សិល្បៈជាតិ៖ វាសនារបស់អធិរាជសំឡេងមាស ស៊ិន ស៊ីសាមុត មិនខុសពីពលរដ្ឋខ្មែរប្រមាណជិត២លាននាក់ ដែលត្រូវបានអង្គការអាវខ្មៅកាប់សម្លាប់យ៉ាងព្រៃផ្សៃនោះឡើយ។ ការសម្លាប់បញ្ញាវន្ត អ្នកចម្រៀង និងអ្នកនិពន្ធចម្រៀងដ៏ល្អឯកនេះ គឺជាការខាតបង់នូវគ្រាប់ពេជ្រដ៏មានតម្លៃបំផុតមួយក្នុងវិស័យសិល្បៈតន្ត្រី។ យ៉ាងណាមិញដំណើរជីវិតចុងក្រោយមុនលាចាកលោករបស់ លោកតា ស៊ិន ស៊ីសាមុត ធ្វើឱ្យអ្នកដែលបានដឹងសែនស្រណោះចំពោះលោកជាពន់ពេក។
សូមអាន៖ មានអ្នកណាដឹងខ្លះ ថ្ងៃទី២៣ ខែសីហានេះ ជាថ្ងៃខួបកំណើតអធិរាជសំឡេងមាស ស៊ីន ស៊ីសាមុត?
ក្រុមខ្មែរក្រហម ឬរបបអាវខ្មៅបានចូលកាន់កាប់ទីក្រុងភ្នំពេញទាំងស្រុងកាលពីថ្ងៃទី១៧ ខែមេសា ឆ្នាំ១៩៧៥។ ក្រោយក្ដោបក្ដាប់បានទីក្រុងដោយជោគជ័យក្រុមនេះបានជំលៀសប្រជាជនឱ្យចាកចេញពីទីក្រុងទាំងអស់ដោយឃោសនាថាចាកចេញត្រឹមតែ៣ថ្ងៃប៉ុណ្ណោះ ព្រោះទ័ពអាមេរិកត្រៀមទម្លាក់គ្រាប់បែក។ ទោះជឿឬមិនជឿប្រជាជនរស់នៅទីក្រុងត្រូវតែបង្ខំចាកចេញពីទីក្រុងព្រោះខ្លាចក្រុមខ្មែរក្រហមសម្លាប់។
មិនខុសពីបងប្អូនអ្នករស់នៅទីក្រុងដទៃទៀតលោកតា ស៊ិន ស៊ីសាមុតនិងភរិយាទីពីរព្រមទាំងកូនប្រុសតូចទើបនឹងកើត ធ្វើដំណើរចេញទៅតាមទិសដៅដែលពួកខ្មែរក្រហមបានកំណត់។ នៅតាមផ្លូវធ្វើដំណើរមកដល់ត្រឹមព្រែកឯង ពេលអង្គការដឹងថាលោកគឺជាអ្នកចម្រៀង និងនិពន្ធក្នុងរបបចាស់ ពួកគេបានបំបែកលោកពីប្រពន្ធកូន ហើយនាំលោកមកភ្នំពេញវិញដើម្បីនិពន្ធចម្រៀងឱ្យអង្គការ ប៉ុន្តែពួកគេគម្រាមថាបើផលិតចម្រៀងមិនត្រូវចិត្តអង្គការលោកនឹងត្រូវទទួលទោស។
ជាអកុសលស្នាដៃនិពន្ធលោកមិនត្រូវចិត្តអង្គការ ដូច្នេះពួកគេបានចាប់បញ្ជូនលោកមកមន្ទីរកែប្រែ១៥ ដែលស្ថិតនៅភូមិពោធិបាន ឃុំកោះធំ ស្រុកកោះធំ ខេត្តកណ្ដាល។ ជាប់ឃុំនៅទីនោះជាច្រើនខែលោកតា ស៊ិន ស៊ីសាមុតបានធ្លាក់ខ្លួនឈឺ ដោយសារតែរងការធ្វើទុក្ខទោសពីពួកខ្មែរក្រហមយ៉ាងព្រៃផ្សៃជាទីបំផុត។
