សិល្បៈជាតិ៖ កីឡាករបាល់បោះកម្ពុជាបានឈ្នះកីឡាករជម្រើសជាតិថៃ ជាកត្តាបានធ្វើឱ្យភាគីអ្នកគាំទ្រថៃបានចេញមកឡាំប៉ានិងព្រួតគ្នាវាយប្រហារលើកីឡាករជម្រើសជាតិកម្ពុជា ដោយមើលឃើញហេតុនេះលោក គឹម ពៅមិថុនា អ្នកជំនាញ Graphic Designer បានគូរគំនូរ Digital Art ឈុតបុរាណខ្មែរជូនដល់កីឡាករជម្រើសជាតិកម្ពុជា ហើយនៅពេលនេះគំនូររបស់លោកកំពុងតែទទួលបានការនិយមគាំទ្រយ៉ាងខ្លាំងលើបណ្ដាញសង្គម។
ក្រោយអត្តពលិកជម្រើសជាតិកម្ពុជាប្រភេទវិញ្ញាសារបាល់បោះបានបន្តយកឈ្នះបណ្ដាប្រទេសនានានៅក្នុងការប្រកួត ជាពិសេសគឺការប្រកួតយកឈ្នះលើជម្រើសជាតិថៃ ស្រាប់តែគេមើលឃើញអ្នកគាំទ្រថៃបានចេញមករិះគន់ចំពោះកីឡាករជម្រើសជាតិកម្ពុជា រហូតបង្កើតឱ្យមានរឿងចម្រូងចម្រាស់គ្នាកើតឡើង។
យ៉ាងណាមិញក្នុងនាមជាអ្នកគាំទ្រកីឡាជាតិ ពិសេសក្នុងព្រឹត្តិការណ៍ស៊ីហ្គេមលើកទី៣២នេះ មិថុនា បានប្រាប់សារព័ត៌មានត្រយងថា លោកសប្បាយចិត្តនិងមោទកភាពខ្លាំង ព្រោះយេីងបានរៀបចំបានយ៉ាងល្អក្នុងនាមជាម្ចាស់ផ្ទះ កំហុសបន្តិចបន្តួចមិនជាបញ្ហានោះទេ អ្វីដែលសំខាន់យេីងបានបង្ហាញថា ខ្មែរយេីងជានរណា ខ្មែរយេីងអស្ចារ្យប៉ុណ្ណា Sea Games គឺជាឱកាសមាសមួយសម្រាប់កម្ពុជា នាថ្ងៃអនាគត។ ងាកមកការគូរគំនូរនេះជាដំបូងនោះគឺលោកមានមោទកភាពចំពោះកីឡាករគ្រប់រូបដែលធ្វើគ្រប់យ៉ាងដើម្បីខ្មែរ និងយកមេដាយមាសជូនជាតិ។ លោកបានពោលថាថ្វីត្បិតកីឡាករយើងជាកូនកាត់ឬចូលសញ្ជាតិក្ដី តែអ្វីដែលសំខាន់ គឺពួកគាត់ធ្វើដើម្បីប្រយោជន៍ខ្មែរ នោះគឺជាខ្មែរហើយ។
សម្រាប់ស្នាដៃដែលកំពុងតែពេញនិយម នៅលើបណ្ដាញសង្គមនេះត្រូវបានម្ចាស់ស្នាដៃលើកឡើងថាលោកបង្កើតឡើងដោយសារ តែលោកចង់ការពារពួកគាត់ពីការមើលងាយលើពណ៌សំបុរពីសំណាក់ជនបរទេស លោកចង់បង្ហាញថា ទាល់តែពួកគាត់ (អត្តពលិកជម្រើសជាតិ) ស្លៀកពាក់ឈុតប្រពៃណីខ្មែរ ទើបជាខ្មែរ? ចុះបេះដូងដើម្បីខ្មែរមិនហៅថាជាខ្មែរទេឬ?
បុរសដែលមានស្រុកកំណើតនៅទីក្រុងភ្នំពេញ និងមានឪពុកម្ដាយជាអ្នកស្វាយរៀងរូបនេះបាន សង្កត់ធ្ងន់ថា ស្នាដៃរបស់លោក មិនមានចេតនារើសអើងនោះទេ ប៉ុន្តែគឺជាការគោរពស្រលាញ់ និងចង់ការពារអត្តពលិកជម្រើសជាតិ ព្រោះប្រជាជនកម្ពុជាគោរពស្រលាញ់កីឡាករទាំងបីរូបនេះណាស់។ ក្រៅអីអរគុណចំពោះអត្តពលិកដែលខំប្រឹងដេីម្បីលេីកទង់ជាតិមួយនេះដោយក្ដីស្រលាញ់ និងការគោរព ខ្លួនលោកផ្ទាល់ក៏ចង់បង្ហាញឱ្យបរទេសមើលឃើញថាប្រទេសខ្មែរ មិនមែនជាប្រទេសរេីសអេីងពូជសាសន៍ ពណ៌សំបុរនោះទេ។ សម្រាប់លោកឱ្យតែធ្វើអ្វីដើម្បីប្រយោជន៍ខ្មែរ លោកគោរពជាខ្មែរហើយ លោកមិនខ្វល់រឿងសាសន៍អ្វីនោះទេ។
នាថ្ងៃអនាគត លោកមានបំណងប្រាថ្នាចង់ក្លាយជាមនុស្សដែលមានសំឡេង ហើយចង់យកសំឡេងនេះទៅជួយខ្មែរ ក្នុងជំនាញរបស់លោក។ លោកក៏ចង់ក្លាយជាអ្នកចង់លើកទឹកចិត្តដល់ប្អូនៗដែលមានជីវភាពលំបាកហើយតស៊ូក្នុងវិស័យមួយនេះដូចជាលោកដែរ។
ជាការពិតណាស់កម្ពុជាបានរង់ចាំរយៈពេល៦៤ឆ្នាំទម្រាំក្លាយជាម្ចាស់ផ្ទះរៀបចំព្រឹត្តិការណ៍ប្រកួតកីឡាស៊ីហ្គេមលើកទី៣២ ហេតុដូច្នេះហើយគណៈកម្មការរៀបចំការប្រកួតក្ដី សហព័ន្ធក្ដី រាជរដ្ឋាភិបាលក្ដីបានយកចិត្តទុកដាក់យ៉ាងខ្លាំងក្នុងការរៀបចំក៏ដូចជាសម្រិតសម្រាំងកីឡាករ និងប្រភេទកីឡាដែលកម្ពុជាជឿជាក់ថានឹងឈ្នះមេដាយមាសច្រើន។
សូមជម្រាបថា កម្ពុជាបានឈ្នះមេដាយមាសជាស្ថាពរ លើប្រភេទវិញ្ញសារបាល់បោះ ៣x៣ ។ គិតត្រឹមថ្ងៃទី៨ ខែឧសភានេះ ជាលទ្ធផល កម្ពុជានៅតែឈរនាំមុខគេលេខមួយ ជាប្រទេសដែលឈ្នះមេដាយមាសច្រើនជាងគេបំផុតក្នុងព្រឹត្តិការណ៍ប្រកួតកីឡាស៊ីហ្គេមលើកទី៣២ ឆ្នាំ២០២៣៕