នៅព្រឹកថ្ងៃទី១៤ ខែឧសភា ឆ្នាំ២០២៣ នេះ កីឡាការិនី ស្រួង ភាវី បានបង្ហោះសារនៅលើកទំព័រហ្វេសប៊ុករបស់ខ្លួន ថា រាល់ថាថវិកាដែលទទួលបានពីជ័យជម្នះក្នុងការប្រកួត នឹងត្រូវប្រមូលដាក់មូលនិធិសប្បុរសធម៌ទាំងអស់។
កីឡាការិនីឆ្នើម ស្រួង ភាវី បានសរសេររៀបរាប់ថា៖ «រាល់ថវិកាដែលខ្ញុំប្រកួតបានជ័យជម្នះបានទាំងប៉ុន្មានក្នុងការប្រកួតឈ្នះ ឬចាញ់ ទោះតិចក្ដីច្រើនក្ដី គឺខ្ញុំប្រមូលដាក់ទៅក្នុងមូលនិធិសប្បុរសធម៌ទាំងអស់។ ហើយតាមពិតទៅ ខ្ញុំមិនមែនជាមានទ្រព្យធនច្រើនអីទេ តែខ្ញុំធ្វើនេះគឺព្រោះចង់បង្ហាញឱ្យឃើញថា រាល់សកម្មភាពពីមុន និងឥឡូវ ហើយទៅអនាគតគឺនៅដដែល ក្នុងការជួយដល់ប្អូនៗនៅក្នុងប្រទេសខ្មែរដែលត្រូវការជំនួយជាចាំបាច់ក្នុងការស្វែងរកការរៀនសូត្រក្រេបយកចំណេះដឹងទៅអនាគត។ ខ្ញុំផ្ទាល់ទាំងបេះដូងនិងអាយុជីវិតគឺខ្ញុំលះបង់ដើម្បីកម្ពុជា។ អរគុណពុកម៉ែបងប្អូនណាស់ »។
កីឡាការិនីឆ្នើម ស្រួង ភាវី បានចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣២ និងបានឈ្នះមេដាយមាសលើវិញ្ញាសាប៊ីយ៉ាការ៉ុប៣បាំង និងបានមេដាយសំរឹទ្ធលើវិញ្ញាសាការ៉ុម១បាំង៕
