ភាពយន្តខ្នាតធំ «Red Notice» បានចាក់ផ្សាយឱ្យអ្នកគាំទ្របានទស្សនាហើយកាលពីថ្ងៃតី១២ ខែកក្កដា ឆ្នាំ២០២១ នៅលើ Application Netflix ដែលប្រមូលផ្ដុំដោយតារាល្បីៗជាច្រើនដូចជា «Dwayne Johnson, Gal Gadot និង Ryan Reynolds» ក្រៅពីតារាសម្ដែងជួរមុខដែលគួរឱ្យចាប់អារម្មណ៍ហើយនោះ ភាពយន្ត Action រឿងនេះនៅចំណាយដើមទុនផលិតរហូតដល់២០០លានដុល្លារសហរដ្ឋអាមេរិកថែមទៀតផង។
តាមដឹងភាពយន្ត «Red Notice» គឺជាភាពយន្តដំបូងដែលចំណាយដើមទុនច្រើនបំផុតតាំងពី Netflix ធ្លាប់បោះទុនផលិតកន្លងមក ដោយភាពយន្តនេះនឹងបរិយាយពីវីរភាពរបស់អាជ្ញាធរមានសមត្ថភាពពីក្រុម FBI (សម្ដែងដោយ The Rock) បែរជាត្រូវមករួមដៃជាមួយនឹងឧក្រិដ្ឋជន២នាក់ (Ryan និង Gal) នៅក្នុងភារកិច្ចតាមប្រម៉ាញ់ និងចាប់ខ្លួន បុគ្គលដែលសមត្ថកិច្ចនគរបាលត្រូវការជាទីបំផុត។
យោងតាមគេហទំព័រ Observer ដែលបានដកស្រង់ទិន្នន័យពី Variety បានឱ្យដឹងថា Reynolds ទទួលបានតម្លៃខ្លួន ២០លានដុល្លារសម្រាប់ការសម្ដែងរឿងនេះខណៈដែល Gadot ដែលមានប្លង់សម្ដែងតិចជាង ក៏នឹងទទួលបានតម្លៃខ្លួនប៉ុនគ្នាដោយសារតែការចរចានិងការឧបត្ថម្ភផ្សេងៗ។
ប៉ុន្តែ Johnson ទទួលបានទឹកប្រាក់លើសគេ ១លានដុល្លារដោយសារតែលោកមានតួនាទីជាអ្នកដឹកនាំបឋមមួយទៀត ប៉ុណ្ណេះនៅមិនទាន់អស់នោះទេ ព្រោះ The Rock នឹងទទួលបានភាគលាភច្រើនលានដុល្លារទៀតនៅពេលរឿងនេះចាក់បញ្ចាំង ដូច្នេះរឿង «The Red Notice» បានធ្វើឱ្យ Johnson ការពារតំណែងជាតារាប្រុសដែលស៊ីថ្លៃខ្ពស់ជាងគេក្នុងប្រវត្តិសាស្ត្រភាពយន្តយ៉ាងស្អាត។
«Red Notice» ជាស្នាដៃដឹកនាំដោយ Rawson Marshall Thurber ដែលធ្លាប់បានរួមការងារជាមួយ The Rock ក្នុងខ្សែភាពយន្ត Central Intelligence និង Skyscraper កន្លងមក៕
