លោក អ៊ា ចរិយា បានទទួលមុខតំណែងជានាយករដ្ឋបាលសាលាក្រុងអរិយក្សត្រ។ អតីតអ្នកសង្គមស៊ីវិលជំនាញសុវត្ថិភាពចរាចរណ៍រូបនេះ បានបង្ហាញវត្តមានលើហ្វេសប៊ុកផេកថ្មីថ្មោងរបស់រដ្ឋបាលក្រុងអរិយក្សត្រ នាឱកាសចុះពិនិត្យទីតាំងត្រូវប្រារព្ធពិធីប្រកាសបង្កើត និងដាក់ឱ្យដំណើរការរដ្ឋបាលក្រុងអរិយក្សត្រ កាលពីថ្ងៃទី៣០ ខែមេសា ម្សិលមិញនេះ។
រម្លឹកថយក្រោយបន្តិច លោក អ៊ា ចរិយា ជាអតីតនាយកវិទ្យាស្ថានសុវត្ថិភាពចរាចរណ៍។ សារព័ត៌មានត្រយង បានស្រាវជ្រាវឃើញបទយកការណ៍មួយ ផ្សាយដោយវិទ្យុបារាំងអន្តរជាតិ rfi មានចំណងជើងថា ទោះបីប្រាក់ខែតិច លោក អ៊ា ចរិយា តាំងចិត្តធ្វើការក្នុងវិស័យសុវត្ថិភាពចរាចរណ៍ជារៀងរហូត ដោយសារគិតពីអាយុជីវិតពលរដ្ឋទូទៅ – បទយកការណ៍ (rfi.fr)។
អ្នកស្គាល់លោក អ៊ា ចរិយា តាមប្រព័ន្ធផ្សព្វផ្សាយ ហាក់ចាប់អារម្មណ៍ខ្លះដែរ នៅពេលមន្រ្តីធ្វើការងារខាងសង្គមស៊ីវិលរូបនេះបានទៅកាន់មុខតំណែងជាមន្រ្តីរដ្ឋបាល។ ដ្បិតតាមរយៈបទយកការណ៍ខាងលើ លោក អ៊ា ចរិយា ដែលបានរៀនសូត្រជ្រៅជ្រះនៅកម្ពុជា និងជប៉ុន និងមានបទពិសោធច្រើនលើការងារសុវត្ថិភាពចរាចរណ៍ បានប្ដេជ្ញាធ្វើការងារនេះជារៀងរហូត។
យ៉ាងណាក៏ដោយ ក៏មិនចម្លែកពេកនោះដែរ ដែលវាសនាមនុស្សមានការប្រែប្រួល។ ម្យ៉ាងលោក អ៊ា ចរិយា ក៏មានកម្រិតវប្បធម៌ខ្ពស់សមគួរ និងក៏ក្លាយជាមន្រ្តីរាជការទៅហើយ មុនពេលលោកកាន់មុខតំណែងនាយករដ្ឋបាលសាលាក្រុងអរិយក្សត្រដែលទើបបង្កើតថ្មីនេះ។ លោកក៏ជាកូនចៅពលរដ្ឋក្នុងស្រុកខ្សាច់កណ្ដាលដែលមួយផ្នែកកាត់ចូលក្រុងអរិយក្សត្រដែរ៕