លោក ផាត់ សុផល បុរសដែលមានដើមកំណើតនៅជំរុំជាយដែនខ្មែរថៃ និងមានទីលំបច្ចុប្បន្ននៅក្នុងខេត្តបាត់ដំបង បានប្រកាសតាមរយៈបណ្ដាញសង្គមកាលពីពេលថ្មីៗនេះថា លោកមានបំណងចង់បើកបង្រៀនសាលាគំនូរជីវចល និង ភាពយន្តក្នុងពេលដ៏ខ្លីខាងមុខនេះ។
លោក ផាត់ សុផល ស្ថាបនិកឆាណែលយូធូប Cartoon Veha ដែលជាអតីតកម្មករអូសរទេះបានរំលឹកឱ្យដឹងថាការដែលលោកក្លាយជាវិចិត្រករគំនូរជីវចលគឺផ្ដើមចេញពីលោកគ្រូបារាំងម្នាក់ បានចាក់គំនូរជីវចល 2D ឱ្យលោកមើល ដោយពន្យល់ថាគំនូរដែលគ្រូដោយដៃអាចក្លាយជាគំនូរជីវចលបាន ថែមទាំងនិយាយនូវពាក្យមួយដែលធ្វើឱ្យលោកចងចាំគ្មានថ្ងៃភ្លេច «ព្យាយាមឡើងដើម្បីជនជាតិរបស់អ្នក»។
ប៉ុន្តែជីវិតខុសពីរឿងនិទាន ព្រោះក្រោយពីលោកចាកចេញពីជំរុំ ហើយត្រលប់មករស់នៅក្នុងស្រុកកំណើតវិញ ដោយជីវភាពក្រលំបាកធ្វើឱ្យលោកសម្រេចចិត្តសុំម្ដាយឈប់រៀន ហើយវិលទៅធ្វើជាកម្មករអូសរទេះ និងស៊ីឈ្មួលច្រូតស្រូវឱ្យជនជាតិថៃ។ ថ្វីត្បិតតែជីវិតស្ថិតក្នុងព្យុះភ្លៀង តែលោក ផាត់ សុផល មិនដែលមានចិត្តបោះបង់ចោលក្ដីស្រមៃចង់ក្លាយជាវិចិត្រករគំនូរជីវចលរបស់ខ្លួនឡើយ ឱ្យតែមានពេលទំនេរលោកតែងតែឆ្លៀតពេលគូរគំនូរជានិច្ច។
រហូតដល់ឆ្នាំ២០០៣ ក្ដីស្រមៃរបស់លោកហាក់មានពន្លឺព្រោះលោកមានពន្លឺដោយលោកអាចមានលទ្ធភាពទិញកុំព្យួទ័រមួយគ្រឿង ដើម្បីធ្វើការសិក្សាស្រាវជ្រាវពីវិធីធ្វើយ៉ាង ទើបឱ្យ រូបភាពចាប់ផ្ដើមអាចមានចលនា។ ទីបំផុតដោយក្ដីព្យាយាមមិនបោះបង់ លោក ផាត់ សុផល ទីបំផុតអាចរកបានកម្មវិធី 3D ធ្វើឱ្យលោកអាចសិក្សាយកមកធ្វើជាគំនូរជីវចលបានសម្រេច។
តាមការបញ្ជាក់របស់លោក ប្រាប់សារព័ត៌មានក្នុងស្រុកភាគច្រើនគំនូរជីវចលរបស់លោក គឺជាប្រភេទវីដេអូរឿងអប់រំសម្រាប់កុមារ ព្រោះលោកសង្កេតឃើញថា វីដេអូគំនូរជីវចលភាគច្រើនជារបស់បរទេស ដូច្នេះកុមារតូចៗមើលវីដេអូគេធ្វើឱ្យទទួលយកនូវវប្បធម៌បរទេសមុនវប្បធម៌ជាតិសាសន៍ខ្លួន។
ងាកមកវិញ លោក ផាត់ សុផល បានធ្វើការប្រកាសលើគណនីហ្វេសប៊ុករបស់លោកកាលពីថ្ងៃទី៦ ខែកក្កដា ឆ្នាំ២០២១ ថាលោកនឹងបើកសាលាបង្រៀនគំនូរជីវចល និង ភាពយន្ត ដោយផ្ដល់អាហារូបករណ៍រហូតដល់១០០% សម្រាប់អ្នកខ្វះលទ្ធភាព។
«សម្រាប់អ្នកបាត់ដំបងដែលចង់រៀនគំនូរជីវចល និង ភាពយន្ត។ ឆាប់ៗខាងមុខ ខ្ញុំនឹងបើកសាលាបង្រៀន នៅទីនោះជាឱកាសល្អសម្រាប់ប្អូនៗ ដែលខ្វះលទ្ធភាព គឺអាចទទួលបានអាហារូបករណ៍រហូតដល់១០០%។ គោលដៅគឺចង់កសាងធនធានមនុស្សសម្រាប់ជាតិ»។
គួរដឹងដែរថា ស្នាដៃរបស់លោក ផាត់ សុផល ក្រៅមានបង្ហោះលើឆាណែលយូធូប Cartoon Veha របស់លោកផ្ទាល់ហើយនោះ ស្នាដៃរបស់លោកក៏មានការទទួលស្គាល់ និង ទុកចិត្ត ឱ្យបញ្ចេញស្នាដៃក្នុងបទចម្រៀងរបស់អ្នកអង្គម្ចាស់ ព្រះនាងតូច នរោត្តម ជេនណា ច្រៀងជាមួយនឹងលោក 12ME ឌូស្សស្មេ ក្នុងបទចម្រៀង «កង្កែបរាំវង់» ផងដែរ៕
ទស្សនាស្នាដៃគំនូរជីវចលរបស់លោក ផាត់ សុផល ក្នុងបទចម្រៀង «កង្កែបរាំវង់» ដូចខាងក្រោមនេះ៖
