សង្គម ៖ ថ្មីៗនេះមានករណីភ្ញាក់ ផ្អើលរឿងបុរសម្នាក់ចេញមករៀបរាប់ថាខ្លួនបានបាត់លុយអស់ ១០ម៉ឺនដុល្លារ ដោយសារតែត្រូវគេប្រើប្រាស់លេខទូរស័ព្ទលោកវេរចេញ ដោយករណីនេះក្រៅពីមានការឆ្លើយតបពីធនាគារសន្យាជួយស៊ើបអង្កេតនិងសហការជាមួយសមត្ថកិច្ចដើម្បីចាប់ខ្លួនជនល្មើសនោះ ស្រាប់តែមានគណនីមួយបានចេញមកទម្លាយថា បុរសដែលផុសបាត់លុយ និងយករូបគេមកផុសថាជាជនសង្ស័យនឹងត្រូវម្ចាស់រូបប្ដឹងទារជំងឺចិត្ត។ តើរឿងនេះកើតឡើងពិត ឬគ្រាន់តែរឿងប្រឌិតធ្វើរឿងដើម្បីអាជីវកម្ម?
រឿងហេតុដែលបង្កឱ្យមានការព្រួយបារម្ភពីប្រព័ន្ធសុវត្ថិភាពរបស់អ្នកប្រើប្រាស់ធនាគារ និងប្រើប្រាស់ស៊ីមទូរស័ព្ទ ព្រោះចោរអាចប្រព្រឹត្តិបទល្មើសងាយស្រួលពេកត្រូវបានគណនីរបស់លោក ស៊ិន សុភា (Sin Sophea) បុគ្គលមានមុខមាត់លើបណ្ដាញសង្គមចេញមកទម្លាយជាបន្តបន្ទាប់ថា៖ «បន្ទាប់ពីផុសថាពិបាកចិត្តរឿងបាត់លុយរាប់មុឺនក្នុងធនាគារ ស្រាប់តែឥឡូវផុសថាសប្បាយចិត្តណាស់ដោយសារមានអ្នកខមិនតែស្ករជួយលើកទឹកចិត្តឈប់សម្តែងបានឈប់ទៅពុលមនុស្សអស់ហើយអញសូមអង្វរ»
បន្តទៀតលោកផុសថា៖ «ថ្ងៃនេះជនដែលផុសថាបាត់លុយក្នុងធនាគារ និងម្ចាស់រូបថតដែលជននោះចោទថាជនសង្ស័យត្រូវសមត្ថកិច្ចហៅទៅសួរនាំ អាចវាស់កម្ពស់ជនបំពុលថាបាត់លុយ»
ចុងក្រោយកាលពីយប់ទី២ ខែមិថុនា លោកបានផុសទៀតថា៖ «ជនដែលផុសថាបាត់លុយក្នុងកុងធនាគារបន្ទាប់មកយករូបថតបុរសម្នាក់ចោទថាជនសង្ស័យនោះត្រូវម្ចាស់រូបថតប្តឹងទារជំងឺចិត្តព្រោះរឿងបាត់លុយជារឿងមិនពិត………!»
ក្រោយសំណេរចុងក្រោយលោកបង្ហោះចេញមកក្រៅ ក៏មានអ្នកបញ្ចេញមតិយោបល់ និងជជែកវែកញែកគ្នា ដោយមានអ្នកដាក់បន្ទុកទៅលើបុរសដែលផុសរឿងបាត់លុយថាគឺជាការបំពុលសង្គម ខណៈអ្នកស្គាល់ក្រុមគ្រួសាររបស់បុរសរូបនោះបានលើកឡើងថាក្រុមគ្រួសាររបស់លោក ពិសេសភរិយាគឺជាអ្នកជំនួញអនឡាញជោគជ័យមួយរូប មិន មានពេលវេលាមកធ្វើរឿងអត់ប្រយោជន៍នោះឡើយ។ ជាងនោះម្ចាស់គណនីដែលអះអាងថាបាត់លុយនោះបានបង្ហោះភស្តុតាងគឺលេខកុងធនគារដែលទទួលបានលុយពីកុងរបស់ខ្លួនវេរទៅ។
ចំពោះករណីនេះរឿងពិតទៅជាយ៉ាងណាទៀតនោះ មានតែរង់ចាំតាមដាននិងស្រាយបំភ្លឺ ពីសមត្ថកិច្ចតែប៉ុណ្ណោះតើករណីនេះគឺជារឿងពិត គឺក៏ជារឿងប្រឌិត ដើម្បីភាពល្បីល្បាញបម្រើឱ្យអាជីវកម្ម?