លោកតា ស៊ីន ស៊ីសាមុត តែងតែនិយាយពាក្យដដែលប្រាប់អ្នកជាប់ឃុំឃាំងដូចគ្នាថា «បង នឹករលឹកប្រពន្ធកូន ការងារ និងកន្លែងដែលបងធ្លាប់ទៅលេងខ្លាំងណាស់» «ប្អូនត្រូវខិតខំកសាងខ្លួនឱ្យបានល្អ ធ្វើយ៉ាងណាឱ្យអង្គការពេញចិត្ត»។
នៅដើមខែធ្នូ ឆ្នាំ១៩៧៥ មេឃុំឃាំងមន្ទីរកែប្រែ ១៥ បានបញ្ជូនជនរងគ្រោះថ្មីមកឃុំឃាំង និងហៅឈ្មោះជនរងគ្រោះចាស់ដែលនៅជាប់ឃុំចេញទៅ ដោយក្នុងចំណោមឈ្មោះដែលត្រូវហៅទាំងអស់ឈ្មោះចុងក្រោយគេគឺឈ្មោះរបស់លោកតា ស៊ិន ស៊ីសាមុត។ ពេលឮឈ្មោះខ្លួន លោកហាក់ដឹងប្រាកដក្នុងចិត្តថាលោកប្រាកដជាត្រូវគេយកទៅសម្លាប់ដូចជនរងគ្រោះដទៃទៀតដែរ លោកបានពោលពាក្យលា អ្នកជាប់ឃុំជាមួយគ្នាថា «បងលាអូនហើយ»
ពួកទាហានខ្មែរក្រហមក្មេងៗពីរបីនាក់ បានបណ្ដើរលោក ស៊ីន ស៊ីសាមុត ចេញទៅត្រើយម្ខាងនៃមន្ទីរឃុំ ហើយនៅពេលទៅដល់ទីពិឃាត លោកត្រូវបានពួកខ្មែរក្រហមយកក្រណាត់មករុំភ្នែក ចង់ដៃស្លាបសេក ហើយឈរផ្អែកទៅនឹងគល់ឈើ ហើយទាហានក្មេងម្នាក់បានយកកាំបិតមកចាក់លើទ្រូងលោក ព្រមទាំងឱនមកខ្សឹបថា «ឱ្យខ្ញុំសុំទោសផងអ៊ុំ»
សាកសពរបស់លោក ស៊ិន ស៊ីសាមុត ត្រូវបានពយកទាហានខ្មែរក្រហមយកទៅកប់ជាមួយនឹងសពជនរងគ្រោះដទៃទៀតនៅក្នុង ឃុំពោធិបាន ស្រុកកោះធំ ខេត្តកណ្ដាល។ ទីតាំងកប់សពនេះត្រូវបានគេរកឃើញថាមានរណ្ដៅសរុប ៥៧រណ្ដៅ និងមានលលាដ៏ក្បាល ៣៥០២៧នាក់ ប៉ុន្តែមិនមានអ្នកណាដឹងឡើយថាលលាដ៏មួយណាជារបស់អធិរាជសំឡេងមាស ស៊ិន ស៊ីសាមុតនោះឡើយ។
គួរដឹងថាលោក ស៊ិន ស៊ីសាមុត មានស្រុកកំណើតនៅខេត្ត ស្ទឹងត្រែង លោកបានរៀបការចំនួន ២ដង ដោយលោកមាន បុត្រាបុត្រីសរុប ៤នាក់។ បន្ទាប់ពីសម័យខ្មែរក្រហម មានតែកូនស្រីម្នាក់និងកូនប្រុសម្នាក់ទេដែលរួចរានមានជីវិត។ ក្នុងនោះដែរកូនប្រុសលោកតា គឺលោក ស៊ីន ចាន់ឆាយា ក៏ជាតារាចម្រៀងដូចជាឪពុកដែរ ប៉ុន្តែជាអកុសលលោកបានទទួលមរណភាពកាលពីឆ្នាំ២០១៥ ដោយរអិលជើងដួល៕
