សង្គ្រាមបានរុញច្រានអោយកម្ពុជា បាត់ឈ្មោះចេញពីពិភពបាល់ទះប្រចាំតំបន់អាស៊ាន ខណៈក្រុមមួយនេះធ្លាប់ឈ្នះមេដាយមាសរហូតដល់ទៅ៣លើកឯណោះ ក្នុងព្រឹត្តិការណ៍កីឡាស៊ីហ្គេម កាលពីអតីតកាល មុនបន្តប្រកួតវគ្គផ្ដាច់ព្រ័ត្រនៅល្ងាចថ្ងៃច័ន្ទ ទី៨ ខែឧសភា ឆ្នាំ២០២៣។
ងាកទៅអតីតកាលដែលពិបាកស្វែងរកចម្លើយ ដោយសារឯកសារមនុស្សរស់ពាក់ព័ន្ធមួយចំនួនក៏បាត់បង់ទៅតាមសង្រ្គាម ប៉ុន្តែក្រុមការងារសារព័ត៌មានត្រយង បានរកឃើញថាក្រុមបាល់ទះបុរសកម្ពុជា បានឈ្នះមេដាយមាសរហូតដល់ទៅ៣លើកឯណោះ ពោលគឺ៖
លើកទី១) ស៊ីហ្គេមលើកទី៣ ឆ្នាំ១៩៦៥ នៅកូឡាឡាំពួរ ម៉ាឡេស៊ី៖ ក្រុមបាល់ទះបុរសកម្ពុជា ឈ្នះមេដាយមាស ក្រោយយកឈ្នះលើក្រុមថៃ វគ្គផ្ដាច់ព្រ័ត្រ ដោយលទ្ធផល ៣សិតទល់០ (១៥-១៣,១៥-៩,១៥-១០)។
លើកទី២) ស៊ីហ្គេមលើកទី៦ ឆ្នាំ១៩៧១ នៅកូឡាឡាំពួរ ម៉ាឡេស៊ី៖ ក្រុមបាល់ទះបុរសកម្ពុជា យកឈ្នះលើភូមា (បច្ចុប្បន្នមីយ៉ាន់ម៉ា) ដោយលទ្ធផលវគ្គផ្ដាច់ព្រ័ត្រ ៣ទល់០។
លើទី៣) ស៊ីហ្គេមលើកទី៧ ឆ្នាំ១៩៧២ នៅសិង្ហបុរី៖ ក្រុមបាល់ទះកម្ពុជា បានយកឈ្នះមេដាយមាស ក្រោយយកឈ្នះលើក្រុមវៀតណាមខាងត្បូង (វៀតណាម) នៅវគ្គផ្ដាច់ព្រ័ត្រ ៣សិតទល់០ ពោលគឺ១៤-៤,១៥-១០,១៥-១០។
ដោយឡែកបច្ចុប្បន្ននេះក្រុមបាល់ទះបុរសកម្ពុជា បានឡើងទៅវគ្គផ្ដាច់ព្រ័ត្រម្តងទៀតហើយ ក្នុងនាមជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ ដោយត្រូវប៉ះឥណ្ឌូណេស៊ី វេលាម៉ោង៧:៣០នាទីរសៀល ដើម្បីដណ្តើមមេដាយមាស។
កម្មវិធីប្រកួតសរុបថ្ងៃចុងក្រោយនៃបាល់ទះបុរសឆ្នាំនេះមាន៖
វគ្គលេខ៧ មីយ៉ាន់ម៉ា ប៉ះ ម៉ាឡេស៊ី ម៉ោង១២ថ្ងៃត្រង់
វគ្គលេខ៥ សិង្ហបុរី ប៉ះ ហ្វីលីពីន ម៉ោង១៤:៣០រសៀល
វគ្គមេដាយសំរឹទ្ធិ វៀតណាម ប៉ះ ថៃ ម៉ោង១៧:០០ល្ងាច
វគ្គមេដាយមាស ឥណ្ឌូណេស៊ី ប៉ះ កម្ពុជា ម៉ោង១៩:៣០ល្ងាច
