បញ្ជីបេក្ខជនឈរឈ្មោះបោះឆ្នោតនៃគណបក្សសំបុកឃ្មុំសង្គមប្រជាធិបតេយ្យ ដឹកនាំដោយ លោក ម៉ម សូណង់ដូ ត្រូវបាន គ.ជ.ប ចេញផ្សាយជាផ្លូវការ បន្ទាប់ពីបានសម្រេចទទួលស្គាល់ការចុះបញ្ជីគណបក្ស និងបញ្ជីបេក្ខជននៃគណបក្សមួយនេះ។
ជាការកត់តត់សម្គាល់ លោក ម៉ម សំណង់ដូ អាយុជាង៨០ឆ្នាំ បានឈរឈ្មោះលំដាប់លេខរៀងទី១ នៅមណ្ឌលខេត្តកំពង់ចាម ខណៈភរិយារបស់លោកគឺលោកស្រី ឌិន សុផាណារ៉ា ដែលមានអាយុប្អូនលោកជិត២០ឆ្នាំនោះ បានឈរលំដាប់លេខរៀងទី២។
ជាការកត់សម្គាល់ក្នុងចំណោមមណ្ឌលបោះឆ្នោតទាំង២៥ គណបក្សលោក ម៉ម សូណង់ដូ បានដាក់បេក្ខជនឈរឈ្មោះ៦មណ្ឌល រួមមានមណ្ឌលបាត់ដំបង មណ្ឌលកំពង់ចាម មណ្ឌលកណ្ដាល មណ្ឌលរាជធានីភ្នំពេញ មណ្ឌលព្រៃវែង និងមណ្ឌលស្វាយរៀង។
លោក ម៉ម សូណង់ដូ កើតនៅឆ្នាំ១៩៤២ មានស្រុកកំណើតនៅស្រុកកំពង់សៀម ខេត្តកំពង់ចាម ជាកូនប្រុសអតីតចៅហ្វាយស្រុកមួយរូប។ មហាជនមួយចំនួន ពិសេសពលរដ្ឋវ័យចំណាស់ ចាប់ផ្ដើមស្គាល់ លោក តាមរយៈការផ្សាយសំឡេងនៃរលកវិទ្យុសំបុកឃ្មុំ។
កាលពីជាង១០ឆ្នាំមុន លោក ម៉ម សូណង់ដូ ត្រូវបានអ្នកតាមដាន និងអ្នកសារព័ត៌មានដាក់រហស្សនាមថា«បុរសជាប់គុកមិនស្វាង» ដោយសារតែឧស្សាហ៍ត្រូវអាជ្ញាធរចាប់ខ្លួនបញ្ជូនទៅតុលាការ និងត្រូវផ្ដន្ទាទោស ក្នុងនោះក៏មានបទល្មើសអប្បគមន៍ផងដែរ។
ខ្សែជីវិតអ្នកនយោបាយ ពិតជាមិនខុសពីពាក្យបុរាណពោលថា«ងាប់ ជាប់គុក រត់ចោល ស្រុកឡើងធំ»នោះឡើយ។ ក្រោយការបោះឆ្នោតឆ្នាំ២០១៨ លោកក៏មានវាសនាឡើងជាទេសរដ្ឋមន្រ្តី បន្ទាប់ពីគណបក្សប្រជាជនកម្ពុជាឈ្នះអាសនៈទាំងអស់ក្នុងរដ្ឋសភា៕
