កាលពីយប់ថ្ងៃទី១១ ខែឧសភា ឆ្នាំ២០២៣ នាយិកាគ្រប់គ្រងក្លិបវិសាខា កញ្ញា អ៊ូ បញ្ញាសុកិត្យា បានថ្លែងនៅលើគេហទំព័រហ្វេសប៊ុក ជុំវិញព្រឹត្តិការណ៍ស៉ីហ្គេមលើកទី៣២ ដែលកីឡដ្ឋានព្រីនស៍ ទទួលធ្វើជាម្ចាស់ផ្ទះពូល B វិញ្ញាសាបាល់ទាត់បុរសអាយុក្រោម២២ឆ្នាំ បានបញ្ចប់ដោយជោគជ័យ។
កញ្ញា អ៊ូ បញ្ញាសុកិត្យា បានថ្លែងដូច្នេះថា៖«ថ្ងៃទី១១ ខែឧសភា ឆ្នាំ២០២៣ កីឡដ្ឋានព្រីនស៍ ការប្រកួតបាល់ទាត់បុរសជម្រុះពូល B នៃព្រឹត្តិការណ៍ស៉ីហ្គេមលើកទី៣២ ដែលប្រទេសកម្ពុជាធ្វើជាម្ចាស់ផ្ទះ គឺបានបញ្ចប់ការប្រកួតនៅកីឡដ្ឋានព្រីនស៍ដោយជោគជ័យត្រឹមល្ងាចនេះ»។
«ជាដំបូងនាងខ្ញុំសូមអរគុណដល់ថ្នាក់ដឹកនាំជាពិសេស លោកជំទាវប្រធានក្លិប កែ សួនសុភី ដែលផ្ដល់សេចក្ដីទុកចិត្តនិងឱកាសអោយនាងខ្ញុំដឹកនាំប្រតិបត្តិការណ៍នៃដំណើរការប្រកួត»។
«ទី២ នាងខ្ញុំសូមអរគុណដល់បុគ្គលិកក្លិបកីឡាបាល់ទាត់វិសាខាទាំងអស់ ដែលចូលរួមចំណែកក្នុងការរៀបចំការប្រកួតទាំង១០ប្រកួត យ៉ាងយកចិត្តទុកដាក់និងមិនរ៉ារ៉ែក ទោះមេឃក្ដៅត្រជាក់ភ្លៀងឬការបុកសំរុកចូលនៃទស្សនិកជនច្រើនយ៉ាងណា ក៏នៅតែឈរជើងតាមគោលដៅដែលបានដាក់ជូនហើយព្យាយាមដោះស្រាយរាល់បញ្ហាដែលមាន»។
«ទី៣ សូមអរគុណដល់មហាជន បងប្អូន ទាំងអស់ដែលយោគយល់និងអធ្យាស្រ័យដល់ក្រុមការងារយើងខ្ញុំ ព្រោះមហាព្រឹត្តការណ៍នេះ ការរៀបចំទ្រង់ទ្រាយធំហើយមិនមានភាពងាយស្រួលទេ ទាំងការគ្រប់គ្រងសំបុត្រ ច្រកចូល ចំណត កៅអីអង្គុយ ការថែរក្សាសុវត្ថិភាពជូនបងប្អូន ការបង្កបរិយាកាសអោយមានភាពងាយស្រួលនិងសំបូរសប្បាយជូនអ្នកទាំងអស់គ្នា»។
«នាងខ្ញុំសង្ឃឹមថាអ្នកទាំងអស់គ្នានឹងបន្តមកគាំទ្រអោយច្រើនកុះករ នៅកីឡដ្ឋានព្រីនស៍បន្តទៀត ក្នុងការប្រកួត League Cup, League, and HSC នាពេលខាងមុខបន្តទៀត។ សូមអរគុណ»។
គួរដឹងថា កញ្ញា អ៊ូ បញ្ញាសុកិត្យា គឺជាស្រ្តីជនជាតិខ្មែរដំបូងបង្អស់ដែលបានសិក្សាផ្នែកគ្រប់គ្រងបាល់ទាត់ Football Management នៃ UEFA Academy នៅឯប្រទេសស្វីស ខណៈដែលលោក លី ហ៊ាង អគ្គលេខាធិការក្លិបបាល់ទាត់ភ្នំពេញក្រោន បានឆ្លងកាត់វគ្គសិក្សានេះដោយជោគជ័យ នៅខែមិថុនា ឆ្នាំ២០២២ កន្លងទៅ៕
