កំពង់ស្ពឺ ៖ ផ្ទះប្រជាពលរដ្ឋមួយខ្នងត្រូវអគ្គិភ័យលេបត្របាក់អស់ទាំងស្រុង កាលពីថ្ងៃទី០១ ខែមិថុនា ឆ្នាំ២០២៣ វេលាម៉ោង ១៧និង៣០នាទី ស្តិតនៅចំណុចភូមិគោកសណ្ដែក ឃុំក្រាំងចេក ស្រុកសាមគ្គីមុនីជ័យ។
តាមប្រភពព័ត៌មានបានឲ្យដឹងថា ផ្ទះរងគ្រោះ ធ្វើអំពីឈើ ប្រក់ស័ង្កសី ទំហំ ៥ម៉ែត្រគុណ ៦ម៉ែត្រ ជាកម្មសិទ្ធិរបស់ឈ្មោះ សុខ វុិត ភេទប្រុស អាយុ ៣៨ឆ្នាំ បណ្តាលឲ្យឆេះផ្ទះអស់ទាំងស្រុង ខូចខាតរថយន្ត ០១គ្រឿង ម៉ាក TOYOTA TACOMA (2002) ពណ៌ទឹកប្រាក់ ស្លាកលេខ ភ្នំពេញ 2X-8353 ឆេះទូដាក់ខោអាវ ០៣, គ្រែដេក ០៣, ពូកដេក ០២, ទូរទឹកក ០១, ប្លង់ដី ០១សន្លឹក, អត្តសញ្ញាណប័ណ្ណសញ្ជាតិខ្មែរ ០២សន្លឹក, សំបុត្រកំណើត ០៤សន្លឹក, សៀវភៅស្នាក់នៅ ០១ក្បាល, ប័ណ្ណសម្គាល់យានយន្ត ០២សន្លឹក និង កាតចាក់វ៉ាកសាំង២សន្លឹក។
តាមការបញ្ជាក់ពីសមត្ថកិច្ចនគរបាលមូលដ្ឋាន និងកម្លាំងជំនាញបានឲ្យដឹងថា មូលដែលបណ្តាលឲ្យកើតជាអគ្គិភ័យនេះមកពីការតខ្សែតំណច្រេីនកន្លែង មិនមានលក្ខណៈបច្ចេកទេសត្រឹមត្រូវ ទើបឆ្លងចរន្ដអគ្គីសនី បង្កជាអណ្តាតភ្លើងឆាបឆេះបែបនេះ។ ជាមួយគ្នានេះដែរសមត្ថកិច្ចសំណូមពរដល់ពលរដ្ឋ ត្រូវពិនិត្យលេីចំណុចនេះ ដេីម្បីជៀសវាងគ្រោះមហន្ដរាយ កេីតឡេីងជាយថាហេតុ៕
អត្ថបទ៖សង្គម