សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ សម្ដែងនូវក្ដីសង្ឃឹមថា៖ «តាមរយៈនៃការប្រកួតស៊ីហ្គេមនៅព្រះរាជាណាចក្រកម្ពុជា ពេលណាមួយនោះអាស៊ានអាចនឹងទទួលការដេញថ្លៃធ្វើជាម្ចាស់ផ្ទះនៃអូឡាំពិក ឬក៏ការប្រកួតបាល់ទាត់ពិភពលោក»។
សម្ដេចតេជោនាយករដ្ឋមន្ត្រីបានមានប្រសាសន៍ដូច្នេះ ក្នុងខណៈដែលសម្ដេច និងសម្ដេចកិត្តិព្រឹទ្ធបណ្ឌិតបានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកជាផ្លូវការព្រឹត្តិការណ៍ប្រកួតកីឡាជនពិការអាស៊ានលើកទី១២ ដែលកម្ពុជាធ្វើជាម្ចាស់ផ្ទះ នារាត្រីថ្ងៃទី ០៣ ខែមិថុនា ឆ្នាំ២០២៣ នៅពហុកីឡដ្ឋានជាតិមរតតេជោ ស្ថិតក្នុងសង្កាត់ព្រែកតាសេក ខ័ណ្ឌជ្រោយចង្វារ រាជធានីភ្នំពេញ។
សម្ដេចតេជោ ហ៊ុន សែន បានថ្លែងថា៖ «ព្រះរាជាណាចក្រកម្ពុជា ទើបរៀបចំព្រឹត្តិការណ៍កីឡាអាស៊ីអាគ្នេយ៍ ស៊ីហ្គេមលើកទី៣២ ទទួលបានជោគជ័យដ៏ត្រចះត្រចង់ ហើយកម្ពុជាក្លាយទៅជាចំណែកមួយនៃកិច្ចខិតខំប្រឹងប្រែង ដើម្បីជំរុញនូវសាមគ្គីភាពអាស៊ាន និងលើកម្ពស់គុណភាពកីឡារបស់អាស៊ាន»។
សម្ដេចតេជោបានមានប្រសាសន៍សង្ឃឹមថា តាមរយៈនៃការប្រកួតស៊ីហ្គេមនៅព្រះរាជាណាចក្រកម្ពុជា ពេលណាមួយនោះអាស៊ានអាចនឹងទទួលការដេញថ្លៃធ្វើជាម្ចាស់ផ្ទះនៃអូឡាំពិក ឬក៏ការប្រកួតបាល់ទាត់ពិភពលោក ដោយសម្ដេចមានជំនឿថា បណ្ដាប្រទេសអាស៊ានរបស់យើង នឺងអាចមានក្រុមបាល់ទាត់មួយក្រុមដែលខ្លាំង សម្រាប់ការប្រកួតនៅក្នុងពិភពលោក ក្នុងក្របខ័ណ្ឌជាសហគមន៍អាស៊ានរបស់យើង។
សម្ដេចតេជោគូសបញ្ជា់ថា៖ «ពេលនេះ ព្រះរាជាណាចក្រកម្ពុជាមានមោទនភាព ដែលបានរៀបចំការប្រកួតកីឡាជនពិការអាស៊ានលើកទី១២ ដើម្បីរួមចំណែកលើកកម្ពស់សិទ្ធិសេរីភាពជនពិការភាព និងផ្ដល់ឱកាសដល់អត្តពលិកជនពិការ បញ្ចេញសមត្ថភាព ទេពកោសល្យរបស់ខ្លួន ក្នុងពិធីបុណ្យកីឡាជនពិការដ៏គគ្រឹកគគ្រេងនាពេលនេះ។ សម្ដេចតេជោនាយករដ្ឋមន្ត្រី បានស្នើឱ្យរួមគ្នាលើកកម្ពស់សិទ្ធិជនមានពិការភាព និងចូលរួមគាំទ្រអត្តពលិកជនពិការគ្រប់ៗគ្នា»។
គួរបញ្ជាក់ដែរថា ក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះនេះ ប្រតិភូ និងកីឡាករ កីឡាការិនី នៃបណ្ដាប្រទេសអាស៊ានដែលបានចូលរួមមានចំនួនប្រមាណ ២ ១៦០ នាក់ ដែលនឹងចូលរួមប្រកួតប្រជែងលើ១៣ប្រភេទកីឡា សរុបចំនួន ៤៣១វិញ្ញាសា និងប្រភេទកីឡាក្រៅផ្លូវការមួយ (E-Sports)វចាប់ផ្ដើមពីថ្ងៃទី ០៣ ដល់ថ្ងៃទី ០៩ ខែមិថុនា ឆ្នាំៗ០២៣៕
ប្រភព៖ AKP
