សិល្បៈអន្តរជាតិ៖ នាង Nguyen Thi Ngoc Chau បវរកញ្ញាវៀតណាម បានចេញមកអះអាងថាខ្លួនធ្លាប់ត្រូវគេបង្ខំឱ្យបោះបង់ចោលការសិក្សាមហាវិទ្យាល័យព្រោះតែបញ្ហាបំណុល។
ថ្មីៗនេះតំណាងរបស់បវរកញ្ញារូបនេះបានចេញមកនិយាយថាស្រីស្រស់រូបនេះបានឈប់សិក្សាសកលវិទ្យាល័យTon Duc Thang នៅក្នុងទីក្រុងហូជីមិញ។ ការដែលនាងឈប់រៀននេះគឺព្រោះតែច្បាប់ចំនួន២ របស់សកលវិទ្យាល័យ និងក្រសួងអប់រំនិងបង្វឹកបណ្ដុះបណ្ដាល ដូច្នេះនាងចាំបាច់ត្រូវតែគោរពតាម។
«ខ្ញុំទទួលស្ដាប់ដំណឹងនេះដោយស្ងប់ស្ងាត់ ទោះជាក្នុងចិត្តកំពុងកើតទុក្ខ ប៉ុន្តែខ្ញុំត្រូវតែទទួលស្គាល់ស្ថានភាពពិត។ នៅមានឱកាសផ្សេងទៀតដែលខ្ញុំត្រូវស្រវ៉ា ព្រោះជីវិតមិនដែលឈប់បង្រៀនមេរៀនថ្មីៗឱ្យយើងនោះទេ»។
នៅក្នុងកម្មវិធី «Dream of Vietnam» ដែលបានផ្សាយកាលពីថ្ងៃទី១២ ខែឧសភា នៅក្នុងនោះតារាម៉ូដែលរូបនេះបានជជែកជាមួយនឹងម្ដាយរបស់ខ្លួន ពាក់ព័ន្ធនឹងរឿងដែលខ្លួនមិនអាចបន្តការសិក្សាចប់ដូចពាក្យសន្យា។
«កាលពីមុន ខ្ញុំប្រាប់ម៉ែថាខ្ញុំជិតបញ្ចប់ការសិក្សា នៅសល់មិនប៉ុន្មានមុខទៀតខ្ញុំនឹងបញ្ចប់ការសិក្សា ប៉ុន្តែសាលាប្រាប់ថាខ្ញុំជាប់បំណុលច្រើនលើសលប់ ដូច្នេះខ្ញុំមិនអាចរៀនដើម្បីបញ្ចប់ការសិក្សានោះទេ។
ម្ដាយរបស់តារារូបនេះបាននិយាយថាអ្នកស្រីឈឺចាប់ដែលកូនស្រីមិនអាចបញ្ចប់ការសិក្សា ប៉ុន្តែរឿងប៉ុណ្ណេះមិនអាចបញ្ឈប់កូនសិក្សាគាត់ពីការតស៊ូនោះឡើយ។ ម៉ែរបស់នាងចង់ឱ្យកូនមានការងារជាក់លាក់ ដូច្នេះគាត់បានប្រាប់ឱ្យកូនបន្តព្យាយាមអភិវឌ្ឍការងារផ្នែកសិល្បៈរបស់ខ្លួន ព្រោះគ្រប់យ៉ាងអាចកើតឡើងបានរហូត។
បវរកញ្ញារូបនេះបានសិក្សា Biotechnology នៅសកលវិទ្យាល័យ Ton Duc Thang ហើយនាងក៏កំពុងតែមមាញឹកប្រកួត Miss Universe Vietnam 2022 ហើយកំពុងត្រៀមខ្លួនសម្រាប់ការប្រកួតបវរកញ្ញាចក្រវាឡពិភពលោកលើកទី៧១ ដែលនឹងចាប់ផ្ដើមនៅក្នុងឆ្នាំនេះ។
ក្រោយត្រលប់មកវៀតណាមពីការប្រកួតវិញ នាងត្រូវបានគេបញ្ជាក់ឱ្យដឹងថាមិនអាចបន្តការសិក្សាបាន។ នាងបានអង្វរសាលាឱ្យពិចារណាឡើងវិញ ហើយផ្ដល់ឱកាសឱ្យនាងមានឱកាសបានបញ្ចប់សារណា តែសាលាបដិសេធ។
កាលពីខែកុម្ភៈ ដំណឹងចចាមអារ៉ាមរឿងតារាម៉ូដែលត្រូវគេបង្ខំឱ្យបោះបង់ចោលការសិក្សាមានការចាប់អារម្មណ៍ខ្លាំង ចំណែកសាមីខ្លួនវិញបានបដិសេធថាខ្លួនមិនបានប្រើបរិញ្ញាប័ត្រក្លែងក្លាយដើម្បីបានចូលរួមប្រកួតបវរកញ្ញាចក្រវាឡវៀតណាម។ នាងលើកឡើងថានាងមិនដែលប្រាប់គេថានាងបញ្ចប់ការសិក្សាមហាវិទ្យាល័យនោះទេ។ អង្គភាពបវរកញ្ញាចក្រវាឡវៀតណាម បានអះអាងថា Ngoc Chau មានសិទ្ធិចូលរួមប្រកួត ហើយមិនមានបញ្ហាអ្វីនោះទេ។
គួរដឹងថា បវរកញ្ញាវរូបនេះកើតនៅ Tay Ninh កាលពីឆ្នាំ ២០១៨ នាងឈ្នះមកុដ Miss Supranational Vietnam ហើយឆ្នាំបន្ទាប់នាងបានឈ្នះ Miss Supranational Asia។ កាលពីខែឧសភា ឆ្នាំ២០២២ នាងបានឈ្នះមកុដ Miss Universe Vietnam ធ្វើឱ្យនាងមានសិទ្ធិចូលរួមដណ្ដើមតំណែងមកុដបវរកញ្ញាចក្រវាឡពិភពលោកនៅសហរដ្ឋអាមេរិក ប៉ុន្តែគួរឱ្យស្ដាយដែលនាងមិនអាចឡើងដល់វគ្គ១៦នាក់ចុងក្រោយ៕
ប្រភព៖ vnexpress
