ថ្មីៗនេះយោងតាមការបង្ហោះរបស់ផេក Soul4Street បានទម្លាយចេញនូវបទសន្ទនាតាមរយៈបណ្ដាញសង្គមមួយដែលគេសន្មតថារវាង វណ្ណដា និង P-Hot ពិភាក្សាគ្នាពាក់ព័ន្ធនឹងការរួមសហការច្រៀងរួមគ្នាក្នុងពេលដ៏ឆាប់ខាងមុខនេះ។
សម្រាប់អ្នកគាំទ្រទាំងកម្ពុជា និង ថៃ មានការភ្ញាក់ផ្អើលយ៉ាងច្រើន នៅពេលដែលតារាចម្រៀង Rap ថៃលោក P-HOT បានបង្ហោះពាក្យសន្ទនារវាងលោកជាមួយនឹង វណ្ណដា តារាចម្រៀងដ៏ល្បីរបស់កម្ពុជា ដែលបានសាងប្រវត្តិសាស្ត្រតន្ត្រីសម័យលាយជាមួយនឹងចាប៉ីដងវែង ដោយបទចម្រៀង «Time To Rise»។
លោក P-HOT បានផុសសំណេរមួយមានអត្ថន័យយ៉ាងដូច្នេះ៖ «ពិភពលោកនេះធំទូលាយណាស់ នៅមានសិល្បករជាច្រើនរូបដែលខ្ញុំចង់រួមសហការជាមួយ ទោះជាខ្ញុំធ្វើបទចម្រៀងបានប៉ុន្មានរយលាន Views មិនស្មើនឹងបានយកបទចម្រៀងរ៉ែបជាភាសាថៃ ចេញទៅបង្អួតខ្សែភ្នែកមហាជនក្នុងពិភពលោក!! ចាប់ផ្ដើមពីអាស៊ានយើងមុន #VANNDA Respect Asian Rap»។
ចំណែកអត្ថន័យនៅក្នុងពាក្យសន្ទនាជាភាសាអង់គ្លេសតាមរយៈគណនី IG របស់ VANNDA បានឆ្លើយតបត្រលប់ទៅកាន់ P-HOT វិញនោះ វណ្ណដា បាននិយាយថាត្រូវការវិធីទំនាក់ទំនងដើម្បីជជែកគ្នា ព្រោះវណ្ណដា មានការចាប់អារម្មណ៍ចំពោះការរួមសហការជាមួយនឹង P-HOT ដូចគ្នា។
P-HOT បច្ចុប្បន្នកំពុងតែល្បីល្បាញខ្លាំងជាមួយបទចម្រៀងជាភាសាថៃ «เกี้ยวพาราสี» ជាបទចម្រៀង Featuring (ច្រៀងរួម) ជាមួយកុមារា Sprite ពីវេទិកាប្រកួត Show Me The Money Thailand ។
ប្រសិនបើការពិភាក្សា និងចរចា ណាមួយរវាង P-HOT និង វណ្ណាដា ប្រកបដោយជោគជ័យនោះ អ្នកគាំទ្រទាំងកម្ពុជា និង ថៃប្រាកដជាបានទស្សនាបទចម្រៀងដ៏អស្ចារ្យនិងមិនធ្លាប់មានរវាងតារាចម្រៀងរ៉ែបទាំងពីរកម្ពុជានិងថៃ៕