បញ្ហាចម្រូងចម្រាសពាក់ព័ន្ធនឹងការកសាងប្រាសាទសីហនគរ ដែលភាគីកម្ពុជាបានលើកឡើងថា ចម្លងតាមប្រាសាទអង្គរវត្តរបស់កម្ពុជា ហើយត្រូវបានភាគីថៃ ចេញមកបដិសេធនិងអះអាងថាប្លង់ និង រចនាបទ គឺមិនបានចម្លងពីអង្គវត្តនោះឡើយ តែកើតចេញពីការនិម្មិតឃើញរបស់ព្រះចៅអធិការវត្តភូម៉ានហ្វាដែលជាអ្នកផ្ដួចផ្ដើមមកសាងឡើង។
ប៉ុន្តែមហាជនកម្ពុជាបានចេញមកច្រានចោលនូវការបកស្រាយរបស់ភាគីថៃ ព្រមទាំងបានបង្ហាញភស្តុតាងជាច្រើន បញ្ជាក់ថាប្រាសាទសីហនគរនេះ គឺចម្លងតាមប្រាសាទអង្គរវត្ត។
ក្នុងនោះប្រជាជនកម្ពុជាបានបង្កើតយុទ្ធនាការផ្សព្វផ្សាយប្រាសាទអង្គរវត្តតាមរយៈ Challenge ផុសរូបខ្លួនរួមជាមួយនឹងប្រាសាទអង្គរវត្តព្រមទាំងសំណេរខ្លី ដោយមានភ្ជាប់ជាមួយនឹង Hashtag ទាមទារឱ្យមានការផ្ដល់យុត្តិធម៌ដល់កម្ពុជា និងប្រាប់ទៅពិភពលោកថាប្រាសាទអង្គរមានតែមួយគត់នៅលើពិភពលោក។ ក្នុងយុទ្ធនាការនេះ មានបងប្អូនជាប្រជាពលរដ្ឋខ្មែរជាច្រើនរួមទាំងសិល្បករ-សិល្បការិនីខ្មែរល្បីៗ ចូលរួមក្នុងយុទ្ធនាការផ្សព្វផ្សាយនេះដែរ។
អ្វីដែលកាន់តែគួរឱ្យចាប់អារម្មណ៍ខ្លាំងនោះ នៅពេលដែល អេដមីន ផេកធ្លាប់តែគាំទ្រតារាថៃ និង រឿងភាគថៃ ដូចជា Nadech yaya Cambodia FC, GMMTV & Series Fan, Dara-Thai Fan Club , Dara Thai, Furby Gang Cambodia FC បានចេញមកប្រកាសបន្តបន្ទាប់គ្នាឈប់គាំទ្រ និង ដកខ្លួនចេញពីក្រុមផ្សព្វផ្សាយប្រូម៉ូត តារាថៃ និង រឿងភាគថៃជាបន្តទៀត ដោយសារតែមានការគំរាមកំហែងតាមរយៈការ Report ផេក និង គណនីផ្ទាល់ខ្លួន ព្រោះតែអេដមីនសម្ដែងការមិនពេញចិត្តចំពោះការចម្លងប្រាសាទអង្គរវត្តទីពីរនៅប្រទេសថៃ។
មហាជនបានសម្ដែងនូវការគាំទ្រនិងកោតសរសើរខ្លាំងចំពោះការបង្ហាញនូវស្មារតីជាតិ ជាតិនិយម បង្ហាញគោលជំហរថែរក្សា ការពារ និងអភិរក្ស ប្រវត្តិសាស្ត្រ និងកេរ្តិ៍តំណែលដូនតា របស់អេដមីនដែលមានឈ្មោះខាងលើនេះ។
បញ្ហាលើកនេះបានធ្វើឱ្យកើតមានទស្សនៈវិជ្ជមានមួយថា រឿងនេះបានដាស់កូនខ្មែរឱ្យក្រោកមកស្រលាញ់វប្បធម៌ជាតិ ងាកមកស្រាវជ្រាវប្រវត្តិសាស្ត្រជាតិនិងប្រមូលផ្ដុំឯកសារដើម្បីជាភស្តុតាងបញ្ជាក់ប្រាប់ពិភពលោកថាប្រាសាទអង្គរវត្តជារបស់ដូនតាខ្មែរ។
យ៉ាងណាមិញ ក៏មានមតិខ្លះលើកឡើងដែរថា កុំឱ្យស្មារតីស្នេហាជាតិនេះមានត្រឹមតែពេលដែលមានបញ្ហា ពេលគេចង់បាន តែសូមឱ្យស្មារតីជាតិនិយមនេះស្ថិតក្នុងដួងព្រលឹង ចិត្ត និងវិញ្ញាណកូនខ្មែរគ្រប់ពេលវេលា៕
សូមទស្សនាវីដេអូខាងក្រោម៖
