យោងតាមសេចក្ដីរាយការណ៍របស់សារព័ត៌មានកូរ៉េខាងត្បូង Bae Suzy នឹងត្រលប់មកសម្ដែងភាពយន្តភាគថ្មីមួយមានចំណងជើងថា «The Second Anna»។
សារព័ត៌មាន Star News បានឱ្យដឹងថា Suzy នឹងត្រលប់មកសម្ដែងឡើងវិញនៅក្នុងខ្សែភាពយន្តភាគ «The Second Anna» ដែលជារឿងស្ថិតក្នុងគំរោងដំបូងគឺផលិតជាភាពយន្ត ប៉ុន្តែបានច្នៃចេញជារឿងភាគដែលមានចំនួន៨ភាគវិញ។ រឿងនេះនិយាយពីនារីម្នាក់ដែលមានជីវិតរស់នៅខុសពីអ្នកដទៃដោយសារតែនាងមានជំងឺ Ripley Syndrome (ជំងឺផ្លូវចិត្តម្យ៉ាងដែលធ្វើឱ្យអ្នកជំងឺជឿថាពាក្យភូតភរកុហករបស់ខ្លួនគឺជាការពិត ហើយព្យាយាមប្រឹងបង្កើតស្ថានការណ៍ និង និយាយពាក្យកុហក)។
Suzy ទទួលសម្ដែងរឿងនេះគឺជារឿងដំបូងបន្ទាប់ពីស្រីស្អាតរូបនេះបានសម្ដែងភាពយន្តដ៏ល្បី Start Up របស់ TVN ដោយសារតែជឿជាក់លើទឹកដៃដឹកនាំ និង សេណារីយ៉ូរឿង។ រឿងនេះដឹកនាំដោយ Lee Ju Young ដែលបានដឹកនាំភាពយន្ត «A Single Rider»។
សម្រាប់រឿង «The Second Anna» ស្ថិតក្នុងដំណាក់កាលស្វែងរកតួឯកប្រុស និង តួអង្គផ្សេងៗទៀត មុននឹងកំណត់កាលបរិច្ឆេទថតនៅក្នុងឆ្នាំនេះ៕