សង្គម៖ វីដេអូរបស់កុមារាម្នាក់យំអង្វរសុំច្បាប់លោកគ្រូទៅជួយម្ដាយលាងចានក្នុងរោងបុណ្យ-រោងការ ដើម្បីបានប្រាក់កម្រៃមកជួយផ្គត់ផ្គង់ជីវភាពគ្រួសារកំពុងតែដុតកម្លោចបេះដូងអ្នកដែលបានមើលឃើញឱ្យស្រណោះអាណិតចំពោះកុមារារូបនេះជាពន់ពេក។
កាលពីថ្ងៃទី១ ខែឧសភា ឆ្នាំ២០២៣ ដែលត្រូវចំទិវាកុមារអន្តរជាតិ ខណៈកុមារមួយចំនួនធំទទួលបានការគាំទ្រ ព្រមទាំងឱកាសសិក្សារៀនសូត្រល្អប្រសើរ ប៉ុន្តែកុមារា សូត្រ សុខនឿន អាយុ១០ឆ្នាំ សព្វថ្ងៃរៀនថ្នាក់ទី២មានទីលំនៅនៅភូមិតាំងរងៀង ឃុំមហាសាំង ស្រុកភ្នំស្រួច ខេត្តកំពង់ស្ពឺ បែរជាកំពុងយំអង្វរសុំលោកគ្រូឱ្យផ្ដល់ច្បាប់ឱ្យខ្លួនបានទៅជួយលាងចានម្ដាយតាមរោងបុណ្យដើម្បីបានប្រាក់កម្រៃមកជួយផ្គត់ផ្គង់ជីវភាពគ្រួសារ។
យោងតាមប្រភពពី FB Page: Top Like 5M/FB Account: ស៊ិន សាវន (គ្រូបង្ហៀន) បានបង្ហោះរៀបរាប់ពីទុក្ខលំបាករបស់កុមារាខាងលើថា៖ «ព្រោះតែជីវភាពនិងដើម្បីជួយដល់ម្ដាយនិងប្អូនៗម៉ោងសម្រាកពីការសិក្សាទៅលាងចានឱ្យគេជាមួយម្ដាយតាមរោងការ រោងបុណ្យដើម្បីបានប្រាក់កម្រៃផ្គត់ផ្គង់ជីវភាពប្រចាំថ្ងៃ នៅភូមិតាំងរងៀង ឃុំមហាសាំង ស្រុកភ្នំស្រួច ខេត្តកំពង់ស្ពឺ សូមបញ្ឈប់ការជួយដោយមិនដឹងប្រភពច្បាស់លាស់ ហើយអាចទៅដល់ទីតាំងដោយផ្ទាល់ជួបក្មេងដោយផ្ទាល់ កុំឱ្យជនឆបោកឆ្លៀតឱកាស ដាក់កុងធនាគារខ្លួនឯងយកលុយ #MMO ស្អីក៏ហ៊ានធ្វើដែរ ព្រោះលុយ….»
ក្រោយពីវីដេអូត្រូវបានបង្ហោះចែករំលែកនៅលើបណ្ដាញសង្គមរឿងរ៉ាវរបស់កុមារារូបនេះបានចាក់ដោតអារម្មណ៍បេះដូងអ្នកបានឃើញជាខ្លាំង រហូតមានការចែកចាយបន្ត 1.2K។ យ៉ាងណាមិញអ្នកដែលបានមើលឃើញពីជីវិតតស៊ូរបស់កុមារារូបនេះបានចូលរួមជាថវិកាដើម្បីជួយសម្រាលបន្ទុករបស់ប្អូនប្រុសតាមរយៈម្ចាស់គណនីខាងលើនេះ ដោយក្នុងនោះឧកញ៉ាចិត្តសប្បុរស ទ្រី ដាណា អ្នកជំនួញហាងពេជ្រ ដាណា ទ្រី ក៏បានប្រកាសចង់ជួយដល់កុមារារូបនេះផងដែរ។
មហាជនមានក្ដីរំពឹងខ្ពស់ថាក្រោយពេលដែលរឿងរ៉ាវនៃជីវិតតស៊ូរបស់ប្អូនតូច មានការចាប់អារម្មណ៍និងជួយជ្រោមជ្រែងច្រើនពីសំណាក់អ្នកមានធនធានក្នុងសង្គម អាចនឹងជួយឱ្យប្អូនអាចមានពេលវេលាបានសិក្សារៀនសូត្រគ្រប់គ្រាន់មិនបាច់ចំណាយពេល ម្ដងរត់ទៅលិច ម្ដងរត់ទៅកើត ជួយម្ដាយសម្រាលបន្ទុកគ្រួសារដូចពីមុនទៀត៕
សូមទស្សនាវីដេអូក្មងប្រុសយំអង្វរសុំច្បាប់លោកគ្រូ ទៅជួយលាងចានម្ដាយ ខាងក្រោម: