លោកជំទាវ កែ សួនសុភី ប្រធានក្លិបបាល់ទាត់វិសាខា បានសរសេរនៅលើគណនីហ្វេសប៊ុកផ្ទាល់ខ្លួននៅថ្ងៃចន្ទ ទី៨ខែឧសភា ឆ្នាំ២០២៣ នេះ ពីការគាំទ្រក្រុមបាល់ទះកម្ពុជា ដែលខ្លួនស្រលាញ់ តែកុំផ្លែផ្កាឌឺដងឱ្យក្រុមគូប្រកួត។ ការលើកឡើងនេះគឺអំឡុងពេលដែលកម្ពុជា កំពុងទទួលធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ នៅរាជធានីភ្នំពេញ និងបណ្ដាខេត្តមួយចំនួន។
សារទាំងស្រុងរបស់លោកជំទាវបញ្ជាក់ថា៖«ជូនចំពោះអ្នកគាំទ្រក្រុមបាល់ទះជម្រើសជាតិកម្ពុជា ដែលមកលើកទឹកចិត្តកម្ពុជា យប់នេះ! អ្នកគាំទ្រដើរតួនាទីយ៉ាងសំខាន់ក្នុងភាពជោគជ័យរបស់ក្រុមណាមួយ រួមទាំងក្រុមជម្រើសជាតិបាល់ទះកម្ពុជា ផងដែរ។ ក្នុងនាមជាអ្នកគាំទ្រ វាសំខាន់ណាស់ក្នុងការផ្តល់ឱ្យក្រុមរបស់យើងនូវអារម្មណ៍វិជ្ជមាន និងការលើកទឹកចិត្តពេញមួយការប្រកួត។ យើងគួរតែជៀសវាងការជេរប្រទេចផ្តាសាគូប្រកួត ហើយផ្ទុយទៅវិញ ផ្តោតលើការលើកទឹកចិត្តដល់ក្រុមរបស់យើងរហូតដល់ចប់ការប្រកួត»។
លោកជំទាវបន្តថា៖«សូមចាំថា ក្រុមរបស់យើងគឺតំណាងឱ្យប្រទេសរបស់យើង ហើយពួកគេត្រូវការការគាំទ្ររបស់យើងច្រើនជាងពេលណាៗទាំងអស់។ មិនថាមានអ្វីកើតឡើងនោះទេ យើងគួរតែបន្តលើកទឹកចិត្តក្រុមរបស់យើង ហើយបង្ហាញពួកគេថាយើងជឿជាក់លើសមត្ថភាពរបស់ពួកគេ។ សូមបង្ហាញក្រុមរបស់យើងថាយើងមានមោទនភាពចំពោះពួកគេ ហើយពួកយើងនឹងគាំទ្រពួកគេដោយបេះដូងរបស់យើងជានិច្ច»។
ក្រុមបាល់ទះបុរសរបស់កម្ពុជា ត្រូវបើកទ្វាវិមានពហុកីឡដ្ឋានជាតិក្នុងរាជធានីភ្នំពេញ ទទួលក្រុមម្ចាស់មេដាយមាស១១សម័យកាល ឥណ្ឌូណេស៊ី ក្នុងព្រឹត្តិការណ៍កីឡាស៊ីហ្គេមលើកទី៣២ នេះ បន្ទាប់ពីក្រុមទាំង២បានយកឈ្នះគូប្រកួតរៀងៗខ្លួននៅវគ្គពាក់កណ្ដាលផ្ដាច់ព្រ័ត្រ ដោយកម្ពុជា យកឈ្នះក្រុមថៃ ៣សិតទល់២សិត ហើយឥណ្ឌូណេស៊ី យកឈ្នះវៀតណាម ៣សិតទល់០។
អត្ថបទពាក់ព័ន្ធ៖បាល់ទះបុរសកម្ពុជា ធ្លាប់ឈ្នះមេដាយមាសស៊ីហ្គេម៣ជំនាន់ ខណៈល្ងាចនេះត្រូវប្រកួតផ្ដាច់ព្រ័ត្រទៀត
គិតត្រឹមពេលនេះក្រុមហ្វីលីពីន ឈរលេខ៥ ហើយសិង្ហបុរី ឈរលេខ៦ មីយ៉ាន់ម៉ា ឈរលេខ៧ និងម៉ាឡេស៊ី ឈរលេខ៨។ ចំណែកក្រុមថៃ ត្រូវប៉ះ វៀតណាម វេលាម៉ោង៥ល្ងាច ដណ្តើមមេដាយសំរឹទ្ធិ ហើយកម្ពុជា ប៉ះឥណ្ឌូណេស៊ី ម៉ោង៧:៣០នាទីយប់ ដណ្តើមមេដាយមាស៕