាប់ផ្តើមការហ្វឹកហាត់នៅសប្តាហ៍ក្រោយ៕
ប្រភព៖ Camsoc