ថ្មីៗនេះ Cha Eunwoo ប្រុសស្អាត សមាជិក ASTRO ក្រុមចម្រៀងកូរ៉េខាងត្បូង ត្រូវបានមហាជន រិះគន់ និង ចោទប្រកាន់ថាបានប្រើសម្ដីលែបខាយចំពោះអ្នកគាំទ្រជានារីភេទ ក្នុងកម្មវិធីចែកហត្ថលេខាឱ្យអ្នកគាំទ្រ។
យោងតាមសំណេរដែល Cha Eunwoo បានសរសេរនៅលើក្របអាល់ប៊ុម មានន័យថា «តើយើងអាចជួបគ្នានៅពេលដែលបងស្រីស្លៀកឈុតរឹបរាងបានទេ? មើលទៅសិចស៊ី» ខណៈដែលសមាជិកផ្សេងៗទៀត ក្នុងក្រុម ASTRO គ្រាន់តែសរសេរថា «រលាយបេះដូង» ឬ «ខ្ញុំស្រលាញ់អ្នក» «តើអ្នកហត់នឿយដែរទេ?» «អ្នកជានារីរបស់ខ្ញុំ» ឬក៏ «សូមមករកខ្ញុំទៀត ស្រលាញ់ណាស់»។
អ្នកគាំទ្រជាច្រើនរីកថ្លើមនៅពេលបានអានពាក្យពេចន៍បង្ហាញពីក្ដីស្រលាញ់របស់គាត់ចំពោះអ្នកគាំទ្រ ប៉ុន្តែមជ្ឈដ្ឋានមហាជនបានសម្ដែងការមិនពេញចិត្ត និងគាំទ្រចំពោះពាក្យពេចន៍ខាងលើរបស់ Cha Eunwoo នោះឡើយ ជាពិសេសចំណុចដែលគេស្នើឱ្យអ្នកគាំទ្រនារីស្លៀកឈុតរឹបរាងមកក្នុងកម្មវិធី ចុះហត្ថលេខាបែបនេះ។
បន្ទាប់ពីបែកធ្លាយ Chat Group (ជជែកជាក្រុម) ពី Kakao Talk ពាក់ព័ន្ធនឹងតារាល្បី៥ រូប លើរឿងអាស្រូវផ្លូវភេទធ្វើឱ្យមហាជនអស់ជំនឿចំពោះរូបភាពសុភាពរាបសារខាងក្រៅដែល តារាបានសាងឡើងនៅខាងមុខកាំមេរ៉ា។ ប៉ុន្តែផ្ទុយទៅវិញមហាជនផ្ដោតទៅលើការប្រើប្រាស់ពាក្យពេចន៍បែបលែបខាយ ឬការប៉ះពាល់រាងកាយរបស់តារាមកលើអ្នកគាំទ្រ ដូចទៅនឹងករណី Cha Eunwoo នេះជាដើម។
យ៉ាងណាមិញ អ្នកគាំទ្រមួយចំនួនបានចេញមកពន្យល់ពីហេតុផលដែល Cha Eunwoo ប្រើពាក្យសម្ដីបែបនេះថា ព្រោះអ្នកគាំទ្រនារីរូបនោះព្យាយាមសំរកគីឡូ ហើយនាងចង់ស្លៀកឈុតរឹបទៅចូលរួមក្នុងកម្មវិធីចុះហត្ថលេខា។ នាងគឺជាអ្នកស្នើសុំឱ្យ Cha Eunwoo សរសេរសារគាំទ្រ បន្ទាប់មកគាត់បានធ្វើតាមសំណូមពរ។ សូមបញ្ជាក់ដែរថា ការចោទប្រកាន់លើ Cha Eunwoo ពាក់ព័ន្ធនឹងការលូកលាន់រាងកាយ មិនត្រឹមត្រូវនោះទេ៕
ប្រភព៖ KBIZOOM