ក្រុមបាល់ទះអង្គុយបុរសកម្ពុជា បានកក់កៅអីឡើងទៅវគ្គពាក់កណ្ដាលផ្ដាច់ព្រ័ត្រ ព្រឹត្តិការណ៍អាស៊ានប៉ារ៉ាហ្គេម លើកទី១២ ក្រោយយកឈ្នះប្រកួតវិលជុំចុងក្រោយលើក្រុមឥណ្ឌូណេស៊ី ដោយលទ្ធផល៣សិតទល់និង០ នៅព្រឹកថ្ងៃទី០៦ ខែមិថុនា ឆ្នាំ២០២៣។
បាល់ទះអង្គុយបុរស នេះតម្រូវឱ្យក្រុមដែលចុះឈ្មោះប្រកួតទាំងអស់ ប្រកួតវិលជុំសន្សំពិន្ទុ ហើយក្រុមដែលមានពិន្ទុខ្ពស់ជាងគេចំនួន៤មានឈ្មោះឡើងទៅវគ្គពាក់កណ្ដាលផ្ដាច់ព្រ័ត្រ ពោលគឺក្រុមចំណាត់ថ្នាក់លេខ១ ត្រូវប៉ះក្រុមលេខ៤ ហើយក្រុមចំណាត់ថ្នាក់លេខ២ ត្រូវប៉ះក្រុមចំណាត់ថ្នាក់លេខ៣។ អ្នកឈ្នះវគ្គពាក់កណ្ដាលផ្ដាច់ព្រ័ត្រ មានឈ្មោះបន្តឡើងទៅដណ្តើមមេដាយមាស តែម្តង។
ចំណែកលទ្ធផលប្រកួតកន្លងមករបស់ក្រុមកម្ពុជា បានឈ្នះហ្វីលីពីន ៣-០ ឈ្នះមីយ៉ាន់ម៉ា ៣-០ ចាញ់ថៃ ១-៣ និងចុងក្រោយឈ្នះ ឥណ្ឌូណេស៊ី ៣-០។ ចំណែកចំណាត់ថ្នាក់នឹងដឹងច្បាស់ក្រោយពេលក្រុមផ្សេងទៀតប្រកួតវិលជុំសន្សំពិន្ទុនៅថ្ងៃនេះរួចរាល់។
គួរបញ្ជាក់ផងដែរថា ក្រុមបាល់ទះអង្គុយបុរសកម្ពុជា គឺជាក្រុមដែលត្រូវការពារតំណែងមេដាយមាស ឆ្នាំចាស់ ខណៈការប្រកួតក្នុងឆ្នាំ២០២២ កន្លងទៅនៅប្រទេសឥណ្ឌូណេស៊ី ក្រុមកម្ពុជា បានយកឈ្នះក្រុមបាល់ទះអង្គុយបុរសថៃ នៅវគ្គផ្ដាច់ព្រ័ត្រ ៣សិតទល់និង១។ កាលនោះកម្ពុជា ជាម្ចាស់មេដាយមាស ហើយក្រុមថៃ ជាមេដាយប្រាក់ និងឥណ្ឌូនេស៊ី ឈ្នះមេដាយសំរឹទ្ធ៕