ក្នុងចំណោមបេក្ខជនពេញសិទ្ធិ១២៥រូប និងបេក្ខជនបម្រុង១២៥ ដែលឈរឈ្មោះបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ នៃគណបក្សប្រជាជនកម្ពុជា ឥស្សរជនដែលមានវ័យចំណាស់ជាងគេបំផុត គឺសម្ដេចអគ្គមហាពញាចក្រី ហេង សំរិន។
សម្ដេចពញាចក្រី ហេង សំរិន មានតួនាទីជាប្រធានកិត្តិយសគណបក្ស និងបច្ចុប្បកាន់មុខតំណែងជាប្រធានរដ្ឋសភា។ សម្ដេចកើតនៅថ្ងៃទី២៥ ខែឧសភា ឆ្នាំ១៩៣៤ មានន័យថាខ្វះតែប៉ុន្មានថ្ងៃទៀតប៉ុណ្ណោះ សម្ដេចនឹងចម្រើនជន្មាយុ៨៩ ឈានចូល ៩០ឆ្នាំហើយ។
យោងតាមឯកសារស្រាវជ្រាវរបស់ លោក គាំម កុសល និងសាស្ត្រចារ្យ ដៀប សុផល ចុះផ្សាយដោយថ្មីៗឥស្សរជនកំពូលរូបនេះ បានសិក្សានៅសាលាពុទ្ធិកបឋមសិក្សា ខេត្តកំពង់ចាមនាអំឡុងឆ្នាំ១៩៥៤ និងធ្លាប់រៀនវគ្គនយោបាយជាន់ខ្ពស់នៅប្រទេសវៀតណាម។
នៅឆ្នាំ១៩៦៩ សម្ដេច មានតួនាទីជាប្រធានកងអនុសេនាតូច ចលនាប្រដាប់អាវុធ (ផ្នែក៦) តំបន់២០ ភូមិភាគ បូព៌ា (២០៣) ហើយជាបន្តបន្ទាប់លោកបានក្លាយជាប្រធានរណសិរ្សសាមគ្គីសង្គ្រោះជាតិកម្ពុជានាថ្ងៃទី២ ខែធ្នូ ឆ្នាំ១៩៧៨ និងជាប្រធានក្រុមប្រឹក្សាប្រជាជនបដិវត្តន៍កម្ពុជា ក្នុងឆ្នាំ១៩៧៩។
នៅឆ្នាំ១៩៨១ ឥស្សរជនកូនកសិកររូបនេះ មានតួនាទីជាអគ្គលេខាធិការមជ្ឈិមបក្សប្រជាជនកម្ពុជានិងជាប្រធានក្រុមប្រឹក្សារដ្ឋនៃសាធារណរដ្ឋប្រជាមានិតកម្ពុជា (ក្រោយមកជារដ្ឋកម្ពុជា) ហើយចាប់ពីឆ្នាំ១៩៩១ បានបន្តធ្វើជាជាប្រធានកិត្តិយសគណបក្សប្រជាជនកម្ពុជា។
សម្ដេចបានឈរឈ្មោះជាអ្នកតំណាងរាស្រ្តតាំងតែពីការបោះឆ្នោតដំបូលឆ្នាំ១៩៩៣ ហើយនៅឆ្នាំ២០០៦ សម្ដេចបានឡើងកាន់តំណែងជាប្រធានរដ្ឋសភា ហើយក៏បន្តទទួលបានងារជា សម្ដេចអគ្គមហាពញាចក្រី» និងមានតួនាទីកិត្តិយជានាយឧត្តមសេនីយ៍ផុតលេខផ្កាយមាស៥។
សម្ដេចមានភរិយាឈ្មោះ សៅ ទី ហើយនៅថ្ងៃទី២៣ ខែមករា ឆ្នាំ២០២០ លោកជំទាវក៏ត្រូវបានព្រះមហាក្សត្រត្រាស់បង្គាប់ផ្ដល់គោរមងារជាសម្ដេចធម្មវិសុទ្ធវង្សា សៅ ទី ហេងសំរិន ដោយយើងលើស្នាដៃគាំទ្រ តស៊ូកក្នុងការរំដោះជាតិ ជាអ្នកស្នេហាជាតិ ការពារជាតិនិងសាសនា។
ព្រះរាជក្រឹត្យព្រះមហាក្សត្រ ក៏បានលើកឡើងនូវស្នាដៃសម្ដេច សៅ ទី ក្នុងការគាំពារយ៉ាងខ្ជាប់ខ្ជួនតាមមាគ៌ានយោបាយបង្រួបបង្រួមជាតិផ្សះផ្សារជាតិរបស់ព្រះបរមរតនកោដ្ឋ បរិច្ចាគកម្លាំងកាយចិត្ត និងទ្រព្យធន ជូនសង្គមជាតិ និងបានជួយកសាងសមិទ្ធផលនានា៕
