សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា៖ «នៅតាមបណ្ដាខេត្តនានាត្រូវរៀបចំស្លាយសម្រាប់ឲ្យប្រជាពលរដ្ឋបានទស្សនាការប្រកួតកីឡាអាស៊ាប៉ារ៉ាហ្គេម ជាពិសេសគឺពិធីបើ-ពិធីបិទព្រឹត្តិការណ៍ ព្រោះអាចមានប្រជាពលរដ្ឋមើលច្រើន»។ ការលើកឡើងដូចនេះ ធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវស្ពានបេតុងខ្សែកាប ឆ្លងកាត់ទន្លេសាប និងស្ពានអាកាសឫស្សីកែវ នៅថ្ងៃទី៣១ ខែឧសភា ឆ្នាំ២០២៣។
សម្ដេច បន្ថែមថា៖ «ស្តាតមិនអាចដាក់អ្នកទស្សនាបានច្រើនទេ គឺបានត្រឹមតែជាង៦ម៉ឺននាក់ប៉ុណ្ណេះ ដូចនេះក្នុងពេលដែលប្រជាពលរដ្ឋចង់ទស្សនា យើងត្រូវមានការរៀចចំនៅទីធ្លាខាងក្រៅដើម្បីឲ្យប្រជាពលរដ្ឋបានមើល ព្រោះថានឹងមានកម្មវិធីសិល្បះនិងទស្សនីភាពផ្សេងៗ ដូចអ្វីដែកគួរឲ្យអារម្មណ៍បំផុតកាលពីព្រឹត្តិការណ៍ស៊ីហ្គេម មានការសម្ដែងមនុស្ស និងបច្ចេកវិទ្យាមានស៊ីចង្វាក់គ្នាខ្លាំងណាស់»។
ទាក់ទងទៅនឹងព្រឹត្តិការណ៍ស៊ីហ្គេមនៅកម្ពុជានេះដែរ សម្តេចតេជោ ហ៊ុន សែន បានមានប្រសាសន៍ថា៖ «ស៊ីហ្គេម គឺជាកាតព្វកិច្ចរបស់រដ្ឋជាសមាជិកអាស៊ាន ដែលត្រូវផ្លាស់ប្តូរវេនគ្នាសម្រាប់រៀបចំព្រឹត្តិការណ៍កីឡានេះ។ ហើយគិតត្រឹមថ្ងៃនេះទី៣១ ឧសភា នេះ កម្ពុជាសល់តែ៣ ថ្ងៃទៀតតែប៉ុណ្ណោះនឹងត្រូវរៀបចំព្រឹត្តិការណ៍កីឡាអាស៊ានប៉ារ៉ាហ្គេម ឬកីឡាសម្រាប់បងប្អូនជនពិការនៅកម្ពុជា ដែលត្រូវធ្វើជាម្ចាស់ផ្ទះជាបន្តទៀត»។
សម្តេចតេជោ ហ៊ុន សែន បានអំពាវនាវដល់បងប្អូនប្រជាពលរដ្ឋខ្មែរទាំងអស់ សូមគាំទ្រ និងលើកទឹកចិត្តបន្ថែមទៀតដល់កីឡាករ-កីឡាការិនី ដែលជាកីឡាជនពិការ។សម្ដេចតេជោ បានណែនាំដល់រដ្ឋមន្រ្ដីក្រសួងទេសចរណ៍ និងក្រុមការងាររៀបចំព្រឹត្តិការកីឡាអាស៊ានប៉ារ៉ាហ្គេម ត្រូវរៀបចំទស្សនីយភាពពិធីបើកព្រឹត្តិការណ៍នេះឱ្យបានល្អ និងបាញ់កាំជ្រួចឱ្យបានច្រើន ខណៈរដ្ឋមន្រ្ដីក្រសួងទេសចរណ៍បញ្ជាក់ថា ការបាញ់កាំជ្រួចក្នុងពេលបើកព្រឹត្តិការណ៍អាស៊ានប៉ារ៉ាហ្គេម គឺមានចំនួនច្រើនជាងព្រឹត្តិការណ៍បើកស៊ីហ្គេមទៅទៀត។
គួររំលឹកថា ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលនឹងប្រព្រឹត្តិទៅចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ត្រូវបានកំណត់ជាគោលការណ៍នូវប្រទេសកីឡាចំនួន១៣ និងប្រភេទកីឡាសម្តែង១ និងមាន ១១ប្រទេសចូលរួម ប្រតិភូកីឡាសរុបចំនួន ២ ៦៩២នាក់៕