ក្រុមជម្រើសជាតិបង់ក្លាដែស បានណាត់ក្រុមជម្រើសជាតិកម្ពុជា ប្រកួតមិត្តភាពអន្តរជាតិ នៅថ្ងៃ ទី១៥ ខែមិថុនា ឆ្នាំ២០២៣ (FIFA Day) ដើម្បីកម្តៅសាច់ដុំត្រៀមចូលរួមប្រកួតក្នុងពានរង្វាន់ប្រចាំតំបន់អាស៊ីខាងត្បូង SAFF Champion 2023 ធ្វើឡើងនៅប្រទេសឥណ្ឌា។
ដោយឡែកសម្រាប់ក្រុមជម្រើសជាតិកម្ពុជាវិញ នេះគឺជាជំនួបដំបូងហើយរបស់លោក Félix Dalmás ដែលដឹកនាំក្រុមកម្ពុជាប្រកួត បន្ទាប់ពីសហព័ន្ធបាល់ទាត់កម្ពុជា បានប្រកាសតែងតាំង ជាគ្រូបង្គោលថ្មីកាលពីថ្ងៃទី០២ មេសា ឆ្នាំ២០២៣ ជំនួសលោក Honda ក្រោយបញ្ចប់ភារកិច្ចប្រកួតស៊ីហ្គេម លើកទី៣២។
រំលឹកថា មុនប៉ះគ្នាក្នុងជំនួបមិត្តភាពអន្តរជាតិ នៅថ្ងៃទី១៥ ខែមិថុនា ឆ្នាំ២០២៣ (FIFA Day ) ខាងមុខនេះ ក្រុមទាំង២ធ្លាប់ប៉ះម្ដង ក្នុងជំនួបមិត្តភាពអន្តរជាតិដែរ កាលពីខែកញ្ញា ឆ្នាំ២០២២ កន្លងទៅ ដោយលទ្ធផលកាលនោះកម្ពុជា បានចាញ់បង់ក្លាដែស ក្នុងលទ្ធផល ១-០។
គួរដឹងថា ការប្រកួតពានរង្វាន់ SAFF Champion 2023 មានក្រុមចូលរួមចំនួន៨ក្រុម និងបានបែងចែកជា ២ពូលមានដូចជា ពូល Aមាន៖ ឥណ្ឌា, គូវែត, នេប៉ាល់, ប៉ាគីស្ថាន និងពូល B មាន៖លីបង់, ម៉ាល់ឌីវ, ប៊ូតាន់ និងបង់ក្លាដែស ដោយការប្រកួតនិងត្រូវធ្វើឡើងចាប់ពីថ្ងៃទី២១ ខែមិថុនា ដល់ ថ្ងៃទី៤ ខែកក្កដា ឆ្នាំ២០២៣៕
